Click it and Unblock the Notifications
புதிய ஹூண்டாய் பயோன் எஸ்யூவி இந்தியாவில் வெளியீடு... நவீன யுக அம்சங்களுடன் அசத்தல்!!
புதிய கார் வாங்கத் திட்டமிடுபவர்களைக் கவரும் வகையில், ஹூண்டாய் மோட்டார் இந்தியா நிறுவனம் தனது புதிய பயோன் (BAYON) எஸ்யூவியின் இந்தியாவுக்கான மாடலை வெளியிட்டுள்ளது. நவீன தொழில்நுட்பம், மேம்பட்ட இணைப்பு வசதிகள், டிஜிட்டல் திரைகள் எனப் பல சிறப்பம்சங்களுடன் வரும் இந்தக் கார் அக்டோபர் 26ஆம் தேதி இந்தியாவில் விற்பனைக்கு அறிமுகமாக உள்ளது. இந்த காரின் டிசைன் எல்லோரையும் கவரும் வகையில் சிறப்பாக வடிவமைக்கப்பட்டு உள்ளது.
பயணிகளின் அன்றாடத் தேவைகளை எளிமையாக்கும் வகையில் உருவாக்கப்பட்ட செயற்கை நுண்ணறிவு தொழில்நுட்பம் இந்த காரின் முக்கிய சிறப்பம்சமாக உள்ளது. வழக்கமான எஸ்யூவி வசதிகளுடன் மட்டுமல்லாமல், இயல்பான உரையாடல்களைப் புரிந்துகொள்ளும் குரல் உதவியாளர், மேம்பட்ட வழிகாட்டி வசதி மற்றும் ஏர் அப்டேட் ஆகிய ஏராளமான நவீன யுக தொழில்நுட்ப அம்சங்களை ஹூண்டாய் இந்த காரில் வழங்கியுள்ளது.
AI அசிஸ்டென்ட்
புதிய பயோன் காரில் ஹூண்டாய் மோட்டார் இந்தியா நிறுவனம் முதன்முறையாக உருவாக்கியுள்ள ஜெனரேட்டிவ் ஏஐ குரல் உதவியாளர் வசதி இடம்பெறுகிறது. பெர்ப்ளெக்சிட்டியின் (Perplexity) செயற்கை நுண்ணறிவு தொழில்நுட்பம் மற்றும் சவுண்ட்ஹவுண்ட் ஏஐ (SoundHound AI) நிறுவனத்தின் குரல் தொழில்நுட்பம் இணைந்து இந்த வசதியை வழங்குகின்றன. இதன்மூலம் ஓட்டுனர்கள் இயல்பான உரையாடல் முறையில் கேள்விகளைக் கேட்கலாம்.
உதாரணமாக, நீண்ட தூரப் பயணத்திற்கான திட்டத்தை உருவாக்குவது, செல்லும் இடத்தின் வானிலை நிலவரத்தை அறிந்துகொள்வது, அருகிலுள்ள உணவகங்கள் மற்றும் தங்கும் விடுதிகளைத் தேடுவது போன்ற உதவிகளைப் பெற முடியும். வழக்கமான குரல் கட்டளைகளைத் தாண்டி, பயனர்களின் கேள்விகளைப் புரிந்துகொண்டு பதிலளிப்பதே இந்த வசதியின் முக்கிய சிறப்பாக இருக்கும்.
இரண்டு பெரிய டிஜிட்டல் திரைகள்
காரின் உட்புறத்தில் 12.3 அங்குல அளவிலான இரண்டு வளைந்த டிஜிட்டல் திரைகள் கொடுக்கப்பட்டுள்ளன. இதில் ஒன்று இன்ஃபோடெயின்மென்ட் வசதிகளுக்கும் மற்றொன்று டிஜிட்டல் இன்ஸ்ட்ரூமென்ட் கிளஸ்டருக்கும் பயன்படுகிறது. இவை இரண்டும் இணைந்து நவீன டிஜிட்டல் அனுபவத்தை வழங்குகின்றன. என்விடியா (NVIDIA) தொழில்நுட்பத்தின் உதவியுடன் இயங்கும் கனெக்டட் கார் நேவிகேஷன் காக்பிட் (ccNC) வசதி, வழிகாட்டி அமைப்பு, மொபைல்போனுடன் இணைக்கப்பட்ட சேவைகள் மற்றும் எளிமையான கட்டுப்பாடுகளை ஒருங்கிணைக்கும் வகையில் இது செயல்படும்.
புளூலிங் ஆப்
ஹூண்டாய் புளூலிங்க் (Bluelink) தொழில்நுட்பத்தின் கீழ் 70-க்கும் மேற்பட்ட இணைப்பு வசதிகள் பயோன் காரில் வழங்கப்படுகின்றன. காரைத் தொலைவிலிருந்து கட்டுப்படுத்துதல், வாகனத்தின் தகவல்களைப் பெறுதல், வழிகாட்டி வசதிகள் மற்றும் பாதுகாப்பு தொடர்பான அம்சங்கள் இதில் அடங்கும். ஸ்மார்ட்போன் மற்றும் ஸ்மார்ட்வாட்ச் இணைப்பும் வழங்கப்படுகிறது.
மேலும், காரில் உள்ள 19 கட்டுப்பாட்டு அமைப்புகள் வரை ஓவர்-தி-ஏர் (OTA) மென்பொருள் அப்டேட்டுகளை பெறும் வகையில் வடிவமைக்கப்பட்டுள்ளன. இதனால் குறிப்பிட்ட மென்பொருள் மேம்படுத்தும் பணிகளை பெறுவதற்கு சர்வீஸ் மையத்திற்குச் செல்ல வேண்டிய அவசியம் இருக்காது. இந்தியாவின் மொழிப் பன்மையை கருத்தில் கொண்டு, 10 இந்திய மொழிகள் மற்றும் இரண்டு சர்வதேச மொழிகளுக்கான வாய்ஸ் அசிஸ்ட் வசதியும் வழங்கப்படுகிறது.
எஞ்சின்
ஹூண்டாய் பயோன் காரில் நான்கு சிலிண்டர்கள் கொண்ட 1.5 லிட்டர் எம்பிஐ பெட்ரோல் எஞ்சின் இடம்பெறுகிறது. இந்த எஞ்சின் அதிகபட்சமாக 115 எச்பி பவரையும் 144 என்எம் டார்க்கையும் வெளிப்படுத்துகிறது. இதனுடன் 6 ஸ்பீடு மேனுவல் கியர்பாக்ஸ் அல்லது ஐவிடி (IVT) ஆட்டோமேட்டிக் கியர்பாக்ஸ் தேர்வுகள் வழங்கப்படுகின்றன.
புக்கிங் துவங்கியது
புதிய ஹூண்டாய் பயோன் எஸ்யூவி இந்தியாவில் வரும் 26ந் தேதி அதிகாரப்பூர்வமாக அறிமுகமாகிறது. இதற்கான முன்பதிவு ஹூண்டாய் டீலர்ஷிப்கள் மற்றும் நிறுவனத்தின் அதிகாரப்பூர்வ இணையதளத்தில் ரூ.11,000 முன்பணத்துடன் நடைபெறுகிறது. பண்டிகைக் காலத்தில் வாடிக்கையாளர்களுக்கு டெலிவரி தொடங்கும் என ஹூண்டாய் தெரிவித்துள்ளது.
இந்தக் காரின் விலை மற்றும் முழுமையான வேரியண்ட் விபரங்கள் வரும் 26ந் தேதி அறிமுகத்தின்போது அறிவிக்கப்படும். தொழில்நுட்ப வசதிகளுக்கு முக்கியத்துவம் அளிக்கும் வாடிக்கையாளர்களைக் குறிவைத்து பயோன் உருவாக்கப்பட்டுள்ளது. ஹூண்டாய் வென்யூ மற்றும் கிரெட்டா கார்களுக்கு இடையிலான விலையில் இந்த கார் ரூ.9 லட்சம் முதல் ரூ.10 லட்சம் இடையிலான ஆரம்ப எக்ஸ்ஷோரூம் விலையில் எதிர்பார்க்கப்படுகிறது.
Continue with Google
