Click it and Unblock the Notifications
மஹிந்திரா கார்களுக்கு தொடர்ந்து எகிறும் மவுசு... செப்டம்பர் விற்பனையிலும் அசத்தல்!
இந்தியாவில் மஹிந்திரா எஸ்யூவி கார்களுக்கான வரவேற்பு தொடர்ந்து அதிகரித்து வரும் நிலையில், செப்டம்பரில் அந்நிறுவனம் 64,092 எஸ்யூவி மற்றும் பயன்பாட்டு பயணிகள் வாகனங்களை (Utility Passenger Vehicles) உள்நாட்டில் விற்பனை செய்துள்ளது. இது கடந்த ஆண்டு செப்டம்பர் மாதத்துடன் ஒப்பிடுகையில் 14 சதவீதம் உயர்ந்துள்ளது.
மஹிந்திரா நிறுவனம் வெளியிட்டுள்ள செப்டம்பர் மாத விற்பனை அறிக்கையில், அந்நிறுவனத்தின் ஒட்டுமொத்த வாகன விற்பனையும் நல்ல வளர்ச்சியைப் பதிவு செய்துள்ளதாக தெரிவிக்கப்பட்டுள்ளது. ஏற்றுமதியையும் சேர்த்து செப்டம்பர் மாதத்தில் மஹிந்திரா நிறுவனம் மொத்தம் 1,14,874 வாகனங்களை விற்பனை செய்துள்ளது. இது கடந்த ஆண்டு செப்டம்பர் மாதத்துடன் ஒப்பிடும்போது 15 சதவீதம் வளர்ச்சி பெற்றுள்ளது.
இதில் முக்கியமாக பயணிகள் வாகனப் பிரிவில் இடம்பெறும் Utility Vehicles விற்பனை குறிப்பிடத்தக்க அளவில் உயர்ந்துள்ளது. கடந்த ஆண்டு செப்டம்பரில் 56,233 யூனிட்டுகள் விற்பனை செய்யப்பட்ட நிலையில், இந்த ஆண்டு செப்டம்பரில் 64,092 யூனிட்டுகள் விற்பனை செய்யப்பட்டுள்ளன. இதன் மூலம் இந்தப் பிரிவில் 14 சதவீத வளர்ச்சி பதிவாகியுள்ளது.
நடப்பு நிதியாண்டின் முதல் ஆறு மாதங்களையும் சேர்த்து பார்க்கும்போது, மஹிந்திராவின் Utility Vehicles விற்பனை மேலும் வலுவான நிலையில் உள்ளது. ஏப்ரல் முதல் செப்டம்பர் வரையிலான காலகட்டத்தில் மொத்தம் 3,58,142 யூனிட்டுகள் விற்பனை செய்யப்பட்டுள்ளன. கடந்த நிதியாண்டின் இதே காலகட்டத்தில் 2,97,570 யூனிட்டுகள் விற்பனை செய்யப்பட்ட நிலையில், தற்போது 20 சதவீதம் வளர்ச்சி ஏற்பட்டுள்ளது.
வர்த்தக வாகனப் பிரிவிலும் மஹிந்திரா சிறப்பான வளர்ச்சியை பதிவு செய்துள்ளது. செப்டம்பர் மாதத்தில் உள்நாட்டில் 30,420 வர்த்தக வாகனங்கள் விற்பனை செய்யப்பட்டுள்ளன. இது கடந்த ஆண்டு இதே மாதத்தைவிட 14 சதவீதம் அதிகமாகும். குறிப்பாக 2 டன்னுக்கு குறைவான LCV விற்பனை 19 சதவீதமும், 2 முதல் 3.5 டன் வரையிலான LCV விற்பனை 13 சதவீதமும் உயர்ந்துள்ளன.
மூன்று சக்கர வாகனங்களின் விற்பனையும் செப்டம்பர் மாதத்தில் 26 சதவீதம் உயர்ந்து 16,343 யூனிட்டுகளாக இருந்தது. ஏப்ரல் முதல் செப்டம்பர் வரையிலான காலகட்டத்தில் இந்தப் பிரிவிஸ் வாகன விற்பனை 82,058 யூனிட்டுகளாகவும், வளர்ச்சி 53 சதவீதமாகவும் உள்ளது.
இதற்கிடையே, மஹிந்திரா தனது மின்சார எஸ்யூவி மாடல்களுக்கும் குறிப்பிடத்தக்க விற்பனை மைல்கல்லை எட்டியுள்ளதாக தெரிவித்துள்ளது. அறிமுகம் செய்யப்பட்டதிலிருந்து Electric Origin SUV அடிப்படையில் உருவாக்கப்பட்ட கார்களுக்கு இதுவரை 1 லட்சம் பில்லிங் செய்யப்பட்டுள்ளது என்ற புதிய மைல்கல்லை கடந்துள்ளதாக மஹிந்திரா ஆட்டோமோட்டிவ் வர்த்தகப் பிரிவு தலைவர் வேலுசாமி தெரிவித்துள்ளார்.
கடந்த செப்டம்பர் மாதத்தில் மஹிந்திரா வாகன ஏற்றுமதி 4,019 யூனிட்டுகளாக இருந்தது. இது ஆண்டுக்கு ஆண்டு அடிப்படையில் 7 சதவீத சரிவை சந்தித்துள்ளது. இருப்பினும், நடப்பு நிதி ஆண்டின் ஏப்ரல் முதல் செப்டம்பர் வரையிலான ஒட்டுமொத்த ஏற்றுமதி 30,031 யூனிட்டுகளாக இருந்தது. இது முந்தைய நிதி ஆண்டு இதே காலக்கட்டத்துடன் ஒப்பிடுகையில் 48 சதவீத வளர்ச்சியை பதிவு செய்துள்ளது.
இந்த நிலையில், தனது வர்த்தகத்தை வலுவாக்கும் விதத்தில் அண்மையில் ஸ்கார்ப்பியோ என் ஃபேஸ்லிஃப்ட் மாடலையும், தார் ஓஜி ஃபேஸ்லிஃப்ட் மாடலையும் விற்பனைக்கு கொண்டு வந்தது. இதனைத்தொடர்ந்ந்து புதிய பொலிரோ, விஷன் என்ற புதிய எஸ்யூவி மாடல்களையும் அறிமுகம் செய்வதற்கான முயற்சிகளில் ஈடுபட்டுள்ளது.
Continue with Google
