ஒரே மாதத்தில் 50 ஆயிரம் கார்களை விற்பது எல்லாம் சாதாரணமாகி போச்சு! 2025இன் ஒட்டுமொத்த எண்ணிக்கை விண்ணை தொடுது!

புதிய மஹிந்திரா எக்ஸ்யூவி 7எக்ஸ்ஓ (Mahindra XUV7XO) எஸ்யூவி கார் விரைவில் அறிமுகம் செய்யப்பட உள்ள நிலையில், 2025 டிசம்பர் மாதத்தில் மஹிந்திரா நிறுவனம் உள்நாட்டு சந்தையில் வலுவான விற்பனை வளர்ச்சியைப் பதிவு செய்துள்ளது. இந்த நிறுவனத்தின் எஸ்யூவி கார்கள் (SUV Cars), வர்த்தக வாகனங்கள் மற்றும் மூன்று சக்கர வாகன விற்பனையின் நிலையான உத்வேகம் இதற்கு முக்கியக் காரணம் ஆகும்.

ஒட்டுமொத்தமாக, 2025ஆம் ஆண்டின் முதல் நாளில் இருந்து பெரும்பாலான முக்கியப் பிரிவுகளில் ஆரோக்கியமான விற்பனை வளர்ச்சியை எட்டி, மஹிந்திரா கடந்த ஆண்டை வெற்றிகரமாக நிறைவு செய்துள்ளது. பயணிகள் கார்கள் பிரிவில் மஹிந்திரா சிறப்பான வளர்ச்சியைப் பதிவு செய்துள்ளது. 2025 டிசம்பரில் 50,946 கார்களை மஹிந்திரா விற்பனை செய்துள்ளது.

இது 2024 டிசம்பரில் விற்கப்பட்ட 41,424 மஹிந்திரா கார்களுடன் ஒப்பிடுகையில் 23% வளர்ச்சியைக் காட்டுகிறது. ஸ்கார்பியோ-என் (Scorpio-N), தார் (Thar), எக்ஸ்யூவி700 (XUV700) மற்றும் பொலிரோ (Bolero) போன்ற வெற்றி பெற்ற கார்களுக்கான வலுவான தேவை, எஸ்யூவி கார்கள் சந்தையில் மஹிந்திராவின் ஆதிக்கத்தை உறுதிப்படுத்துகிறது. கடந்த 2025ஆம் ஆண்டில் ஏப்ரலில் இருந்து டிசம்பர் வரையில் மொத்தமாக மஹிந்திரா கார்கள் விற்பனை 18% உயர்ந்து 4,76,476 யூனிட்களை எட்டியுள்ளது.

அதேநேரம், மஹிந்திராவின் கமர்ஷியல் வாகனப் பிரிவில் கலவையான போக்குகள் காணப்பட்டன. 2 டன் எடைக்கும் குறைவான இலகுரக வர்த்தக வாகனங்கள் (LCV) டிசம்பரில் 13% வளர்ச்சி கண்டாலும், கடந்த ஆண்டில் ஏப்ரல்-டிசம்பர் வரையிலான விற்பனை 4% சரிந்துள்ளது. இருப்பினும், 2 முதல் 3.5 டன் வரையிலான LCV-கள் டிசம்பரில் 22,066 யூனிட்கள் விற்பனையாகி, 37% வலுவான வளர்ச்சியைப் பதிவு செய்துள்ளன.

சரக்கு போக்குவரத்து மற்றும் லாஸ்ட்-மைல் ஏற்றுமதி/இறக்குமதிக்கான வாகன தேவைகள் அதிகரித்ததால், 2025 ஏப்ரல்-டிசம்பரில் இந்தப் பிரிவின் விற்பனை 16% உயர்ந்துள்ளது. எலெக்ட்ரிக் வாகனங்களுடன் கூடிய மஹிந்திராவின் மூன்று சக்கர வாகன விற்பனை, 2025 டிசம்பரில் 7,538 யூனிட்களுடன் 31% குறிப்பிடத்தக்க வளர்ச்சியைப் பதிவு செய்துள்ளது. ஒட்டுமொத்தமாக கடந்த ஆண்டு ஏப்ரல்-டிசம்பரில், 82,446 மஹிந்திரா மூன்று சக்கர வாகனங்கள் விற்கப்பட்டு 28% சிறப்பான வளர்ச்சியை எட்டியுள்ளன.

நகர்ப்புற & சிறு நகர்ப்புற போக்குவரத்து அதிகரிப்பு மற்றும் எலெக்ட்ரிக் மூன்று சக்கர வாகன பயன்பாடு அதிகரித்ததே இதற்கு காரணம் ஆகும். மஹிந்திராவின் ஏற்றுமதியைப் பொறுத்தவரை, 2025 டிசம்பரில் 2,820 வாகனங்கள் ஏற்றுமதி உடன் 9% சரிவு காணப்பட்டாலும், 2025 ஏப்ரல்-டிசம்பரில் ஏற்றுமதி 25% அதிகரித்து 30,061 யூனிட்களை எட்டியுள்ளது.

டிரைவ்ஸ்பார்க் கருத்து: செப்டம்பரில், 1500சிசி-க்கு மேலான எஸ்யூவி கார்களுக்கான அரசு வரி குறைப்பு (50%லிருந்து 40% ஆக), டிசம்பரில் மஹிந்திராவின் எஸ்யூவி விற்பனையில் 23% உயர்வுக்கு முக்கியக் காரணம். மேலும், இதுவே கடந்த 2025ஆம் ஆண்டை மஹிந்திரா நேர்மறையான விற்பனை உடன் நிறைவு செய்ய முக்கிய காரணம் ஆகும். மஹிந்திராவை தொடர்ந்து மாருதி சுஸுகி (Maruti Suzuki), ஹூண்டாய் இந்தியா (Hyundai India) மற்றும் டாடா மோட்டார்ஸ் (Tata Motors) போன்ற முக்கியமான கார் நிறுவனங்கள் ஒன்றன்பின் ஒன்றாக தங்கள் விற்பனை புள்ளி விவரங்களை வெளியிட்டு வருகின்றன.