Click it and Unblock the Notifications
டீலருக்கு வந்தபோது முதல் தரிசனம் கொடுத்த ஹூண்டாய் பேயான்... அக்.26-ல் அறிமுகம்!
இந்தியாவில் எஸ்யூவி கார்களுக்கான போட்டி தொடர்ந்து அதிகரித்து வரும் நிலையில், ஹூண்டாய் நிறுவனம் தனது புதிய பேயான் (Hyundai Bayon) காரை அறிமுகம் செய்யத் தயாராகி வருகிறது. வரும் 26-ம் தேதி இந்தக் கார் இந்தியாவில் அறிமுகம் செய்யப்பட உள்ளது. இந்நிலையில், அறிமுகத்துக்கு முன்பாகவே பேயான் கார்கள் டீலர்களின் ஸ்டாக்யார்டுக்கு வரத் தொடங்கியுள்ளன.
புதிய ஹூண்டாய் பேயான் கார் டீலருக்கு வந்தபோது வீடியோ மற்றும் அதன் படங்கள் தற்போது சமூக வலைத்தளங்களில் வெளியாகி இருக்கிறது. சிவப்பு நிற ஹூண்டாய் பேயான் கார் கன்டயெய்னரில் இருந்து இறக்கப்படும் காட்சிகள் இடம்பெற்றுள்ளன. இதன் மூலம் இந்தியாவுக்கான மாடல் டீலர் அளவில் வரத் தொடங்கியிருப்பது தெரியவந்துள்ளது.
வசீகர தோற்றம்
புதிய ஹூண்டாய் பேயான் காரின் வடிவமைப்பு உயரமான எஸ்யூவி தோற்றத்தில் அமைந்துள்ளது. முன்பக்கத்தில் மெல்லிய எல்இடி பகல்நேர விளக்குகள் (LED DRLs), கீழே தனியாக அமைக்கப்பட்ட ஹெட்லைட் ஹவுசிங் ஆகியவை இடம்பெற்றுள்ளன. முன்புற பம்பர் மற்றும் சக்கரங்களைச் சுற்றியுள்ள கிளாடிங் அமைப்பு இதன் தோற்றத்தை மேலும் கம்பீரமாக்குகின்றன.
பின்புறத்தில் ஸ்பாய்லர், உயரத்தில் பொருத்தப்பட்ட பிரேக் லைட், சுறாத் துடுப்பு போன்ற வடிவத்தில் ஆன்டெனா மற்றும் தடிமனான பம்பர் ஆகியவற்றைக் காண முடிகிறது. வீடியோவில் சிவப்பு நிற காருக்கு மாறுபட்ட நிறத்தில் கூரையும் இருப்பது தெரிகிறது. எனினும், முழுமையான வண்ணத் தேர்வுகள் மற்றும் வேரியண்ட் விபரங்கள் அறிமுகத்தின்போது தெளிவாக தெரிய வரும்.
என்னென்ன வசதிகள்
புதிய பேயான் காரின் முக்கியமான சிறப்பம்சம் அதன் தொழில்நுட்ப வசதிகள் நிறைந்த கேபின் ஆகும். இதில் 12.3 அங்குல தொடுதிரை இன்ஃபோடெயின்மென்ட் சிஸ்டம் மற்றும் 12.3 அங்குல டிஜிட்டல் டிரைவர் டிஸ்பிளே என இரண்டு பெரிய திரைகள் வழங்கப்பட்டுள்ளன. இதுதவிர, செயற்கை நுண்ணறிவு (AI) அடிப்படையிலான குரல் உதவியாளர் இடம்பெறுவது குறிப்பிடத்தக்கது. சாதாரண கட்டளைகளுக்கு மட்டுமின்றி, இயல்பான உரையாடல் முறையில் கேட்கப்படும் கேள்விகளுக்கும் பதிலளிக்கும் வகையில் இந்த வசதி உருவாக்கப்பட்டுள்ளது.
என்விடியா (NVIDIA) தொழில்நுட்பத்தை அடிப்படையாகக் கொண்ட கனெக்டட் கார் நேவிகேஷன் காக்பிட், 70-க்கும் மேற்பட்ட புளூலிங்க் ஆப் மூலமாக கனெக்டெட் கார் வசதிகள் மற்றும் 19 வாகனக் கட்டுப்பாட்டு அமைப்புகள் வரை மென்பொருள் புதுப்பிப்புகளை நேரடியாகப் பெறும் வசதி ஆகியவையும் இதில் இடம்பெறுகின்றன. தமிழ் உள்ளிட்ட மொழிகளில் குரல் கட்டளைகளைப் பயன்படுத்தும் வசதியும் வழங்கப்படுகிறது.
எஞ்சின் விபரம்
ஹூண்டாய் பேயான் காரில் 1.5 லிட்டர், நான்கு சிலிண்டர், பெட்ரோல் எஞ்சின் வழங்கப்படுகிறது. இது அதிகபட்சமாக 113 எச்பி திறனையும், 144 என்எம் டார்க்கையும் வெளிப்படுத்தும். இந்த இன்ஜினுடன் 6 ஸ்பீடு மேனுவல் கியர்பாக்ஸ் மற்றும் ஐவிடி (IVT) ஆட்டோமேட்டிக் கியர்பாக்ஸ் தேர்வுகள் வழங்கப்படுகின்றன. நகரப் போக்குவரத்தில் எளிதாக ஓட்டுவதற்கும், அன்றாடப் பயன்பாட்டுக்கும் ஏற்ற வகையில் இந்த இன்ஜின் அமைந்துள்ளது.
விலை எவ்வளவு இருக்கும்?
ஹூண்டாய் பேயான் காரின் விலை இன்னும் அதிகாரப்பூர்வமாக அறிவிக்கப்படவில்லை. அக்டோபர் 26-ம் தேதி நடைபெற உள்ள அறிமுக நிகழ்வில் விலை உள்ளிட்ட முழுமையான விபரங்கள் வெளியாகும் என எதிர்பார்க்கப்படுகிறது. இந்தியாவில் ஹூண்டாய் வென்யூ (Venue) மற்றும் கிரெட்டா (Creta) கார்களுக்கு இடையில் பேயான் நிலைநிறுத்தப்பட உள்ளது. ரூ.9 லட்சம் முதல் ரூ.10 லட்சம் இடையிலான விலையில் எதிர்பார்க்கப்படுகிறது. இதன் விலை நிர்ணயம் வாடிக்கையாளர்களின் கவனத்தை ஈர்ப்பதில் முக்கியப் பங்கு வகிக்கும்.
ஏற்கெனவே முன்பதிவு தொடங்கியுள்ள நிலையில், ரூ.11,000 செலுத்தி ஹூண்டாய் டீலர்களிடமோ நிறுவனத்தின் அதிகாரப்பூர்வ இணையதளம் மூலமாகவோ காரை முன்பதிவு செய்யலாம். பண்டிகைக் காலத்தில் டெலிவரிகள் தொடங்கும் என நிறுவனம் தெரிவித்துள்ளது.
Images Source: MRD Vlogs
Continue with Google
