ஃபேக்ட்ரியில் உருவாக்கிட்டு அப்படியே கப்பலில் ஏற்றிடுறாங்க! உள்ளூர் மாருதி ஷோரும்களுக்கு வருவது எல்லாம் கம்மி!

இந்தியாவின் முன்னணி கார் தயாரிப்பு நிறுவனமான மாருதி சுஸுகி, எலெக்ட்ரிக் கார் சந்தையில் தடம் பதித்த உடனேயே இத்தகைய புதிய மைல்கல்லை எட்டும் என்று யார் நினைத்திருப்பார்கள்? மாருதியின் முதல் எலெக்ட்ரிக் காரான 'இ-விட்டாரா' (e-Vitara) இந்தியாவிலும், சர்வதேச சந்தையிலும் விற்பனையில் புதிய சாதனைகளைப் படைத்து, அனைவரையும் ஆச்சரியத்தில் ஆழ்த்தி வருகிறது.

2026ஆம் ஆண்டின் முதல் ஐந்து மாதங்களிலேயே இந்திய உள்நாட்டுச் சந்தையில் இ-விட்டாரா காரின் மொத்த விநியோகம் (Wholesales) 7,000 யூனிட்களைக் கடந்து சாதனை படைத்துள்ளது. சரியாக சொல்ல வேண்டுமென்றால், 7,097 யூனிட்டுகள் ஆகும். கடந்த மே மாதத்தில் மட்டும் மாருதி சுஸுகி நிறுவனம் 1,439 இ-விட்டாரா எலெக்ட்ரிக் கார்களை நாடு முழுவதிலும் உள்ள தனது ஷோரூம்களுக்கு விற்பனைக்காக அனுப்பியுள்ளது.

இந்த ஆண்டின் முதல் ஐந்து மாதங்களிலேயே மார்ச் மாதத்தில்தான் அதிகபட்சமாக 2,254 யூனிட் இ-விட்டாரா கார்கள் ஷோரூம்களுக்கு விநியோகிக்கப்பட்டன என்பது குறிப்பிடத்தக்கது. ஜனவரி முதல் மே மாதம் வரையிலான காலகட்டத்தில், மாருதி சுஸுகி நிறுவனம் ஒட்டுமொத்தமாக 8,79,879 பயணிகள் வாகனங்களை விற்பனை செய்துள்ளது. இதில், இ-விட்டாராவின் பங்களிப்பு 0.80% ஆகும்.

அதுவே, இ-விட்டாரா போன்ற SUV, MPV கார்களின் ஒட்டுமொத்த விற்பனை எண்ணிக்கையில் ஏறக்குறைய 2% ஆகும். ஆண்டின் முதல் 5 மாதங்களில் 3,76,880 யூனிட் SUV, MPV கார்களை மாருதி சுஸுகி விற்பனை செய்துள்ளது. இதேபோல், ஷோரூம்கள் மூலம் வாடிக்கையாளர்களிடம் சென்றடைந்த சில்லறை விற்பனையிலும் (Retail sales) இ-விட்டாரா புதிய உச்சத்தைத் தொட்டுள்ளது.

Vahan தரவுகளின்படி, ஜனவரி முதல் மே வரை மொத்தம் 4,450 இ-விட்டாரா எலெக்ட்ரிக் கார்கள் வாடிக்கையாளர்களுக்கு டெலிவிரி செய்யப்பட்டுள்ளன. ஜனவரி மாதத்தில் வெறும் 224 யூனிட்டுகளுடன் தொடங்கிய இதன் சில்லறை விற்பனை, மாதந்தோறும் சீராக உயர்ந்து மே மாதத்தில் 1,658 யூனிட்டுகளை எட்டியுள்ளது. இருப்பினும், இந்திய சந்தையில் இ-விட்டாராவின் மாதாந்திர விற்பனை எண்ணிக்கை தற்போதைக்கு 2,000 யூனிட்டுகளுக்குள் மட்டுமே இருந்தாலும், உலகளாவிய சந்தைகளில் இருந்து இ-விட்டாரா காருக்கு அதீத ஆர்டர்கள் குவிகின்றன.

இதனால், வெளிநாட்டு ஏற்றுமதிக்காகவே இ-விட்டாராவின் பெரும்பான்மையான உற்பத்தி ஒதுக்கப்பட்டுள்ளது. எனினும், கடந்த மாதத்தில் மட்டும் இந்தியாவில் 4,000-க்கும் மேற்பட்ட புக்கிங்குகளை இந்த கார் பெற்றுள்ளதால், மாருதி சுஸுகி நிறுவனம் இந்த ஆகஸ்ட் அல்லது செப்டம்பர் மாதம் முதல் இதன் உற்பத்தியை அதிகரிக்கத் திட்டமிட்டுள்ளது.

கடந்த மே மாதத்தில் மாருதி சுஸுகி நிறுவனம் தனது வரலாற்றிலேயே இல்லாத அளவிற்கு அதிகபட்சமாக 79,267 SUV, MPV கார்களை தொழிற்சாலையில் உற்பத்தி ஷோரூம்களுக்கு அனுப்பி சாதனை படைத்துள்ளது. இதில் 2% பங்களிப்புடன் இ-விட்டாரா 7-வது இடத்தைப் பிடித்துள்ளது. இதுதொடர்பான மாருதி சுஸுகியின் கடந்த மாத உற்பத்தியின் விரிவான பட்டியல் இதோ:

மாருதியின் முதல் எலெக்ட்ரிக் காரான இ-விட்டாரா ஆனது ஹூண்டாய் கிரெட்டா எலக்ட்ரிக், மஹிந்திரா BE 6 மற்றும் டாடா கர்வ் EV ஆகிய முன்னணி எலெக்ட்ரிக் கார் மாடல்களுக்குக் கடும் சவாலாக விளங்குகிறது. மேலும், டொயோட்டாவுடன் இணைந்து உருவாக்கப்பட்டுள்ள இதன் பிரத்யேக பிளாட்பார்மைப் பகிர்ந்து கொண்டு வெளிவந்துள்ள டொயோட்டாவின் முதல் எலெக்ட்ரிக் காரான 'அர்பன் குரூஸர் எபெல்லா' (Urban Cruiser Ebella) கடந்த மே மாதத்தில் தனது முதல் விற்பனையாக 45 யூனிட்களைப் பதிவு செய்துள்ளது.

டிரைவ்ஸ்பார்க் கருத்து: இ-விட்டாரா கார் மூன்று வேரியண்ட்களில் கிடைக்கிறது. அவற்றின் எக்ஸ்-ஷோரூம் விலைகள் ரூ.15.99 லட்சம் முதல் ரூ.19.79 லட்சம் வரை நிர்ணயிக்கப்பட்டுள்ளன. அதேநேரம் பேட்டரி சந்தா திட்டத்திலும் இந்த கார் கிடைக்கிறது. இருப்பினும், கடந்த 5 மாதங்களில் உள்நாட்டில் விற்பனை செய்யப்பட்டதை காட்டிலும் 5 மடங்கு அதிகமான இ-விட்டாரா கார்கள் வெளிநாடுகளுக்கு ஏற்றுமதி செய்யப்பட்டுள்ளன.