Click it and Unblock the Notifications
ஃப்ரீ, ஃப்ரீ, ஃப்ரீ... நிஸான் மேக்னைட், கிராவைட் கார்களுக்கு ரூ.86,000 சிஎன்ஜி கிட் முற்றிலும் ஃப்ரீ!
பண்டிகைக் காலத்தில் கார் வாங்கத் திட்டமிடுபவர்களுக்கு நிஸான் மோட்டார் இந்தியா நிறுவனம் அதிரடி ஆஃபரை அறிவித்துள்ளது. தனது மேக்னைட் மற்றும் கிராவைட் கார்களின் தேர்ந்தெடுக்கப்பட்ட வேரியண்ட்டுகளுக்கு அரசு அங்கீகரித்த சிஎன்ஜி கிட்டுகளை இலவசமாக வழங்குகிறது.
பெட்ரோல் விலையில் ஏற்படும் மாற்றங்களால் வாகனத்தின் பராமரிப்புச் செலவு அதிகரித்து வருகிறது. இதைக் கருத்தில் கொண்டு, சிஎன்ஜி வசதியை கூடுதல் செலவின்றி வழங்குவதன் மூலம் வாடிக்கையாளர்களைக் கவர நிஸான் திட்டமிட்டுள்ளது. இந்தச் சலுகை வரும் 16ந் தேதி வரை மட்டுமே கிடைக்கும் என்று தெரிவிக்கப்பட்டு இருக்கிறது.
சிஎன்ஜி கிட் இலவசம்
நிஸான் மேக்னைட் காருக்கு பொருத்தப்படும் அரசு அங்கீகரித்த சிஎன்ஜி கிட் வழக்கமாக ரூ.74,999 விலையில் விற்பனை செய்யப்படுகிறது. தற்போது குறிப்பிட்ட வேரியண்ட்டுகளை வாங்குபவர்களுக்கு இந்த கிட் இலவசமாக வழங்கப்படுவதால், கணிசமான தொகையைச் சேமிக்க முடியும்.
மேக்னைட் காரின் டர்போ அல்லாத பெட்ரோல் வேரியண்ட்டுகளுக்கு இந்தச் சலுகை பொருந்தும். இருப்பினும், விஸியா எம்டி, விஸியா ஈஸி ஷிப்ட் மற்றும் விஸியா பிளஸ் எம்டி ஆகிய வேரியண்ட்களுக்கு இந்தச் சலுகை கிடையாது. எனவே முன்பதிவுக்கு முன்பாக வேரியண்ட் விவரங்களை உறுதிப்படுத்துவது அவசியம்.
கிராவைட் கார் சலுகை விபரம்
நிஸான் கிராவைட் 7 இருக்கைகள் கொண்ட எம்பிவி கார் மாடலாக விற்பனையில் உள்ளது. இதற்கான அரசு அங்கீகரித்த சிஎன்ஜி கிட் வழக்கமாக ரூ.85,999 விலையில் கிடைக்கிறது. தற்போது தேர்ந்தெடுக்கப்பட்ட டெக்னா வேரியண்ட்டுகளை வாங்குபவர்களுக்கு இந்த கிட் இலவசமாக வழங்கப்படுகிறது.
கிராவைட் காரில் இரண்டு 25 லிட்டர் கொள்ளளவு கொண்ட சிலிண்டர்கள் பொருத்தப்படுகின்றன. இந்த அமைப்பு மூன்றாவது வரிசை இருக்கைகளின் பயன்பாட்டைத் தொடர்ந்து வழங்கும் வகையில் வடிவமைக்கப்பட்டுள்ளது. பெரிய குடும்பத்தினருக்கு ஏற்ற இந்த காரில் சிஎன்ஜி வசதியும் கிடைப்பது கூடுதல் சிறப்பாகும்.
3 ஆண்டுகள் வாரண்டி
மேக்னைட் மற்றும் கிராவைட் கார்களில் பொருத்தப்படும் சிஎன்ஜி கிட்டுகளுக்கு மூன்றாம் தரப்பு நிறுவனத்தின் மூலம் மூன்று ஆண்டுகள் அல்லது ஒரு லட்சம் கிலோமீட்டர் வரை வாரண்டி வழங்கப்படுகிறது. இதில் எது முதலில் நிறைவடைகிறதோ அதுவே பொருந்தும். இந்த வாரண்டி காரின் வழக்கமான வாரண்டிக்கு கூடுதலாக வழங்கப்படுகிறது.
அரசு அங்கீகாரம் பெற்ற கிட்டுகள் என்பதால், வாடிக்கையாளர்கள் அங்கீகரிக்கப்பட்ட நிஸான் டீலர்கள் மூலமாகவே இதனைப் பெற முடியும். இதனால் பாதுகாப்பு மற்றும் பராமரிப்பு தொடர்பான நம்பகத்தன்மையும் அதிகரிக்கிறது.
வேறு சலுகைகள் இல்லை
இந்தப் பண்டிகைக் கால அறிவிப்பில் மேக்னைட் மற்றும் கிராவைட் கார்களுக்கு இலவச சிஎன்ஜி கிட் மட்டுமே கூடுதல் சலுகையாக அறிவிக்கப்பட்டுள்ளது. மற்ற பணத் தள்ளுபடிகள் அல்லது கூடுதல் சலுகைகள் எதுவும் தற்போது அறிவிக்கப்படவில்லை.
சிஎன்ஜி வசதியைத் தேர்வு செய்யும் வாடிக்கையாளர்கள் நீண்ட காலத்தில் எரிபொருள் செலவைக் குறைக்க முடியும். குறிப்பாக தினசரி அதிக தூரம் பயணிப்பவர்களுக்கு இது பயனுள்ளதாக இருக்கும். இந்தச் சலுகையைப் பயன்படுத்த விரும்புவோர் நவம்பர் 16ம் தேதிக்குள் முன்பதிவு செய்வது நல்லது.
Continue with Google
