ஒட்டுமொத்த நாடே எதிர்பார்க்கும் இரு எஸ்யூவி கார்கள்... இந்த 2026 முடிவதற்குள் ஒன்று விற்பனைக்கு வந்துடும்!

பனி படர்ந்த மணாலி மலைப்பாதைகளில் இரண்டு அட்டகாசமான புதிய எஸ்யூவி கார்கள் ஒன்றாக வலம் வந்துள்ளன. அவை கியா மற்றும் ஹூண்டாய் நிறுவனங்களின் அடுத்த தலைமுறை தயாரிப்புகள் ஆகும். இந்தியாவிற்காக இவை தயார் செய்யப்பட்டு வருகின்றன. அமர்த்யாஜித் சின்ஹா என்பவரால் மணாலியில் ரகசியமாகப் படம் பிடிக்கப்பட்ட (Spy shots) இந்த கார்கள், புதிய 2027 கியா சொனெட் (Kia Sonet) மற்றும் புதிய தலைமுறை ஹூண்டாய் கிரெட்டா (Hyundai Creta) ஆகும். இவை இரண்டும் மிகக் கடுமையான தட்பவெப்ப சூழ்நிலைகளில் ஒன்றாகச் சோதனை செய்யப்படுவது, ஆட்டோமொபைல் உலகில் பெரும் எதிர்பார்ப்பைக் கிளப்பியுள்ளது!

புதிய 2027 கியா சொனெட்: டிசைனில் என்ன ஸ்பெஷல்?
தற்போது சோதனை செய்யப்பட்டிருக்கும் சொனெட் மாடலானது, தனது புதிய டிசைன் அமைப்பை மெல்ல மெல்ல வெளிப்படுத்தத் தொடங்கியுள்ளது. தடிமனான மறைப்புகளுக்கு மத்தியிலும், இதன் பின்புறத்தில் உள்ள செங்குத்தான LED டெயில் லைட் மற்றும் காரின் முழு அகலத்திற்கும் செல்லும் லைட் பார் ஆகியவை மிக நேர்த்தியாகக் காட்சியளிக்கின்றன. வெளிநாட்டு சந்தைகளில் உள்ள கியாவின் நவீன டிசைன் மொழியைப் பிரதிபலிக்கும் வகையில் இது வடிவமைக்கப்பட்டுள்ளது.

மேலும், இதன் பின்பகுதி சதுர வடிவிலும், கூரை தட்டையாகவும் மாற்றப்பட்டுள்ளது. இதனால் காருக்குள் கூடுதல் இடவசதி கிடைப்பதுடன், சாலையில் செல்லும்போது கம்பீரமான தோற்றத்தையும் தரும். முக்கியமாக, புதிய சொனெட் கியாவின் மேம்படுத்தப்பட்ட புதிய 'K1 பிளாட்ஃபார்ம்' அடிப்படையில் உருவாக்கப்பட உள்ளதால், இதன் பாதுகாப்பு மற்றும் கட்டமைப்பு தரம் பாரத் NCAP சோதனையில் மிகச் சிறந்த ரேட்டிங்கைப் பெறும் என எதிர்பார்க்கப்படுகிறது.

தொழிற்நுட்ப வசதிகளைப் பொறுத்தவரை, பெரிய டிஸ்ப்ளேக்கள், மேம்படுத்தப்பட்ட அடாஸ் (ADAS) பாதுகாப்பு தொழில்நுட்பம் மற்றும் OTA அப்டேட்களை ஆதரிக்கும் நவீன எலக்ட்ரானிக் சிஸ்டம்கள் இதில் இடம்பெறலாம். என்ஜின் ஆப்ஷன்களில் பெரிய மாற்றங்கள் இருக்காது என்றே தெரிகிறது; தற்போதைய 1.2 லிட்டர் பெட்ரோல், 1.0 லிட்டர் டர்போ பெட்ரோல் மற்றும் 1.5 லிட்டர் டீசல் என்ஜின்களே தொடர வாய்ப்புள்ளது.

புதிய தலைமுறை ஹூண்டாய் கிரெட்டா: பவர்ஃபுல் மாற்றங்கள்!
மணாலியில் தற்போது சொனெட் காருடன் சோதனை செய்யப்பட்ட மற்றொரு காரான மூன்றாம் தலைமுறை ஹூண்டாய் கிரெட்டாவும் அனைவரின் கவனத்தையும் ஈர்த்துள்ளது. தற்போதைய மாடலை விட இது சுமார் 100மிமீ கூடுதல் நீளமாகவும், அகலமாகவும், பாக்ஸி (Boxier) ஸ்டைலிலும் வடிவமைக்கப்பட்டுள்ளது பார்ப்பதற்கே பிரம்மாண்டமாக உள்ளது.

இந்த புதிய கிரெட்டாவில் மிக முக்கியமான மாற்றம் என்னவென்றால், இதன் டேஷ்போர்டில் வரவிருக்கும் 'Pleos Connect' இன்ஃபோடெயின்மென்ட் டேப்லெட் ஸ்கிரீன் தான். நீளமான இரட்டைத் திரைகளுக்குப் பதிலாக, நடுவில் பொருத்தப்படும் இந்த பெரிய தனியொரு ஸ்கிரீன் காரின் தொழில்நுட்பத்தை அடுத்த கட்டத்திற்கு எடுத்துச் செல்லும். அதேநேரம், அத்தியாவசிய பட்டன்கள் கைகளால் இயக்கும் வகையிலேயே இருக்கும் என்பது காரை ஓட்டும்போது கூடுதல் வசதியைத் தரும்.

தொழிற்நுட்ப ரீதியாக, சர்வதேச கிரெட்டா காரில் 19 அங்குல சக்கரங்கள் காணப்பட்டாலும், இந்திய மாடல் அதே பழைய அளவிலான சக்கரங்களுடன் கியா செல்டோஸின் அலாய் வீல் டிசைனைப் பெற்று வரலாம். மேலும், இந்த புதிய மாடலில் மல்டி-லிங்க் ரியர் சஸ்பென்ஷன் (Multi-link rear suspension) வழங்கப்படவுள்ளது உறுதி செய்யப்பட்டுள்ளது.

இதனால் கரடுமுரடான சாலைகளிலும் பயணத்தின்போது காரின் சொகுசுத்தன்மை பல மடங்கு அதிகமாக இருக்கும். எலக்ட்ரிக் காரிலிருந்து ஈர்க்கப்பட்ட 'ஷிஃப்ட் பை ஒயர்' (Shift by wire) கியர் செலக்டர் மற்றும் லெவல் 2+ ADAS பாதுகாப்பு வசதிகளும் இதில் வழங்கப்பட உள்ளன.

மிக முக்கியமாக, இந்திய சந்தைக்காக புதிய கிரெட்டாவில் ஹைபிரிட் (Hybrid) என்ஜின் ஆப்ஷன் அறிமுகம் செய்யப்படலாம் என்கிற செய்தி அதன் ரசிகர்களுக்குப் பெரும் ஆச்சரியத்தை ஏற்படுத்தியுள்ளது. கிரெட்டா எலக்ட்ரிக் (Creta EV) மாடலிலும் மாற்றங்கள் செய்யப்பட்டு, அதில் தற்போதைய NMC பேட்டரிக்கு பதிலாக அதிக செயல்திறன் கொண்ட LFP பேட்டரி பேக் பயன்படுத்தப்படலாம் என்றும் தகவல்கள் வெளியாகி வருகின்றன.

டிரைவ்ஸ்பார்க் கருத்து: இந்த இரண்டு சூப்பர் எஸ்யூவி கார்களும் எப்போது விற்பனைக்கு வரும் என்கிற ஆர்வம் இப்போதே பலரை தொற்றிக் கொள்ள ஆரம்பித்துள்ளது. புதிய தலைமுறை ஹூண்டாய் கிரெட்டா இந்த ஆண்டின் பிற்பகுதியில் அறிமுகமாகலாம் என்று எதிர்பார்க்கப்படுகிறது. ஆனால், புத்தம் புதிய கியா சொனெட்டைச் சாலையில் பார்க்க நாம் 2027 வரை காத்திருக்க வேண்டும். இமயமலையின் மிகக் கடுமையான உயரமான பகுதிகளில் இப்போதே தீவிர சோதனை செய்யப்பட்டு வருவதால், இந்த கார்கள் இந்திய சாலைகளுக்கு வரும்போது வேற லெவல் அனுபவத்தைத் தருவது உறுதி!