Click it and Unblock the Notifications
எலெக்ட்ரிக் காராக மாற்றப்பட்ட 17 ஆண்டுகள் பழைய மாருதி வேகன் ஆர்... செலவு ரூ.2.25 லட்சம் மட்டுமே!!
புதிய எலெக்ட்ரிக் காரை வாங்க வேண்டும் என்றால் பல லட்சம் ரூபாய் செலவழிக்க வேண்டியிருக்கிறது. ஆனால், ஏற்கெனவே பயன்படுத்தி வரும் பெட்ரோல் காரையே மின்சார காராக மாற்ற முடிந்தால் எப்படி இருக்கும்? மத்தியப் பிரதேசத்தில் 2009-ம் ஆண்டு தயாரிக்கப்பட்ட மாருதி வேகன் ஆர் கார், ரூ.2.25 லட்சம் செலவில் எலெக்ட்ரிக் காராக மாற்றப்பட்டுள்ளது.
இந்தியாவில் மிகவும் பிரபலமான குடும்ப பயன்பாட்டு கார்களில் ஒன்றான மாருதி வேகன் ஆர் கடந்த 1999-ம் ஆண்டு அறிமுகமானது. இந்த கார் பெட்ரோல் மற்றும் சிஎன்ஜி தேர்வுகளில் கிடைக்கும் நிலையில், ஒரு பழைய வேகன் ஆர் காரை பேட்டரியில் இயங்கும் வகையில் மாற்றி இருப்பது எல்லோரின் கவனத்தையும் ஈர்த்துள்ளது. இந்த மாற்றம் எப்படிச் செய்யப்பட்டது, காரின் வேகம் மற்றும் பயணிக்கும் தூரம் எவ்வளவு என்பதைப் பார்க்கலாம்.
பெட்ரோல் எஞ்சின் மாற்றம்
மத்திய பிரதேச மாநிலம் போபாலில் செயல்படும் ஸ்ரியான் எலெக்ட்ரிக் வெஹிக்கிள் நிறுவனம் பழைய வேகன் ஆர் காரை எலெக்ட்ரிக் மாடலாக மாற்றி உள்ளது. இதற்காக காரில் இருந்த பெட்ரோல் எஞ்சின், எரிபொருள் டேங்க் மற்றும் எக்ஸாஸ்ட் அமைப்பு உள்ளிட்ட பாகங்கள் அகற்றப்பட்டன. பின்னர், மின்சார மோட்டார் மற்றும் பேட்டரியைப் பொருத்துவதற்கான மாற்றங்கள் செய்யப்பட்டன.
கியர்பாக்ஸ்
இந்த காரில் புதிய டிரான்ஸ்மிஷன் அமைப்பைப் பொருத்துவதற்குப் பதிலாக, ஏற்கெனவே இருந்த மேனுவல் கியர்பாக்ஸ் பயன்படுத்தியுள்ளனர். மின்மோட்டாருடன் அதை இணைப்பதற்காகப் பிரத்யேக பாகங்கள் தயாரிக்கப்பட்டுள்ளன. பழைய கிளட்ச் மற்றும் ஃப்ளைவீல் ஆகியவற்றையும் தொடர்ந்து பயன்படுத்தும் வகையில் மாற்றங்கள் செய்யப்பட்டுள்ளன.
ஏசி வசதி
மின்சார மோட்டாருக்கு மாறிய பிறகு, காரின் ஏர் கண்டிஷனிங் வசதியை இயக்குவதற்கும் தனி மின்மோட்டார் பொருத்தப்பட்டது. இதற்காக, மின்சார ரிக்ஷாக்களில் பயன்படுத்தப்படும் 1,000 வாட் மோட்டார் தனியாக பொருத்தப்பட்டுள்ளது. இதன் மூலம் ஏசி கம்ப்ரசரைத் தனியாக இயக்கும் வாய்ப்பு கிடைத்துள்ளது.
பேட்டரி மற்றும் சார்ஜிங் வசதி
காரின் முன்பகுதியில் உள்ள எஞ்சின் அறையில் பேட்டரி மற்றும் மின்சார மோட்டார் பொருத்தப்பட்டுள்ளன. மின்சார இணைப்புகள் முறையாக அமைக்கப்பட்டுள்ளன. மேலும், வழக்கமான எரிபொருள் நிரப்பும் மூடியின் பகுதியில் 16 ஆம்பியர் மின் இணைப்பை வழங்கும் சார்ஜிங் போர்ட் அமைக்கப்பட்டுள்ளது.
டாப் ஸ்பீடு
எலெக்ட்ரிக் மாடலாக மாற்றப்பட்ட பிறகு, இந்த எலெக்ட்ரிக் வேகன் ஆர் காரின் அதிகபட்ச வேகம் மணிக்கு 75 கிமீ வேகம் வரை சென்றதாக தெரிவிக்கப்பட்டுள்ளது. ஒருமுறை முழுமையாக சார்ஜ் செய்தால் 100 முதல் 110 கிமீ வரை பயணிக்க முடியும் என்றும் கூறப்படுகிறது. நகரப் பகுதிகளில் தினமும் குறைந்த தூரம் பயணிப்பவர்களுக்கு இந்த அளவிலான செயல்திறன் பயனுள்ளதாக இருக்கலாம்.
கம்மி பட்ஜெட் EV
புதிய EV கார்கள் பல லட்ச ரூபாய் விலையில் இருக்கும் நிலையில், இந்த வேகன் ஆர் காரை மின்சார வாகனமாக மாற்றுவதற்கான செலவு ரூ.2.25 லட்சம் மட்டுமே என தெரிவித்துள்ளனர். இதுபோன்று பழைய காரை மின்சார வாகனமாக மாற்றுவதற்கு முன்பாக பேட்டரியின் பாதுகாப்பு, பிரேக்கிங் அமைப்பு, மின்சார இணைப்புகள் மற்றும் காரின் ஒட்டுமொத்த நிலை ஆகியவற்றை நிபுணர்கள் மூலம் ஆய்வு செய்வது அவசியம். மேலும், பொதுச் சாலைகளில் பயன்படுத்துவதற்கான சட்டப்பூர்வ அனுமதி, வாகனப் பதிவு மற்றும் தேவையான சான்றிதழ்கள் குறித்தும் சம்பந்தப்பட்ட போக்குவரத்துத் துறையிடம் உறுதிப்படுத்த வேண்டும்.
டிரைவ்ஸ்பார்க் கருத்து
புதிய எலெக்ட்ரிக் காரை வாங்குவதற்குப் பதிலாக, பழைய காரை மின்சார வாகனமாக மாற்றுவது நல்ல முயற்சியாகவே பார்க்க முடியும். இருப்பினும், குறைவான மாற்றுச் செலவு மட்டுமே முடிவெடுப்பதற்கான அடிப்படையாக இருக்கக்கூடாது. பயணிகளின் பாதுகாப்பு, சட்ட அனுமதி, பேட்டரியின் ஆயுள் மற்றும் நீண்டகால பராமரிப்புச் செலவுகளை முழுமையாக ஆராய்ந்த பிறகே இத்தகைய மாற்றத்தைத் தேர்வு செய்வது சரியாக இருக்கும்.
Continue with Google
