காரின் நீளம், அகலம் மட்டுமல்ல, இதையும் கவனிக்கனும்! சில மில்லி மீட்டர்களில் மொத்தமா மாறி போகும்!

பத்து லட்ச ரூபாய்க்கும் குறைவான விலையில், விசாலமான இடவசதியுடன் கூடிய கார்களுக்கான தேவை இந்தியாவில் அதிகரித்து வருகிறது. காருக்குள் அதிக இடவசதி இருக்க வேண்டுமேயானால், அதற்கேற்ப காரின் முன் மற்றும் பின் சக்கரங்களுக்கு இடையேயான தூரமும் அதிகமாக இருக்க வேண்டும். இந்த தூரத்தை 'வீல்பேஸ்' (Wheelbase) என அழைக்கின்றனர்.

சக்கரங்களுக்கு இடையேயான தூரம் அதிகமாக இருக்கும்போது, வாகனத்தின் வலிமை தன்மை மேம்படுவதுடன், பின் இருக்கை பயணிகளுக்கும் சிறந்த இடவசதி கிடைக்கிறது. சிட்ரோயன் சி3 ஏர்கிராஸ் (7-சீட்டர்) மற்றும் மஹிந்திரா எக்ஸ்யூவி 3எக்ஸ்ஓ போன்ற கார் மாடல்கள் அதிக வீல்பேஸ் உடன் இந்த பிரிவில் முன்னிலை வகிக்கின்றன. ரூபாய் பத்து லட்சத்திற்குள் கிடைக்கும், அதிக சக்கரங்களுக்கு இடையேயான தூரம் கொண்ட சில சிறந்த கார்களைப் பற்றி இங்கு காணலாம்.

சிட்ரோயன் சி3 ஏர்கிராஸ்: இந்த பிரஞ்சு-ஸ்டைல் சிட்ரோயன் எஸ்யூவி கார் அதன் பிரிவில் மிக நீண்ட வீல்பேஸ் கொண்ட காராகும். இது 5-சீட்டர் மற்றும் 7-சீட்டர் ஆகிய இரு ஆப்ஷன்களில் கிடைக்கிறது. 2,671 மிமீ வீல்பேஸ் உடன் கிடைக்கும் சி3 ஏர்கிராஸ் காரின் சில வேரியண்ட்கள் பத்து லட்ச ரூபாய்க்கும் குறைவான விலையில் சந்தையில் கிடைக்கின்றன. இந்த காரின் ஆரம்ப எக்ஸ்-ஷோரூம் விலை தற்சமயம் ரூ.8.49 லட்சம் ஆகும்.

முக்கிய அம்சங்கள்: இந்தக் கார் ஏழு பேர் வரை அமரக்கூடிய வசதியுடன், குடும்பப் பயன்பாட்டிற்கு மிகவும் ஏற்றதாக விளங்குகிறது. 5-சீட்டர் மாடலில் 444 லிட்டர் கொள்ளளவில் பின்பக்க பூட் ஸ்பேஸும், 7-சீட்டர் மாடலில் மூன்றாவது வரிசை இருக்கைகளை மடக்கினால் 511 லிட்டர் வரையில் இடவசதியும் கிடைக்கிறது. இதன் உயர்ந்த கூரை அனைத்துப் பயணிகளுக்கும் போதுமான ஹெட்ரூமை வழங்குகிறது.

மஹிந்திரா எக்ஸ்யூவி 3எக்ஸ்ஓ: இந்திய காம்பாக்ட் எஸ்யூவி கார்கள் பிரிவில், இந்த மஹிந்திரா கார் ஒரு முக்கிய போட்டியாளராகும். 2,600 மிமீ-இல் இது நீண்ட வீல்பேஸுடன் விசாலமான உட்புற இடவசதியை வழங்குகிறது. இதன் எண்ட்ரீ-லெவல் வேரியண்ட்கள் ரூ.10 லட்சத்திற்கும் குறைவாக, தற்சமயம் ரூ.7.28 லட்சம் முதல் கிடைக்கின்றன.

முக்கிய அம்சங்கள்: எக்ஸ்யூவி 3எக்ஸ்ஓ கார் தனது பிரிவில் மிக விசாலமான உட்புற இடவசதியை வழங்குகிறது. 1.2 லிட்டர் டர்போ பெட்ரோல் என்ஜின் உட்பட பல்வேறு சக்திவாய்ந்த எஞ்சின் ஆப்ஷன்கள் இந்த காரில் வழங்கப்படுகின்றன. தற்போதைய நிலவரப்படி, 10 லட்ச ரூபாய் எக்ஸ்-ஷோரூம் விலைக்குள் இதன் சில வேரியண்ட்களில் பனோரமிக் சன்ரூஃப் மற்றும் கனெக்டட் கார் தொழில்நுட்பம் போன்ற பிரீமியம் அம்சங்கள் வழங்கப்படுகின்றன.

ரெனால்ட் டிரைபர்: குறைந்த பட்ஜெட்டில் அதிகப் பயணிகளை ஏற்றிச் செல்ல விரும்புவோருக்கு, ரெனால்ட் டிரைபர் ஒரு கவர்ச்சிகரமான தேர்வாகும். ஏனெனில், 2,636 மிமீ-இல் வீல்பேஸை கொண்டிருக்கும் இது எஸ்யூவி கார் கிடையாது; அளவில் பெரியதான எம்பிவி ரக கார் ஆகும். சி3 ஏர்கிராஸை விட இதன் வீல்பேஸ் குறைவாக இருந்தாலும், இது ஒரு நடைமுறைக்கு ஏற்ற மாடுலர் வடிவமைப்பைக் கொண்டுள்ளது.

முக்கிய அம்சங்கள்: இந்தியாவில் மூன்று வரிசை இருக்கைகள் கொண்ட மலிவான கார்களில் டிரைப்பரும் ஒன்றாகும். இதன் மாடுலர் இருக்கை அமைப்பால், மூன்றாவது வரிசை இருக்கைகளை அகற்றி பூட் ஸ்பேஸை அதிகரிக்கலாம். மற்ற எம்பிவி கார்களை போன்று இல்லாமல் இதன் சிறிய வடிவம் நகர போக்குவரத்தில் எளிதாக காரை இயக்கவும் நிறுத்தவும் வசதியாக உள்ளது. டிரைபரின் எக்ஸ்-ஷோரூம் விலைகள் ரூ.5.76 லட்சம் முதல் தொடங்குகின்றன.

டிரைவ்ஸ்பார்க் கருத்து: நம்மில் சிலர் மட்டுமே கார் வாங்கும்போது வீல்பேஸ் அளவுகளை எல்லாம் கவனிக்கின்றனர். பலர், கேபினை நோட்டமிட்டு, இடவசதியை பார்த்து முடிவு செய்கின்றனர். ஆனால், எப்போதுமே துல்லியமான அளவீடுகள் தான் நமக்கு சரியானவற்றை கொடுக்கும். ஆதலால், அடுத்த முறை கார் வாங்கும்போது வாங்க விரும்பும் கார்களின் வீல்பேஸ் அளவுகளை ஒப்பிட்டு பார்க்கவும். ரூ.10 லட்சத்திற்கு உள்ளாகவே மேலே கூறப்பட்ட மூன்று கார்கள் அதிக வீல்பேஸ் உடன் கிடைக்கின்றன என்பதை நினைவில் கொள்ளுங்கள்.