கடைசி காரையும் இந்தியாவில் டெலிவிரி செய்தது லம்போர்கினி! ஒரு சகாப்தமே முடிவுக்கு வந்தாச்சு!

ஆட்டோமொபிலி லம்போர்கினி இந்தியா (Automobili Lamborghini India) நிறுவனம் தனது கடைசி ஹுராகன் டெக்னிகா (Huracan Tecnica) காரை இந்தியாவில் புக் செய்த வாடிக்கையாளருக்கு டெலிவிரி (Delivery) செய்துள்ளது. இதன் மூலம், புகழ்பெற்ற வி10 என்ஜின் (V10 Engine) கொண்ட சூப்பர் ஸ்போர்ட்ஸ் காரான ஹுராகனின் சகாப்தம் இந்தியாவில் முடிவுக்கு வந்துள்ளது.

ஒரு தசாப்தத்திற்கும் மேலாக, இந்தக் கார் லம்போர்கினியின் தயாரிப்பு வரிசையில் முக்கிய அங்கமாகத் திகழ்ந்ததுடன், அதன் வெற்றிக்கும் அடையாளமாக இருந்தது. 2014ஆம் ஆண்டு முதன்முதலாக ஹுராகன் எல்பி (LP) 610-4 மாடலுடன் அறிமுகமானதில் இருந்து, இது லம்போர்கினியின் மிகவும் பல்துறை வாய்ந்த மற்றும் அதிகம் விற்பனையான காராகத் தன்னை நிலைநிறுத்திக் கொண்டது.

அதன் உற்பத்தி காலம் முழுவதும், மொத்தம் 252 ஹுராகன் கார்கள் இந்தியாவில் பல்வேறு பகுதிகளில் டெலிவிரி செய்யப்பட்டன. ஒவ்வொன்றும் இத்தாலிய பிராண்டின் தனித்துவமான, செயல்திறன் சார்ந்த டிஎன்ஏ-வை தாங்கி நின்றன. தற்போது இறுதியாக டெலிவிரி செய்யப்பட்டுள்ள ஹுராகன் டெக்னிகா (Tecnica) ஆனது சாதாரண ஹுராகன் மற்றும் ட்ராக்கில் மட்டுமே கவனம் செலுத்தும் ஹுராகன் எஸ்டிஓ (STO) ஆகியவற்றுக்கு இடையே ஒரு பாலமாகச் செயல்படும் வகையில் வடிவமைக்கப்பட்டது.

அதிகப்பட்சமாக 631 பிஹெச்பி ஆற்றலை வெளியிடக்கூடிய 5.2 லிட்டர் நேச்சுரலி அஸ்பிரேட்டட் வி10 என்ஜின் ஹுராகன் டெக்னிகா காரில் வழங்கப்பட்டது. பின் சக்கரங்களை இயக்கும் ஸ்டீயரிங் சக்கரம், மேம்பட்ட ஏரோடைனமிக்ஸ் மற்றும் சாலை, ட்ராக் என இரண்டிற்கும் ஏற்றவாறு வடிவமைக்கப்பட்ட சேசிஸ் மேம்பாடுகள் போன்ற அதிநவீன அம்சங்களை ஹுராகன் டெக்னிகா கொண்டுள்ளது.

தனது தயாரிப்பு காலம் முழுவதும், ஹுராகன் கார்கள் பல புதுப்பித்தல்களைக் கண்டன. ஒவ்வொன்றிலும் லம்போர்கினியின் பொறியியல் தத்துவத்திற்கு அவசியமான செயல்திறன் மேம்பாடுகள் அறிமுகப்படுத்தப்பட்டன. அதன் டைனமிக் திறன்கள் மற்றும் தனித்துவமான வி10 என்ஜின் பண்புகளுக்காக ஹுராகன் உலகம் முழுவதும் பரவலான பாராட்டைப் பெற்றது.

ஹுராகன் சகாப்தம் முடிவுக்கு வந்துவிட்ட நிலையில், லம்போர்கினி ஏற்கனவே தனது அடுத்த தலைமுறை சூப்பர் ஸ்போர்ட்ஸ் கார் வரிசையான டெமரேரியோ (Temerario)-ஐ இந்தியாவில் அறிமுகப்படுத்திவிட்டது. கடந்த 2025 ஏப்ரல் மாதத்தில் அறிமுகம் செய்யப்பட்ட டெமரேரியோ ஆனது என்ஜின் + எலெக்ட்ரிக் மோட்டார் பவர்டிரெய்னைக் கொண்ட லம்போர்கினியின் ஹைப்ரிட் கார் ஆகும்.

ரூ.6 கோடி என்கிற எக்ஸ்-ஷோரூம் விலை (Ex-Showroom Price)-இல் விற்பனை செய்யப்படும் டெமரேரியோ காரில் 4 லிட்டர் ட்வின்-டர்போ வி8 என்ஜின், 3 எலெக்ட்ரிக் மோட்டார்களுடன் பொருத்தப்படுகிறது. இரு மோட்டார்கள் காருக்கு முன்பக்கத்திலும், ஒரு மோட்டார் பின்பக்கத்திலும் வழங்கப்படுகிறது. என்ஜின் மட்டும் அதிகப்பட்சமாக 789 பிஎச்பி ஆற்றலை வெளியிடக்கூடியது.

3 எலெக்ட்ரிக் மோட்டார்கள் சேர்த்து மொத்த பவர்டிரெயின் மூலம் 907 பிஎச்பி இயக்க ஆற்றலை பெறலாம். 8-ஸ்பீடு ட்யூயல்-க்ளட்ச் ஆட்டோமேட்டிக் கியர்பாக்ஸ் உடன் வரும் டெமரேரியோ காரில் 0-இல் இருந்து 100kmph வேகத்தை வெறும் 2.7 வினாடிகளில் எட்டிவிடலாம். இந்த காரின் டாப்-ஸ்பீடு மணிக்கு 343கிமீ ஆகும்.

டிரைவ்ஸ்பார்க் கருத்து: பிரபலமான ஹுராகன் காருக்கு பதிலாக டெமரேரியோ ஹைப்ரீட் காருக்கு லம்போர்கினி மாறுவது, எலெக்ட்ரிக் உந்துவிசையையும் பாரம்பரிய செயல்திறன் பொறியியலையும் ஒருங்கிணைத்து, மின்மயமாக்கப்பட்ட ஸ்போர்ட்ஸ் கார்களை நோக்கிய லம்போர்கினியின் பரிணாம வளர்ச்சியை குறிக்கிறது. ஹுராகனில் இருந்து டெமரேரியோவிற்கு மாறுவது இந்தியாவில் லம்போர்கினிக்கு ஒரு புதிய அத்தியாயமாக அமைகிறது.