மொத்தமா மறைச்சிக்கிட்டு போனா மட்டும் தெரியாதா... 13 லட்ச ரூபாயில் அறிமுகமாகும் கார் சென்னை சாலைகளில்!

பிரெஞ்சு கார் தயாரிப்பு நிறுவனமான ரெனால்ட் (Renault), விரைவில் புதிய தலைமுறை டஸ்டர் (Duster) எஸ்யூவி (SUV) ரக காரை இந்தியாவில் அறிமுகப்படுத்த உள்ளது. இதன் அறிமுகம் வருகிற மார்ச் மாத மத்தியில் இருக்கலாம் என கூறப்படுகிறது. இது ரெனால்ட்டின் இந்தியாவிற்கான திட்டங்களின் ஒரு சிறிய பகுதி மட்டுமே.

இந்தியாவில் கார் விற்பனைப் பட்டியலில் புதிய உச்சங்களைத் தொடுவதை நோக்கமாகக் கொண்டுள்ள ரெனால்ட், அதற்கான அடுத்த பெரிய நகர்வாக 'பிக்ஸ்டர்' (Bigster) எஸ்யூவி காரை இந்தியாவில் அறிமுகப்படுத்த உள்ளது. மார்ச்சில் அறிமுகமாகும் புதிய டஸ்டர் காரை அடிப்படையாக கொண்ட பிக்ஸ்டர், இந்த ஆண்டு ஆகஸ்ட் மாத சமயத்தில் அறிமுகப்படுத்தப்படலாம் என எதிர்பார்க்கப்படுகிறது.

இதற்கிடையில் தற்போது பிக்ஸ்டர் கார் ஒன்று முழுவதும் மறைக்கப்பட்ட நிலையில் பொது சாலையில் ஓட்டிப் பார்க்கப்பட்டு சோதனை செய்யப்பட்ட போது அடையாளம் காணப்பட்டுள்ளது. பெங்களூருவைச் சேர்ந்த எங்களது வாசகர்களில் ஒருவரான அனில் (Anil), இந்த பிக்ஸ்டர் காரின் சோதனை ஓட்ட ஸ்பை படங்களை பகிர்ந்துள்ளார். ரெனால்ட் பிக்ஸ்டர், ஐரோப்பிய சந்தைகளில் 2024ஆம் ஆண்டின் பிற்பகுதியில் இருந்து விற்பனையில் உள்ளது.

அங்கு இது ரெனால்ட்டின் ருமேனிய துணை நிறுவனமான டேசியா (Dacia) பிராண்டின் கீழ் விற்பனை செய்யப்படுகிறது. 2021ஆம் ஆண்டு பிக்ஸ்டர் கான்செப்ட் (Bigster Concept) வடிவில் முதன்முதலில் காட்சிப்படுத்தப்பட்ட இந்த ஏழு இருக்கைகள் கொண்ட எஸ்யூவி கார், ரெனால்ட்-நிசான் (Nissan) கூட்டணியின் சி.எம்.எஃப்-பி (CMF-B) தளத்தை அடிப்படையாகக் கொண்டது. இந்த தளம் புதிய டஸ்டர் காரிலும் பயன்படுத்தப்பட்டுள்ளது.

டஸ்டர் எஸ்யூவி உடன் ஒப்பிடுகையில், பிக்ஸ்டர் நீளத்திலும், முன் & பின் சக்கரங்களுக்கு இடையேயான வீல்பேஸ் நீளத்திலும் பெரியதாக உள்ளது. ஸ்பை படங்களில் காணப்படும் சோதனை வாகனத்தின் பின் கதவுகள் சற்று நீளமாகவும், பின்பக்கத் தொங்குபகுதி (rear overhang) பெரியதாகவும் இருப்பதை இது உறுதிப்படுத்துகிறது. மேலும், பின்பக்க விண்ட்ஷீல்டு வழியாக பார்க்கும்போது, கண்ணாடிகளுக்கு மிக அருகில் இரண்டு கூடுதல் இருக்கைகள் இருப்பது தெரிகிறது.

இந்த சோதனை பிக்ஸ்டர் காரில் புதிய அலாய் சக்கரங்கள் பொருத்தப்பட்டிருந்தாலும், அவற்றின் அளவை துல்லியமாக அறிய முடியவில்லை. ஐரோப்பாவில், பிக்ஸ்டர் 17 முதல் 19 அங்குல அலாய் சக்கரங்களுடன் கிடைக்கிறது. ஐரோப்பிய சந்தையில், பிக்ஸ்டர் அங்குள்ள டஸ்டர் காரின் அதே என்ஜின் ஆப்ஷன்களுடன் வழங்கப்படுகிறது.

ஆனால், இந்தியாவில் விற்பனையாகும் டஸ்டரின் டர்போ-பெட்ரோல் என்ஜின் பிக்ஸ்டரின் ஆரம்ப நிலை என்ஜினில் இருந்து வேறுபடும். பிக்ஸ்டர், 1.2 லிட்டர் டர்போசார்ஜ் செய்யப்பட்ட மூன்று சிலிண்டர் மைல்ட் ஹைப்ரிட் என்ஜின் உடன் வருகிறது. இது தேர்ந்தெடுக்கப்படும் வேரியண்ட்டைப் பொறுத்து 130 ஹெச்பி அல்லது 140 ஹெச்பி ஆற்றலை வழங்குகிறது.

டேசியா பிக்ஸ்டர் ஐரோப்பாவில் வழங்கும் மற்றொரு என்ஜின் ஆப்ஷன், தற்போது இந்தியாவில் விற்பனையாகும் டஸ்டரின் டாப்-ஸ்பெக் வேரியண்ட்டில் உள்ள அதே ஸ்ட்ராங் ஹைப்ரிட் என்ஜின் ஆகும். இந்த அமைப்பில் 1.8 லிட்டர் நான்கு சிலிண்டர் பெட்ரோல் என்ஜின், இரண்டு எலக்ட்ரிக் மோட்டார்கள் மற்றும் 1.4 kWh பேட்டரி பேக் ஆகியவை உள்ளன. இது மொத்தமாக 163 ஹெச்பி மற்றும் 280 என்எம் டார்க் திறனை உற்பத்தி செய்யக்கூடியதாக உள்ளது.

டிரைவ்ஸ்பார்க் கருத்து: முன்னதாக இந்த புதிய ரெனால்ட் காரின் அறிமுகம் 2027ஆம் ஆண்டின் தொடக்கத்தில் இருக்கும் என கூறப்பட்டது. ஆனால், தற்போது சோதனை ஓட்டங்கள் தீவிரமாக நடைபெற்று வருவதை பார்த்தால் இந்தியாவிற்கான ரெனால்ட் பிக்ஸ்டர் இந்த ஆண்டின் பிற்பகுதியிலேயே சந்தைக்கு வந்துவிடும் என எதிர்பார்க்கிறோம். இது ரெனால்ட்டின் இந்திய கார் மாடல்கள் வரிசையில் டஸ்டருக்கு மேலே நிலைநிறுத்தப்படும். மேலும், மஹிந்திரா எக்ஸ்யூவி 7எக்ஸ்ஓ, ஹூண்டாய் அல்காசர், கியா கேரன்ஸ் கிளாவிஸ் போன்ற கார் மாடல்களுடன் கடுமையாக போட்டியிடும்.