மாருதியில் இந்த காரை வாங்குவதற்கு 22 ஆயிரம் பேர் ஆர்வம்! ஆனா விலையுயர்ந்த காரை வாங்க ஒருத்தரும் வரல!

இந்தியாவின் முன்னணி கார் தயாரிப்பு நிறுவனமான மாருதி சுஸுகி (Maruti Suzuki), 2025ஆம் ஆண்டை சிறப்பாக நிறைவு செய்துள்ளது. கடந்த டிசம்பர் மாதத்தில், இந்த நிறுவனத்தின் விற்பனை 2024 டிசம்பரை விட 37% உயர்ந்துள்ளது. அதேபோல், 2025 நவம்பர் மாதத்துடன் ஒப்பிடுகையிலும் மாருதி கார்கள் விற்பனை 4% வளர்ச்சி பெற்றுள்ளது.

மாருதி சுஸுகியின் ஒட்டுமொத்த விற்பனை எண்ணிக்கை 1,78,646 யூனிட்டுகளாக பதிவாகியுள்ளது. இதன் மூலம் இந்திய வாகனச் சந்தையில் 44% பங்களிப்புடன் மாருதி முதலிடத்தில் நீடிக்கிறது. அதுவே சென்ற ஆண்டு டிசம்பரில் 1,30,115 மாருதி சுஸுகி கார்கள் மட்டுமே விற்பனையாகி இருந்தது. மேலும், 2025 நவம்பரில் விற்பனையான 1,70,971 யூனிட்டுகளை விட டிசம்பர் விற்பனை உயர்ந்துள்ளது.

இந்த வளர்ச்சியில் மாருதி சுஸுகி பலேனோ (Baleno) முக்கியப் பங்காற்றி, அந்த மாதத்தின் அதிகம் விற்பனையான மாடலாக முதலிடம் பிடித்துள்ளது. மாருதி பலேனோவின் கடந்த டிசம்பர் மாத விற்பனை எண்ணிக்கை 22,108 யூனிட்டுகளாக பதிவாகி உள்ளது. இது கடந்த ஆண்டு டிசம்பரில் விற்கப்பட்ட 9,112 பலேனோ கார்களை விட 143% அதிகம் ஆகும்.

2025 நவம்பரில் 13,784 பலேனோ கார்கள் விற்பனையான நிலையில், டிசம்பரில் 60% விற்பனை அதிகரிப்புடன் முதல் இடத்தைப் பிடித்துள்ளது. இதற்கு அடுத்தபடியாக, 20,706 யூனிட்டுகள் விற்பனை உடன் ஃப்ரான்க்ஸ் (Fronx) இரண்டாவது இடத்தைப் பிடித்துள்ளது. ஃப்ரான்க்ஸ் காரின் விற்பனை, கடந்த ஆண்டு டிசம்பரை (10,752 யூனிட்டுகள்) விட 93% வளர்ச்சியையும், நவம்பர் (15,058 யூனிட்டுகள்) மாதத்தை விட 38% வளர்ச்சியையும் கண்டுள்ளது.

முந்தைய மாதங்களில் அதிகம் விற்பனையான டிசையர் (Dzire) மற்றும் ஸ்விஃப்ட் (Swift) மாடல்கள், முறையே 3 மற்றும் 4 ஆம் இடங்களுக்கு சரிந்துள்ளன. 2025 டிசம்பரில், மாருதி டிசையர் 19,072 யூனிட்டுகள் விற்பனையுடன் 2024 டிசம்பரை விட 15% வளர்ச்சியைப் பதிவு செய்திருந்தாலும், 2025 நவம்பர் மாதத்துடன் ஒப்பிடுகையில் 10% சரிவைச் சந்தித்துள்ளது.

மாருதி சுஸுகி ஸ்விஃப்ட் 18,767 யூனிட்டுகள் விற்பனையாகி, 2024 டிசம்பரை விட 80% வளர்ச்சியைப் பெற்றாலும், 2025 நவம்பர் மாதத்துடன் ஒப்பிடுகையில் 5% சரிவடைந்துள்ளது. மாருதி சுஸுகி பிரெஸ்ஸா (Brezza) 17,704 யூனிட்டுகள் விற்பனையாகி, 2024 டிசம்பரை விட 2% வளர்ச்சியையும், 2025 நவம்பர் மாதத்தை விட 27% வளர்ச்சியையும் கண்டுள்ளது.

மாருதி சுஸுகி எர்டிகா (Ertiga) 16,586 யூனிட்டுகளுடன் இதற்கு முந்தைய ஆண்டு டிசம்பரை விட 3% வளர்ச்சியையும், 2025 நவம்பரை விட 2% வளர்ச்சியையும் கண்டுள்ளது. மாறாக, மாருதி சுஸுகி வேகன்ஆர் (WagonR) காரின் தேவை குறைந்தது. அதன் விற்பனை 16% சரிந்து 14,575 யூனிட்டுகளாக பதிவாகியுள்ளது.

ஈக்கோ (Eeco) வேன் 11,899 யூனிட்டுகள் விற்பனையாகி 2024 டிசம்பரை விட 2% வளர்ச்சி கண்டாலும், 2025 நவம்பரை விட 10% சரிவைச் சந்தித்துள்ளது. ஆல்டோ 10,829 யூனிட்டுகள் விற்பனையுடன் 46% ஆண்டுக்கு ஆண்டு வளர்ச்சியையும், 2% மாதாமாதம் வளர்ச்சியையும் பதிவு செய்துள்ளது. கிராண்ட் விட்டாரா கடந்த மாதத்தில் 8,597 யூனிட்டுகள் விற்பனையாகி, கடந்த ஆண்டை விட 21% உயர்வு கண்டுள்ளது. ஆனால், நவம்பர் மாதத்துடன் ஒப்பிடுகையில் 24% சரிவை எதிர்கொண்டுள்ளது.

டிரைவ்ஸ்பார்க் கருத்து: இவை இல்லாமல், 6,210 விக்டோரிஸ் கார்கள், 3,396 எஸ் பிரெஸ்ஸோ கார்கள், 2,744 எக்ஸ்.எல்6 கார்கள், 2,272 செலேரியோ கார்கள், 1,910 இக்னிஸ் கார்களையும் மாருதி சுஸுகி நிறுவனம் விற்பனை செய்துள்ளது. இவற்றுடன், பண்டிகை கால நவம்பர் மாதத்தை விட டிசம்பரில் அதிக கார்களை மாருதி சுஸுகி விற்பனை செய்துள்ளது. இருப்பினும், இந்த நிறுவனத்தின் விலையுயர்ந்த காரான சியாஸ் (Ciaz) கடந்த மாதத்தில் ஒரு யூனிட் கூட விற்பனையாகவில்லை.