ரூ.51.99 லட்சத்தில் புதிய தலைமுறை ஆடி க்யூ3 எஸ்யூவி கார் அறிமுகம்... முழு விபரம்!

மேம்படுத்தப்பட்ட அம்சங்களுடன் புதிய தலைமுறை ஆடி க்யூ3 (Audi Q3) எஸ்யூவி கார் இந்தியாவில் அறிமுகம் செய்யப்பட்டுள்ளது. ஜெர்மனியை சேர்ந்த ஆடி நிறுவனம், இந்த புதிய மாடலை பல்வேறு நவீன தொழில்நுட்ப வசதிகள், சக்திவாய்ந்த டர்போ பெட்ரோல் எஞ்சின் மற்றும் மேம்பட்ட பாதுகாப்பு அம்சங்களுடன் களமிறக்கியுள்ளது. இதன் அறிமுக எக்ஸ்ஷோரூம் விலையாக ரூ.51.99 லட்சம் நிர்ணயிக்கப்பட்டுள்ளது.

புதிய ஆடி க்யூ3 கார் இந்தியாவிலேயே அசெம்பிள் செய்யப்படுகிறது. மகாராஷ்டிர மாநிலம் சத்திரபதி சம்பாஜிநகரில் உள்ள ஸ்கோடா ஆட்டோ ஃபோக்ஸ்வேகன் இந்தியா நிறுவனத்தின் (SAVWIPL) ஆலையில் இந்த கார் தயாரிக்கப்படுகிறது. இதன்மூலமாக சரியான விலையில் இந்திய வாடிக்கையாளர்களுக்கு வழங்குவதற்கான வாய்ப்பை ஆடி பெற்றுள்ளது.

டர்போ பெட்ரோல் எஞ்சின்

புதிய ஆடி க்யூ3 காரில் 2.0 லிட்டர் டிஎஃப்எஸ்ஐ (TFSI) டர்போ பெட்ரோல் எஞ்சின் வழங்கப்பட்டுள்ளது. இந்த எஞ்சின் அதிகபட்சமாக 201 எச்பி பவரையும், 320 என்எம் டார்க்கையும் வெளிப்படுத்துகிறது. இதனுடன் 7 ஸ்பீடு எஸ் ட்ரானிக் ஆட்டோமேட்டிக் கியர்பாக்ஸ் மற்றும் குவாட்ரோ (quattro) ஆல் வீல் டிரைவ் தொழில்நுட்பம் இணைக்கப்பட்டுள்ளன. இந்த அமைப்பு நான்கு சக்கரங்களுக்கும் சக்தியைப் பகிர்ந்தளித்து, பல்வேறு சாலை நிலைகளில் சிறப்பான பிடிமானத்தையும் கட்டுப்பாட்டையும் வழங்க உதவுகிறது.

செயல்திறனைப் பொறுத்தவரை, இந்த கார் மணிக்கு 0 முதல் 100 கி.மீ வேகத்தை 7.1 வினாடிகளில் எட்டும். இதன் அதிகபட்ச வேகம் மணிக்கு 229 கிமீ என குறிப்பிடப்பட்டுள்ளது. மேலும், ஆடி டிரைவ் செலக்ட் வசதியில் பேலன்ஸ்டு, டைனமிக், கம்ஃபர்ட், எஃபிஷியன்சி மற்றும் ஆஃப்ரோடு பிளஸ் என ஐந்து டிரைவிங் மோடுகள் வழங்கப்பட்டுள்ளன.

Also Read

டொயோட்டா கிளான்ஸா vs மாருதி பலேனோ ஃபேஸ்லிஃப்ட்: இரண்டில் எது பெஸ்ட்?

மேட்ரிக்ஸ் எல்இடி ஹெட்லைட்டுகள்

புதிய ஆடி க்யூ3 காரின் வெளிப்புற வடிவமைப்பில் பெரிய சிங்கிள்ஃபிரேம் கிரில், கூர்மையான தோற்றத்தை வழங்கும் ஹெட்லைட்டுகள் மற்றும் கம்பீரமான எஸ்யூவி தோற்றம் இடம்பெற்றுள்ளன. பின்புறத்தில் தொடர்ச்சியான எல்இடி டெயில் லைட் அமைப்புடன் ஒளிரும் ஆடி லோகோவும் வழங்கப்பட்டுள்ளது.

இதில் இடம்பெற்றுள்ள டிஜிட்டல் மேட்ரிக்ஸ் எல்இடி ஹெட்லைட்டுகளில் 25,600 மைக்ரோ எல்இடிகள் பயன்படுத்தப்பட்டுள்ளன. நான்கு விதமான பகல் நேர விளக்கு வடிவங்களைத் தேர்வு செய்யும் வசதியும் உள்ளது. இந்த காரில் 18 அங்குல அலாய் வீல்கள் மற்றும் பனோரமிக் சன்ரூஃப் வழங்கப்பட்டுள்ளன. சீயெஜ் கிரீன், மைதோஸ் பிளாக், கிளேசியர் ஒயிட், நவரா ப்ளூ மற்றும் தம்போரா கிரே என ஐந்து வண்ணத் தேர்வுகளில் கிடைக்கிறது. உட்புறத்தில் டாமரிண்ட் பிரவுன் மற்றும் பெர்கமென்ட் பீஜ் என இரட்டை வண்ணங்களில் உள்ளது.

Also Read

2027ல் அறிமுகமாகிறது ஹூண்டாய் நீரா 7 சீட்டர் எம்பிவி கார்... மாருதி எர்டிகாவுக்கு நேரடி போட்டி

நவீன வசதிகளுடன் கேபின்

புதிய ஆடி க்யூ3 காரின் உட்புறத்தில் 30.22 செ.மீ அளவிலான விர்ச்சுவல் காக்பிட் டிஜிட்டல் இன்ஸ்ட்ரூமென்ட் கிளஸ்டரும், 32.51 செ.மீ அளவிலான எம்எம்ஐ டச் டிஸ்பிளேவும் வழங்கப்பட்டுள்ளன. இதனுடன் ஹெட்அப் டிஸ்பிளே வசதியும் இடம்பெற்றுள்ளது. இதன் மூலம் முக்கியமான தகவல்களை ஓட்டுனர் பார்வைக்கு நேரடியாகக் கொண்டு வர முடியும்.

ஜெனித் வேரியண்ட்டில் 12 ஸ்பீக்கர்களுடன் கூடிய 420 வாட் சோனோஸ் (SONOS) பிரீமியம் ஆடியோ சிஸ்டம் வழங்கப்படுகிறது. நோவா வேரியண்ட்டில் 10 ஸ்பீக்கர்களுடன் கூடிய 260 வாட் ஆடியோ அமைப்பு உள்ளது. வயர்லெஸ் ஆப்பிள் கார்பிளே, ஆண்ட்ராய்டு ஆட்டோ மற்றும் வயர்லெஸ் போன் சார்ஜிங் வசதிகளும் கொடுக்கப்பட்டுள்ளன.

மேலும், 30 விதமான வண்ணங்களைத் தேர்வு செய்யும் ஆம்பியன்ட் லைட்டிங் வசதி, மின்சாரத்தில் அட்ஜெஸ்ட் செய்யக்கூடிய முன் இருக்கைகள், ஓட்டுனர் இருக்கைக்கான மெமரி வசதி மற்றும் மூன்று மண்டல ஆட்டோமேட்டிக் ஏர் கண்டிஷனிங் ஆகியவை இடம்பெற்றுள்ளன. பின்புற இருக்கைகளை நகர்த்தவும், சாய்வு கோணத்தை மாற்றவும் முடியும் என்பதால் பயணிகளின் வசதிக்கும் லக்கேஜ் இடவசதிக்கும் ஏற்ப மாற்றிக்கொள்ளலாம்.

பாதுகாப்பு வசதிகள்

பாதுகாப்புக்காக புதிய ஆடி க்யூ3 காரில் ஒன்பது ஏர்பேக்குகள் வழங்கப்பட்டுள்ளன. இதனுடன் அடாப்டிவ் க்ரூஸ் கண்ட்ரோல், முன்புற அவசரகால பிரேக்கிங் சிஸ்டம், ஓட்டுனர் கவனம் மற்றும் சோர்வைக் கண்காணிக்கும் வசதி, ஹில் ஹோல்டு அசிஸ்ட் மற்றும் டவுன்ஹில் அசிஸ்ட் ஆகியவையும் இடம்பெற்றுள்ளன.

பராமரிப்பு திட்டங்கள்

புதிய ஆடி க்யூ3 காருக்காக நீண்டகால பராமரிப்புத் திட்டங்களையும் நிறுவனம் அறிவித்துள்ளது. சாலையோர உதவிச் சேவை திட்டங்கள் அதிகபட்சம் 15 ஆண்டுகள் வரையும், சர்வீஸ் வேல்யூ திட்டங்கள் மற்றும் நீட்டிக்கப்பட்ட உத்தரவாதத் திட்டங்கள் அதிகபட்சம் 10 ஆண்டுகள் வரையும் வழங்கப்படும்.

மேலும், நீண்டகால திருப்பிச் செலுத்துவதற்கான கடன் வசதி, குறைந்த மாதத் தவணையை நோக்கமாகக் கொண்ட பலூன் நிதித் திட்டம் மற்றும் உறுதியளிக்கப்பட்ட மறுவிற்பனைத் திட்டங்களும் அறிவிக்கப்பட்டுள்ளன. ரூ.51.99 லட்சம் அறிமுக விலையில் களமிறங்கியுள்ள புதிய ஆடி க்யூ3, சக்திவாய்ந்த எஞ்சின், குவாட்ரோ ஆல் வீல் டிரைவ், நவீன டிஜிட்டல் வசதிகள் மற்றும் ஏராளமான பாதுகாப்பு அம்சங்களுடன் ஆரம்ப நிலை பிரீமியம் எஸ்யூவி சந்தையில் கவனத்தை ஈர்க்கிறது.