E20 பெட்ரோலால் மைலேஜ் குறையும்?... முதல் முறையாக உண்மையை ஒப்புக்கொண்ட மத்திய அரசு!!

E20 பெட்ரோல் குறித்து வாகன ஓட்டிகளிடையே நீண்ட நாட்களாக இருந்து வந்த முக்கிய சந்தேகத்திற்கு தற்போது மத்திய அரசே விளக்கம் அளித்துள்ளது. இதுவரை E20 பெட்ரோலால் என்ஜினுக்கு எந்த பாதிப்பும் ஏற்படாது என்று கூறி வந்த அரசு, தற்போது பழைய வாகனங்களில் மைலேஜ் 3 முதல் 5 சதவீதம் வரை குறையலாம் என்பதை நாடாளுமன்றத்தில் முதல் முறையாக அதிகாரப்பூர்வமாக ஒப்புக்கொண்டுள்ளது.

இந்தியாவில் E20 பெட்ரோல் அறிமுகப்படுத்தப்பட்ட நாள் முதல், "இதனால் என்ஜினுக்கு பாதிப்பு ஏற்படுமா?", "மைலேஜ் குறையுமா?", "பழைய வாகனங்களில் பயன்படுத்தலாமா?" போன்ற கேள்விகள் தொடர்ந்து எழுந்து வந்தன. இதற்கு மத்திய அரசு இதுவரை E20 பெட்ரோல் பல்வேறு தொழில்நுட்ப சோதனைகள் மற்றும் ஆய்வுகளுக்குப் பிறகே அறிமுகப்படுத்தப்பட்டதாகவும், என்ஜினுக்கு பாதிப்பு ஏற்படாது என்றும் விளக்கம் அளித்து வந்தது.

இந்த நிலையில், நாடாளுமன்றத்தில் எழுப்பப்பட்ட கேள்விக்கு மத்திய சாலைப் போக்குவரத்து மற்றும் நெடுஞ்சாலைகள் அமைச்சகம் அளித்த பதிலில், E10 பெட்ரோலுக்காக வடிவமைக்கப்பட்ட பழைய வாகனங்களில் E20 பெட்ரோலை பயன்படுத்தும்போது 3 முதல் 5 சதவீதம் வரை மைலேஜ் குறைய வாய்ப்புள்ளது என்று தெரிவித்துள்ளது. அதே நேரத்தில், E20 பெட்ரோல் பயன்படுத்துவதால் என்ஜின் சேதமடைகிறது அல்லது வாகனங்கள் அடிக்கடி பழுதாகின்றன என்பதற்கான பரவலான ஆதாரங்கள் எதுவும் இல்லை என்றும் அரசு தெளிவுபடுத்தியுள்ளது.

E20 பெட்ரோலில் கலப்பு விகிதம்?

E20 பெட்ரோலில் 20 சதவீத எத்தனால் (Ethanol) மற்றும் 80 சதவீத பெட்ரோல் கலந்து தயாரிக்கப்படும் கலப்பு வகை பெட்ரோல் எரிபொருளாக விற்பனைக்கு கொண்டு வரப்பட்டது. கச்சா எண்ணெய் இறக்குமதியை குறைத்து, விவசாயிகளுக்கு கூடுதல் வருமான வாய்ப்பை உருவாக்குவது மற்றும் சுற்றுச்சூழலுக்கு தீங்கு ஏற்படுத்தும் கார்பன் உமிழ்வை குறைப்பது ஆகிய நோக்கங்களுடன் மத்திய அரசு நாடு முழுவதும் E20 பெட்ரோலை படிப்படியாக அறிமுகப்படுத்தி வருகிறது.

மைலேஜ் ஏன் குறைகிறது?

எத்தனாலின் ஆற்றல் அடர்த்தி (Energy Density), சாதாரண பெட்ரோலை விட சற்று குறைவாக உள்ளது. இதனால், அதே அளவு எரிபொருளில் வாகனம் செல்லும் தூரமும் குறைகிறது. எளிமையாகச் சொன்னால், அதே தூரத்தை கடக்க வாகனம் சற்று அதிக எரிபொருளை பயன்படுத்த வேண்டியிருக்கும். இதுவே மைலேஜ் 3 முதல் 5 சதவீதம் வரை குறைவாக இருப்பதற்கான முக்கிய காரணம் என அரசு விளக்கியுள்ளது.

இருப்பினும், இந்த மைலேஜ் குறைவு அனைத்து வாகனங்களிலும் ஒரே மாதிரியாக இருக்காது. வாகனத்தின் வயது, என்ஜின் தொழில்நுட்பம், பராமரிப்பு முறை மற்றும் ஓட்டும் விதம் ஆகியவற்றைப் பொறுத்து இது மாறுபடலாம்.

புதிய வாகனங்களுக்கு ஏதும் பிரச்னை உண்டா?

இந்த தகவல் அனைத்து வாகனங்களுக்கும் பொருந்தாது என்பது குறிப்பிடத்தக்கது. குறிப்பாக E10 பெட்ரோலுக்காக வடிவமைக்கப்பட்ட பழைய பெட்ரோல் வாகனங்களில் மட்டுமே மைலேஜ் குறைவு ஏற்படலாம் என்று அரசு தெரிவித்துள்ளது.

2023 ஏப்ரலுக்குப் பிறகு அறிமுகமான பெரும்பாலான BS6 Phase-2 பெட்ரோல் கார்கள் மற்றும் இருசக்கர வாகனங்கள் E20-க்கு ஏற்ற வகையில் (E20 Compatible) வடிவமைக்கப்பட்டுள்ளன. எனவே, இத்தகைய புதிய வாகனங்களில் E20 பெட்ரோலை பயன்படுத்துவதால் குறிப்பிடத்தக்க தொழில்நுட்ப பிரச்சினைகள் ஏற்பட வாய்ப்பில்லை.

என்ஜினுக்கு பாதிப்பு இல்லையா?

நாடாளுமன்றத்தில் அளிக்கப்பட்ட பதிலில், E20 பெட்ரோல் பயன்படுத்துவதால் என்ஜின் சேதமடைகிறது அல்லது வாகனங்கள் அடிக்கடி பழுதாகின்றன என்ற பரவலான புகார்கள் அரசுக்கு கிடைக்கவில்லை என்று மத்திய அரசு தெரிவித்துள்ளது.

சமீப காலமாக சமூக வலைதளங்களில் சில வாகனங்கள் பழுதடைந்ததாக கூறப்படும் பதிவுகள் வைரலாகி வந்தாலும், அவற்றை E20 பெட்ரோலுடன் நேரடியாக தொடர்புபடுத்தும் உறுதியான அறிவியல் ஆதாரங்கள் இதுவரை இல்லை என்றும் அரசு சுட்டிக்காட்டியுள்ளது. எனவே, சமூக வலைதளங்களில் வெளியாகும் ஒவ்வொரு தகவலையும் E20 பெட்ரோலுடன் இணைத்து பார்க்க முடியாது என்பதையும் அரசு மறைமுகமாக தெளிவுபடுத்தியுள்ளது.

E25, E30 வருகிறதா?

E20 பெட்ரோல் நாடு முழுவதும் பயன்பாட்டில் இருக்கும் நிலையில், எதிர்காலத்தில் E25 அல்லது E30 போன்ற அதிக எத்தனால் கலவை கொண்ட பெட்ரோலை அறிமுகப்படுத்தும் திட்டம் உள்ளதா என்ற கேள்விக்கும் மத்திய அரசு பதில் அளித்துள்ளது.

அதன்படி, தற்போதைக்கு E20-க்கு மேல் எத்தனால் கலவை சதவீதத்தை உயர்த்தும் எந்த திட்டமும் அரசிடம் இல்லை என்று தெரிவிக்கப்பட்டுள்ளது. எதிர்காலத்தில் இது தொடர்பாக ஏதேனும் முடிவு எடுக்கப்பட்டால், அது அறிவியல் ஆய்வுகள், தொழில்நுட்ப மதிப்பீடுகள் மற்றும் அனைத்து தரப்பினருடனான ஆலோசனைகளின் அடிப்படையிலேயே இருக்கும் என்றும் அரசு கூறியுள்ளது.

வாகன உரிமையாளர்களின் கவலை?

உங்கள் வாகன உற்பத்தியாளர் E20 பெட்ரோலை பயன்படுத்த அனுமதி வழங்கியிருந்தால், அதை எந்த தயக்கமும் இல்லாமல் பயன்படுத்தலாம். புதிய E20-இணக்க வாகனங்களை பயன்படுத்துபவர்கள் கவலைப்பட வேண்டிய அவசியமில்லை.

அதேநேரத்தில், E10 பெட்ரோலுக்காக வடிவமைக்கப்பட்ட பழைய வாகனங்களை பயன்படுத்துபவர்கள், மைலேஜில் 3 முதல் 5 சதவீதம் வரை சிறிய அளவிலான குறைவை எதிர்பார்க்கலாம். இருப்பினும், E20 பெட்ரோல் பயன்படுத்துவதால் என்ஜின் சேதமடைகிறது என்ற கருத்துக்கு இதுவரை உறுதியான ஆதாரம் இல்லை என்பதே மத்திய அரசின் அதிகாரப்பூர்வ நிலைப்பாடாக உள்ளது குறிப்பிடத்தக்கது.