அக்டோபரில் கார் விற்பனையில் கடும் சரிவு... காரணம் இதுதான்!

இந்திய கார் சந்தையில் கடந்த அக்டோபர் மாத விற்பனை புள்ளிவிவரங்கள் வெளியாகியுள்ளன. கடந்த ஆண்டு இதே மாதத்துடன் ஒப்பிடும்போது, இந்தாண்டு கார் விற்பனை 14.23 சதவீதம் சரிவடைந்துள்ளது. இருப்பினும், நிறுவனங்களின் சந்தைப் பங்களிப்பில் சில முக்கியமான மாற்றங்கள் ஏற்பட்டுள்ளன. குறிப்பாக டாடா மோட்டார்ஸ் இரண்டாவது இடத்தைப் பிடித்துள்ளது.

இந்தியாவில் பண்டிகைக் காலம் பொதுவாக கார் விற்பனைக்கு மிகப்பெரிய ஊக்கமாக அமையும். ஆனால், இந்தாண்டு தீபாவளி மற்றும் தந்திராஸ் பண்டிகைகள் நவம்பர் மாதத்தில் வந்ததால், அக்டோபர் மாத விற்பனையில் அதன் தாக்கம் எதிரொலித்துள்ளது. இதனால் விற்பனை சரிந்தாலும், சந்தையில் சில நிறுவனங்கள் வளர்ச்சியைப் பதிவு செய்துள்ளன.

கடந்த அக்டோபரில் இந்தியாவில் மொத்தம் 5,07,768 கார்கள் விற்பனையாகியுள்ளன. கடந்த 2025 அக்டோபரில் 5,92,032 கார்கள் விற்பனையாகி இருந்த நிலையில், 84,264 கார்கள் குறைவாக விற்பனையாகியுள்ளன. அதேநேரத்தில், செப்டம்பர் மாதத்துடன் ஒப்பிடும்போது 18.86 சதவீத வளர்ச்சி பதிவாகியுள்ளது.

ஏப்ரல் முதல் அக்டோபர் வரையிலான ஏழு மாதங்களில் மொத்தம் 30,68,353 கார்கள் விற்பனையாகியுள்ளன. கடந்தாண்டு இதே காலகட்டத்தில் 26,35,837 கார்கள் விற்பனையாகியிருந்த நிலையில், தற்போது 16.14 சதவீத வளர்ச்சி கிடைத்துள்ளது.

Also Read

ஆந்திர கார் ஆலையில் ரூ.13,000 கோடி முதலீட்டை கொட்டப்போகும் கியா!

கார் நிறுவனங்கள் வாரியான விற்பனையில் மாருதி சுஸுகி தொடர்ந்து முதலிடத்தில் உள்ளது. அக்டோபரில் 2,11,996 கார்களை மாருதி விற்பனை செய்துள்ளது. இருப்பினும், கடந்தாண்டுடன் ஒப்பிடும்போது அந்நிறுவனத்தின் விற்பனை 15.04 சதவீத சரிவைச் சந்தித்துள்ளது. இந்திய கார் சந்தையில் இந்நிறுவனத்தின் பங்களிப்பு 41.75 சதவீதமாக உள்ளது.

இரண்டாவது இடத்தில் டாடா மோட்டார்ஸ் உள்ளது. இந்நிறுவனம் அக்டோபரில் 73,449 கார்களை விற்பனை செய்துள்ளது. இது கடந்தாண்டைவிட 8.21 சதவீதம் குறைவாகும். மூன்றாவது இடத்தில் உள்ள மஹிந்திரா நிறுவனம் 64,982 கார்களை விற்பனை செய்துள்ளது. இந்நிறுவனத்தின் விற்பனை 11.88 சதவீதம் சரிந்துள்ளது.

Also Read

டாடா கார்களின் செயலியை குறிவைத்த ஹேக்கர்கள்... உரிமையாளர்களுக்கு எச்சரிக்கை!

ஹூண்டாய் நிறுவனம் 58,099 கார்களை விற்பனை செய்து நான்காவது இடத்தைத் தக்கவைத்துள்ளது. இது 16.35 சதவீத சரிவாகும். இருப்பினும், ஹூண்டாய் வென்யூ கார் தனது வரலாற்றிலேயே அதிகபட்ச மாதாந்திர விற்பனையைப் பதிவு செய்துள்ளது. கியா நிறுவனம் 30,799 கார்களை விற்பனை செய்து ஐந்தாவது இடத்தைப் பிடித்துள்ளது.

டொயோட்டா நிறுவனத்தின் விற்பனை 25.13 சதவீதம் சரிந்து 28,727 கார்களாக உள்ளது. ஸ்கோடா மற்றும் ஃபோக்ஸ்வேகன் நிறுவனங்களின் கூட்டுத் தயாரிப்புகளின் விற்பனை 32.02 சதவீதம் குறைந்து 9,150 கார்களாகப் பதிவாகியுள்ளது. மறுபுறம், ஜேஎஸ்டபிள்யூ எம்ஜி மோட்டார் 7,082 கார்களை விற்பனை செய்து 5.25 சதவீத வளர்ச்சியைப் பெற்றுள்ளது.

நிஸான் நிறுவனம் 23.56 சதவீத வளர்ச்சியுடன் 3,273 கார்களை விற்பனை செய்துள்ளது. வின்ஃபாஸ்ட் நிறுவனத்தின் விற்பனை 142 கார்களில் இருந்து 2,571 ஆக உயர்ந்துள்ளது. அதேபோல், பிஎம்டபிள்யூ நிறுவனமும் 6.50 சதவீத வளர்ச்சியைப் பதிவு செய்துள்ளது. ஹோண்டா மற்றும் ரெனோ கார் நிறுவனங்கள் முறையே 29.86 மற்றும் 31.57 சதவீத சரிவைச் சந்தித்துள்ளன.

எரிபொருள் வகை அடிப்படையில் பெட்ரோல் மற்றும் எத்தனால் கார்கள் 41.60 சதவீத பங்களிப்புடன் முதலிடத்தில் உள்ளன. சிஎன்ஜி மற்றும் எல்பிஜி கார்கள் 24.59 சதவீதத்தையும், டீசல் கார்கள் 16.57 சதவீதத்தையும் கொண்டுள்ளன. ஹைபிரிட் கார்களின் பங்களிப்பு 9.94 சதவீதமாகவும், மின்சார கார்களின் பங்களிப்பு 7.38 சதவீதமாகவும் உள்ளது.

கடந்த அக்டோபர் மாத கார் விற்பனையில் சரிவு ஏற்பட்டிருந்தாலும், ஏப்ரல் முதல் அக்டோபர் வரையிலான ஒட்டுமொத்த விற்பனை நல்ல வளர்ச்சியைப் பதிவு செய்துள்ளது. நவம்பர் மாதத்தில் தீபாவளி உள்ளிட்ட பண்டிகைகள் வந்ததால், நடப்பு மாத விற்பனை புள்ளிவிவரங்கள் இந்திய கார் சந்தையின் உண்மையான வளர்ச்சிப் போக்கை வெளிப்படுத்தும் என எதிர்பார்க்கப்படுகிறது.