Click it and Unblock the Notifications
ஜீப் காம்பஸ் எஸ்யூவியின் பேஸ் வேரியண்டிலேயே 9 ஸ்பீடு கியர்பாக்ஸ்... விலை ரூ.21.99 லட்சம்!
இந்தியாவில் எஸ்யூவி வாங்க விரும்பும் வாடிக்கையாளர்கள் மத்தியில் ஜீப் காம்பஸ் காருக்கு தனி இடம் உண்டு. பிரீமியம் தோற்றம், சக்திவாய்ந்த டீசல் எஞ்சின், சிறப்பான ஓட்டுதல் அனுபவம் எனப் பல அம்சங்களைக் கொண்ட இந்தக் காரில், தற்போது குறைவான பட்ஜெட்டில் ஆட்டோமேட்டிக் கியர்பாக்ஸ் வசதியைத் தேர்வு செய்வதற்கான புதிய வாய்ப்பை ஜீப் நிறுவனம் அறிமுகப்படுத்தியுள்ளது.
இதன்படி, ஜீப் காம்பஸ் காரின் ஆரம்ப நிலை ஸ்போர்ட் வேரியண்டில் டீசல் ஆட்டோமேட்டிக் மாடல் அறிமுகம் செய்யப்பட்டுள்ளது. இதற்கு ரூ.21.99 லட்சம் எக்ஸ்ஷோரூம் விலையாக நிர்ணயிக்கப்பட்டுள்ளது. இதன் மூலம், காம்பஸ் காரின் ஆட்டோமேட்டிக் மாடலை வாங்க விரும்புபவர்கள், அதிக விலை கொண்ட வேரியண்ட்டுக்குச் செல்ல வேண்டிய அவசியம் குறைந்துள்ளது.
இந்த புதிய வேரியண்ட்டில் 2.0 லிட்டர் மல்டிஜெட் II டர்போ டீசல் எஞ்சின் பயன்படுத்தப்பட்டுள்ளது. இந்த எஞ்சின் அதிகபட்சமாக 170 எச்பி பவரையும், 350 என்எம் டார்க்கையும் வெளிப்படுத்தும் திறன் கொண்டது. நகர்ப்புறப் பயணங்கள் மட்டுமின்றி, நெடுஞ்சாலைப் பயணங்களுக்கும் ஏற்ற வகையில் இந்த எஞ்சின் அமைந்துள்ளது.
இந்த இன்ஜினுடன் 9 ஸ்பீடு டார்க் கன்வெர்ட்டர் ஆட்டோமேட்டிக் கியர்பாக்ஸ் இணைக்கப்பட்டுள்ளது. இதன் மூலம் முன்பக்கச் சக்கரங்களுக்கு சக்தி கடத்தப்படுகிறது. குறிப்பாக, போக்குவரத்து நெரிசல் அதிகமுள்ள நகரங்களில் அடிக்கடி கியர் மாற்ற வேண்டிய சிரமத்தைத் தவிர்க்க விரும்புபவர்களுக்கு இந்த ஆட்டோமேட்டிக் மாடல் பயனுள்ளதாக இருக்கும்.
மேலும், இந்த வேரியண்ட்டிலும் ஃப்ரீக்வென்சி செலக்டிவ் டேம்பிங் (FSD) சஸ்பென்ஷன் மற்றும் டைனமிக் ஸ்டீயரிங் டார்க் (DST) தொழில்நுட்பம் இடம்பெற்றுள்ளன. சாலையின் தன்மைக்கு ஏற்ப சிறப்பான பயண அனுபவத்தையும், சிறந்த ஓட்டுதல் அனுபவத்தையும் வழங்குவதில் இந்தத் தொழில்நுட்பங்கள் முக்கிய பங்கு வகிக்கின்றன.
ஜீப் காம்பஸ் ஸ்போர்ட் ஆட்டோமேட்டிக் மாடலின் வெளிப்புறத் தோற்றத்தில் பெரிய மாற்றங்கள் செய்யப்படவில்லை. இதில் எல்இடி ஹெட்லைட்டுகள், பகல்நேர விளக்குகள் (DRL), குரோம் நிற ஜன்னல் விளிம்புகள், கருப்பு நிற வெளிப்புற ரியர் வியூ மிரர்கள் மற்றும் அவற்றில் ஒருங்கிணைக்கப்பட்ட டர்ன் இண்டிகேட்டர்கள் வழங்கப்பட்டுள்ளன.
மேலும், 17 அங்குல சில்வர் நிற அலாய் வீல்கள், பின்புற ஸ்பாய்லர் மற்றும் ஷார்க் ஃபின் ஆன்டெனா ஆகியவையும் இடம்பெற்றுள்ளன. கூடுதல் அலங்காரத்தை விரும்பும் வாடிக்கையாளர்களுக்காக, தனியாக ஆக்சஸரி பேக்கும் வழங்கப்படுகிறது. இதில் வெளிப்புற டீக்கல்கள், மட்கார்டுகள் உள்ளிட்டவை இடம்பெறுகின்றன.
காரின் உட்புறத்தில் கருப்பு நிறத்தை அடிப்படையாகக் கொண்ட இன்டீரியர் வடிவமைப்பு கொடுக்கப்பட்டுள்ளது. டேஷ்போர்டு மற்றும் கதவுகளில் சாம்பல் நிற அலங்காரங்கள் இடம்பெற்றுள்ளன. இருக்கைகளில் நீல நிறத் தையல் வேலைப்பாடுகள் வழங்கப்பட்டுள்ளன. எளிமையான உட்புற அமைப்புடன் அத்தியாவசியமான தொழில்நுட்ப வசதிகளுக்கும் முக்கியத்துவம் அளிக்கப்பட்டுள்ளது.
இதில் 8.4 அங்குல தொடுதிரை இன்ஃபோடெயின்மென்ட் சிஸ்டம் வழங்கப்பட்டுள்ளது. இது வயர்லெஸ் ஆப்பிள் கார்பிளே மற்றும் ஆண்ட்ராய்டு ஆட்டோ வசதிகளை ஆதரிக்கிறது. நான்கு ஸ்பீக்கர்கள் கொண்ட ஆடியோ சிஸ்டம், 3.5 அங்குல டிஜிட்டல் இன்ஸ்ட்ரூமென்ட் கிளஸ்டர், ஸ்டீயரிங் வீலில் கட்டுப்பாட்டு பொத்தான்கள் மற்றும் எலெக்ட்ரிக் அட்ஜெஸ்ட் வசதியுடன் வெளிப்புற ரியர் வியூ மிரர்கள் ஆகியவையும் இடம்பெற்றுள்ளன.
பாதுகாப்பு வசதிகள்
இந்த புதிய ஆட்டோமேட்டிக் வேரியண்ட்டில் ஆறு ஏர்பேக்குகள், ஆட்டோ ஹோல்டு மற்றும் க்ரூஸ் கண்ட்ரோல் ஆகியவை கூடுதலாகக் கிடைக்கின்றன. இதனுடன் எலக்ட்ரானிக் ஸ்டெபிலிட்டி கண்ட்ரோல், டிராக்ஷன் கண்ட்ரோல், ஹில் ஸ்டார்ட் அசிஸ்ட், குழந்தைகளுக்கான ஐசோஃபிக்ஸ் இருக்கை இணைப்புகள் மற்றும் டயர் அழுத்தக் கண்காணிப்பு அமைப்பு ஆகியவையும் வழங்கப்பட்டுள்ளன.
மேலும், எலக்ட்ரானிக் பார்க்கிங் பிரேக், ரியர் பார்க்கிங் சென்சார்கள் மற்றும் ரிவர்சிங் கேமரா ஆகிய வசதிகளும் இடம்பெற்றுள்ளன. கூடுதல் வசதிகளை விரும்புபவர்கள் ரூ.29,900 விலையில் விருப்பத் தேர்வாக வழங்கப்படும் ஆக்சஸரி பேக்கை வாங்கலாம். இதில் ஆம்பியன்ட் லைட்டிங், டேஷ்கேம், பிரத்யேக டீக்கல்கள், அனைத்து காலநிலைகளுக்கும் ஏற்ற தரை விரிப்புகள் மற்றும் மட்கார்டுகள் இடம்பெறுகின்றன.
ஜீப் காம்பஸ் ஸ்போர்ட் டீசல் ஆட்டோமேட்டிக் காரின் டெலிவரி கொடுக்கும் பணிகள் இந்தியாவில் வரும் நவம்பர் இரண்டாவது வாரத்தில் தொடங்கும் என அறிவிக்கப்பட்டுள்ளது. இதன் விலை ரூ.21.99 லட்சம் எக்ஸ்ஷோரூம் என்பதால், காப்பீடு, பதிவு மற்றும் பிற கட்டணங்கள் சேர்க்கப்படும்போது ஆன்ரோடு விலை அதிகரிக்கும்.
டிரைவ்ஸ்பார்க் கருத்து
ஆட்டோமேட்டிக் கியர்பாக்ஸ் வசதி வேண்டும் என்பதற்காக அதிக விலை கொண்ட வேரியண்ட்டை வாங்க வேண்டிய நிலையை இந்தப் புதிய அறிமுகம் ஓரளவு மாற்றுகிறது. சக்திவாய்ந்த டீசல் எஞ்சின், 9 ஸ்பீடு ஆட்டோமேட்டிக் கியர்பாக்ஸ் மற்றும் ஆறு ஏர்பேக்குகள் போன்ற அம்சங்கள் இதன் முக்கிய அம்சங்களாக உள்ளன.
Continue with Google
