பக்காவா முழு மறைப்புடன் இரவில் சுற்றி திரிந்த கார்! யாருக்கும் தெரியாமல் போய்ட முடியுமா... ஸ்பை படங்கள்!

இந்திய சாலைகளில் புதிய கார்களின் சோதனை ஓட்டங்கள் எப்போதுமே மிகுந்த எதிர்பார்ப்பை உருவாக்குகின்றன. அந்த வகையில், ஜே.எஸ்.டபிள்யூ எம்ஜி மோட்டார் இந்தியா (JSW MG Motor India) நிறுவனத்தின் புதிய எஸ்யூவி (SUV) ரக கார் ஒன்று முதன்முறையாக சோதனை ஓட்டத்தின்போது அடையாளம் காணப்பட்டுள்ளது. இது விரைவில் புதிய எம்ஜி கார் ஒன்று வெளியாக உள்ளதற்கான தெளிவான அறிகுறியாகும்.

இந்த எஸ்யூவி 'எம்ஜி ஸ்டார்லைட் 560' (Starlight 560) என அழைக்கப்படும் என எதிர்பார்க்கப்படுகிறது. இந்த சோதனை கார் குஜராத்தின் வதோதரா அருகே, எம்ஜி-யின் ஹலோல் உற்பத்தி ஆலைக்கு அருகில் சாலை சோதனையில் ஈடுபடுத்தப்பட்டு இருந்தது. சிவப்பு நிறத்தில் தற்காலிக வாகனப் பதிவு எண்களைக் கொண்டிருந்த இது, உற்பத்தி நிறுவனத்தின் அதிகாரபூர்வ சோதனை வாகனம் என்பதைக் குறிக்கிறது.

மேலும் இது, இந்திய அளவில் ஸ்டார்லைட் 560 காருக்கான சாலை சோதனைகள் தீவிரமாகத் தொடங்கியுள்ளதை உறுதிப்படுத்துகிறது. இந்த சோதனை ஓட்டத்தில் முழுமையான மறைப்பிற்கு மத்தியிலும், ஸ்டார்லைட் 560 சில தனித்துவமான அம்சங்களுடன் காட்சியளிக்கிறது. நேர்த்தியான மற்றும் உயரமான எஸ்யூவி வடிவம், விசாலமான தோற்றத்துடன் பெட்டி போன்ற உடலமைப்பு, மெல்லியதான விளக்குகளுடன் இரண்டாக பிரிக்கப்பட்ட ஸ்டைலில் ஹெட்லேம்ப் வடிவமைப்பு இதில் அடங்கும்.

மேலும், பெரிய அலாய் சக்கரங்கள், காரின் முழு அகலத்திற்கு எல்இடி டெயில் லேம்ப்கள் மற்றும் பக்கவாட்டில் அகலமான ஷோல்டர் லைன் போன்றவையும் காணப்படுகின்றன. பரிமாண அளவு அடிப்படையில், ஸ்டார்லைட் 560 வழக்கமான மிட்-சைஸ் எஸ்யூவி கார்களை விட பெரியதாகத் தெரிகிறது. இது, பிரீமியம் தரத்திலான எஸ்யூவி கார்களுடன் நேரடியாகப் போட்டியிடும்.

ஸ்டார்லைட் 560, எம்ஜி-யின் நெகிழ்வான எஃப்150 பிளாட்ஃபார்மில் கட்டமைக்கப்படும் என்று எதிர்பார்க்கப்படுகிறது. இந்த தளம் பல பவர்ட்ரெயின் ஆப்ஷன்களை ஆதரிப்பதால், இது இந்தியச் சந்தைக்கு மிகவும் ஏற்றதாக உள்ளது. எம்ஜி இதில் இரண்டு கார்களை அறிமுகப்படுத்தக்கூடும். ஒன்று, முழுமையான எலெக்ட்ரிக் மாடல் மற்றும் மற்றொன்று பிளக்-இன் ஹைப்ரிட் (Plug-in Hybrid) மாடல் ஆகும்.

இந்தியாவிற்கு, பிளக்-இன் ஹைப்ரிட் மாடல் முக்கியத்துவம் பெறும் என எதிர்பார்க்கப்படுகிறது. இன்னும் சொல்லப் போனால், தற்போது சோதனை ஓட்டத்தின்போது அடையாளம் காணப்பட்டு இருப்பது கூட பிளக்-இன் ஹைப்ரிட் ஸ்டார்லைட் 560 காராகவே இருக்கும். உலகளாவிய தகவல்களின்படி, இந்த ஹைப்ரிட் கார் சுமார் 197 பிஎச்பி பவரையும், 230 என்.எம் டார்க் திறனையும் வெளியிடக்கூடியது ஆகும்.

இது அன்றாட பயன்பாட்டிற்கான செயல்திறனுக்கும், நெடுஞ்சாலை பயணங்களுக்கான ஆற்றலுக்கும் இடையே சமநிலையை வழங்கும். இந்த ஹைப்ரிட் காரில், நகரத்தில் பயணிப்பதற்கு முழுமையாக எலெக்ட்ரிக்கில் இயங்குவது பயனுள்ளதாக இருக்கும். மேலும் நீண்ட தூரப் பயணங்களுக்கு என்ஜின் ஆதரவு அளிக்கும். மஹிந்திரா எக்ஸ்யூவி 7எக்ஸ்ஓ (Mahindra XUV 7XO), டாடா ஹாரியர் (Tata Harrier) மற்றும் ஹூண்டாய் அல்கசார் (Hyundai Alcazar) போன்ற பிரபலமான மிட்-சைஸ் எஸ்யூவி கார்களுக்கு இது போட்டியாக அமையலாம்.

டிரைவ்ஸ்பார்க் கருத்து: ஜேஎஸ்டபிள்யூ எம்ஜி மோட்டார் நிறுவனம் தனது எதிர்கால கார்கள் விற்பனையில் 75-80% புதிய எரிசக்தி வாகனங்களில் (NEVs) இருந்து வரும் என்று எதிர்பார்க்கிறது. அதாவது, வழக்கமான பெட்ரோல், டீசல் அல்லாத கார்களில் இருந்து. சோதனை இப்போது நடைபெற்று வருவதால், 2026ஆம் ஆண்டின் பிற்பகுதியில் ஸ்டார்லைட் 560 ஹைப்ரிட் காரின் வெளியீட்டை எதிர்பார்க்கிறோம். ஹலோல் ஆலையில் நடைபெறும் மேம்பாட்டுப் பணிகளுடன், குறைவான விலையை உறுதிப்படுத்த இது உள்நாட்டிலேயே அசெம்பிள் (Assemble) செய்யப்படும் என்று எதிர்பார்க்கப்படுகிறது.