ஒரே கார் மூலம் 20 ஆயிரம் பேரின் நம்பிக்கையை சம்பாதித்த மாருதி! அடுத்த இடத்தில் டாடா எஸ்யூவி கார்!

2025ஆம் ஆண்டு, இந்தியாவில் எஸ்யூவி (SUV) கார்களின் சந்தை ஆதிக்கத்துடன் நிறைவடைந்தது. எஸ்யூவி கார்களின் தொடர்ச்சியான வளர்ச்சி, நாட்டின் முன்னணி வாகன உற்பத்தி நிறுவனங்களுக்கு பெரும் விற்பனை அதிகரிப்பை அளித்துள்ளது. இதன் மூலமாக, கடந்த டிசம்பர் மாதத்தில் 7 எஸ்யூவி கார்கள் 10 ஆயிரம் யூனிட்களுக்கும் மேல் விற்பனையாகி உள்ளன.

இந்த லிஸ்ட்டில் முதலிடத்தை பிடித்துள்ள மாருதி சுஸுகி ஃபிரான்க்ஸ் (Maruti Suzuki Fronx) 20 ஆயிரம் யூனிட்களுக்கும் மேல் விற்பனை செய்யப்பட்டுள்ளது. கடந்த டிசம்பரில் மாருதி சுஸுகி ஃபிரான்க்ஸ் 20,706 யூனிட்கள் விற்பனையாகி, 2024 டிசம்பர் உடன் ஒப்பிடும்போது 93% என்கிற மாபெரும் வளர்ச்சியைப் பதிவுசெய்து, எஸ்யூவி கார்கள் விற்பனைப் பட்டியலில் முதலிடம் பிடித்தது.

இதற்கடுத்து, டாடா நெக்ஸான் (Tata Nexon) 19,375 யூனிட்கள் விற்பனையாகி இரண்டாவது இடத்தைப் பிடித்துள்ளது. முந்தைய ஆண்டு இதே காலகட்டத்துடன் ஒப்பிடுகையில், இது 43% வளர்ச்சியைக் காட்டுகிறது. டாடாவின் இந்த காம்பாக்ட் எஸ்யூவி காரின் தொடர்ச்சியான வெற்றிக்கு அதன் விரிவான என்ஜின் ஆப்ஷன்கள், வேரியண்ட்கள் வரிசை மற்றும் ஏராளமான அம்சங்கள் காரணமாகும்.

இதற்கேற்ப டாடா மோட்டார்ஸ் இந்த காரை அவ்வப்போது புதிய வசதிகள் மற்றும் சிறப்புப் பதிப்புகளுடன் மேம்படுத்தி வருகிறது. காம்பாக்ட் எஸ்யூவி கார்கள் பிரிவில் நெக்ஸானுக்கு போட்டியாக இருக்கும் மாருதி சுஸுகி பிரெஸ்ஸா (Maruti Suzuki Brezza) 17,704 யூனிட்கள் விற்பனையுடன் மூன்றாவது இடத்தைப் பிடித்துள்ளது. இருப்பினும், 2024 டிசம்பர் உடன் ஒப்பிடுகையில் அதன் வளர்ச்சி 2% என்ற அளவில் மிகவும் குறைவாகவே இருந்தது.

டாடா பன்ச் (Tata Punch) 15,980 யூனிட்களை விற்று 2024 டிசம்பரை விட 6% வளர்ச்சியுடன் மேலும் ஒரு வெற்றிகரமான ஆண்டை நிறைவு செய்துள்ளது. டாடா பன்ச்சின் ஃபேஸ்லிஃப்ட் (Facelift) செய்யப்பட்ட மாடல் ஏற்கனவே டீலர்ஷிப்களை வந்தடைந்துவிட்டது. இந்த ஜனவரி 13 அன்று இது விற்பனைக்கு வரும் என அறிவிக்கப்பட்டுள்ளது. புதிய பன்ச் உட்புறத்திலும் வெளியேயும் பல மாற்றங்களுடன் வரவுள்ள நிலையில், என்ஜின் மற்றும் மெக்கானிக்கல் அம்சங்களில் எந்த மாற்றமும் இருக்காது.

மஹிந்திரா ஸ்கார்பியோ (Mahindra Scorpio) 15,885 யூனிட்களுடன் சிறந்த விற்பனையைப் பதிவுசெய்து, 2024 டிசம்பரை விட 30% வலுவான வளர்ச்சியை எட்டியுள்ளது. ஹூண்டாய் கிரெட்டா (Hyundai Creta) 13,154 யூனிட்களுடன் 4% ஆண்டுக்கு ஆண்டு வளர்ச்சியை பெற்றுள்ளது. புதிய தலைமுறை ஹூண்டாய் வென்யூ (Venue) வாடிக்கையாளர்களிடையே நல்ல வரவேற்பைப் பெற்ற நிலையில், கடந்த மாதத்தில் இந்த கார் 10,322 யூனிட்கள் விற்கப்பட்டுள்ளது.

மஹிந்திரா எக்ஸ்யூவி 3எக்ஸ்ஓ (XUV 3XO) 9,422 யூனிட்கள் விற்கப்பட்டு எட்டாவது இடத்தைப் பிடித்துள்ளது. இது 35% குறிப்பிடத்தக்க ஆண்டுக்கு ஆண்டு வளர்ச்சியைப் பதிவு செய்துள்ளது. கியா சொனெட் (Kia Sonet) கடந்த டிசம்பர் மாதத்தில் விற்பனையில் மிகப்பெரிய சதவீத வளர்ச்சியைக் கண்டுள்ளது.

கடந்த மாதத்தில் இந்த மாடல் 9,418 யூனிட்கள் விற்கப்பட்டு, சுமார் 182% என்கிற வியக்கத்தகு வளர்ச்சியைப் பதிவு செய்துள்ளது. இந்த டாப்-10 விற்பனைப் பட்டியலை நிறைவு செய்யும் மஹிந்திரா தார் (Mahindra Thar) 9,339 யூனிட்களுடன் 22% வளர்ச்சியை அடைந்துள்ளது. மூன்று கதவுகள் கொண்ட தார், அடுத்த சில மாதங்களில் புதிய மேம்படுத்தலைப் பெறும் என எதிர்பார்க்கப்படுகிறது.

டிரைவ்ஸ்பார்க் கருத்து: நிமிர்ந்த கம்பீரமான தோற்றம் கொண்ட எஸ்யூவி கார்களுக்கு கடந்த சில வருடங்களாகவே சிறப்பான வரவேற்பு கிடைத்து வருகிறது. இது கடந்த 2025ஆம் ஆண்டிலும் தொடர்ந்த நிலையில், கடந்த டிசம்பர் மாதத்தில் கிட்டத்தட்ட அனைத்து எஸ்யூவி கார்களும் சிறப்பான விற்பனையை பதிவு செய்துள்ளன. இது வரும் மாதங்களிலும் தொடரும் என்றே எதிர்பார்க்கிறோம். குறிப்பாக, பன்ச் ஃபேஸ்லிஃப்ட் கார் இந்த பொங்கலுக்கு விற்பனைக்கு வர உள்ளதால், அதன் விற்பனை புதிய உச்சத்தை தொடும்.