புதிய ஸ்கோடா ஸ்லாவியா: வேரியண்ட் வாரியாக விலை மற்றும் வசதிகள் முழு விவரம்

இந்திய மிட்சைஸ் செடான் சந்தையில் ஸ்கோடா ஸ்லாவியா முக்கியமான தேர்வாக இருந்து வருகிறது. இந்த நிலையில், புதிய தோற்றம் மற்றும் கூடுதல் வசதிகளுடன் ஸ்லாவியா புதுப்பிக்கப்பட்டுள்ளது. கடந்த ஆகஸ்ட் மாதம் அறிமுகம் செய்யப்பட்ட இந்த மாடலுக்கான விலை தற்போது அறிவிக்கப்பட்டுள்ளது. ஆரம்ப விலை ரூ.9.99 லட்சமாக நிர்ணயிக்கப்பட்டுள்ளது.

புதிய ஸ்லாவியா கிளாசிக், கிளாசிக் பிளஸ், சிக்னேச்சர், ஸ்போர்ட்லைன், பிரஸ்டீஜ் மற்றும் மான்ட்டி கார்லோ என ஆறு வேரியண்ட்டுகளில் கிடைக்கிறது. 1.0 லிட்டர் டிஎஸ்ஐ மற்றும் 1.5 லிட்டர் டிஎஸ்ஐ என இரண்டு பெட்ரோல் எஞ்சின் தேர்வுகள் உள்ளன. அடுத்த வாரம் முதல் வாடிக்கையாளர்களுக்கான டெலிவரி தொடங்கும் என நிறுவனம் தெரிவித்துள்ளது. இந்த நிலையில், வேரியண்ட் வாரியாக வசதிகள் மற்றும் விலை விபரங்களை தொடர்ந்து பார்க்கலாம்.

கிளாசிக் வேரியண்ட்

அடிப்படை வேரியண்ட்டான கிளாசிக் ரூ.9.99 லட்சம் விலையில் விற்பனைக்கு கிடைக்கிறது. இதில் 1.0 லிட்டர் டிஎஸ்ஐ பெட்ரோல் எஞ்சினுடன் 6 ஸ்பீடு மேனுவல் கியர்பாக்ஸ் வழங்கப்படுகிறது. ஆறு ஏர்பேக்குகள், 25க்கும் அதிகமான பாதுகாப்பு வசதிகள், தானியங்கி ஏசி சிஸ்டம் வசதி, பின்புற கண்ணாடியில் டீஃபாகர் வசதி மற்றும் 17.7 செ.மீ தொடுதிரை ஆகியவை இடம்பெற்றுள்ளன.

Also Read

ரூ.11.80 லட்சத்தில் புதிய ஹோண்டா எலிவேட் ஃபேஸ்லிஃப்ட் அறிமுகம்!!

கிளாசிக் பிளஸ் வேரியண்ட்

கிளாசிக் பிளஸ் வேரியண்ட்டின் விலை ரூ.10.99 லட்சம் முதல் தொடங்குகிறது. இதில் 1.0 டிஎஸ்ஐ எஞ்சினுடன் மேனுவல் மற்றும் புதிய 8 ஸ்பீடு ஆட்டோமேட்டிக் கியர்பாக்ஸ் தேர்வுகள் கிடைக்கின்றன. எலெக்ட்ரிக் கன்ட்ரோல் சன்ரூஃப், 16 அங்குல அலாய் வீல்கள், முழு எல்இடி விளக்குகள், மழையை உணர்ந்து இயங்கும் தானியங்கி வைப்பர்கள் மற்றும் பகல், இரவுக்கு ஏற்றவாறு மாற்றிக் கொள்ளக்கூடிய உள்புற கண்ணாடி ஆகியவை உள்ளன.

சிக்னேச்சர் வேரியண்ட்

சிக்னேச்சர் வேரியண்ட்டின் விலை ரூ.13.94 லட்சம் எக்ஸ்ஷோரூம் விலையிலிருந்து கிடைக்கிறது. இதில் 1.0 டிஎஸ்ஐ எஞ்சினுடன் மேனுவல் மற்றும் 8 ஸ்பீடு ஆட்டோமேட்டிக் தேர்வுகள் உள்ளன. 20.32 செமீ டிஜிட்டல் இன்ஸ்ட்ரூமென்ட் கிளஸ்ட்டர், 25.6 செமீ தொடுதிரையுடன் இன்ஃபோடெயின்மென்ட் சிஸ்டம், கூகுள் கிளவுட் அடிப்படையிலான செயற்கை நுண்ணறிவு ஏஐ அசிஸ்டென்ட் வசதி, பின்புற கேமரா ஆகியவை வழங்கப்பட்டுள்ளன.

Also Read

மெர்சிடிஸ் மேபக் எஸ் க்ளாஸ் கார் அறிமுகம்: ரூ.3.35 கோடியில் பிளக் இன் ஹைப்ரிட் கார்!

ஸ்போர்ட்லைன் வேரியண்ட்

ஸ்போர்ட்லைன் வேரியண்ட்டின் 1.0 டிஎஸ்ஐ மேனுவல் மாடலின் விலை ரூ.14.34 லட்சமாகவும், இதே எஞ்சினுடன் வழங்கப்படும் 8 ஸ்பீடு ஆட்டோமேட்டிக் மாடலின் விலை ரூ.15.34 லட்சமாகவும் நிர்ணயிக்கப்பட்டு இருக்கிறது. இதில் 360 டிகிரி கேமரா, கருப்பு நிற 16 அங்குல அலாய் வீல்கள், டிஜிட்டல் இன்ஸ்ட்ரூமென்ட் கிளஸ்ட்டர், மேம்படுத்தப்பட்ட இன்ஃபோடெயின்மென்ட் வசதிகள் இடம்பெற்றுள்ளன.

இதில் வழங்கப்படும் 360 டிகிரி கேமரா மூலமாக காரைச் சுற்றியுள்ள பகுதியை பல கேமராக்கள் மூலம் கண்காணித்து, வாகனத்தை மேலிருந்து பார்ப்பது போன்ற காட்சியை திரையில் வழங்கும் வசதியாக உள்ளது. குறிப்பாக குறுகிய இடங்களில் காரை நிறுத்தும்போது இது ஓட்டுனருக்கு மிகவும் உதவியாக இருக்கும்.

பிரஸ்டீஜ் வேரியண்ட்

பிரஸ்டீஜ் வேரியண்ட்டின் 1.0 டிஎஸ்ஐ பெட்ரோல் மேனுவல் ரூ.15.89 லட்சமாகவும், ஆட்டோமேட்டிக் மாடலுக்கு ரூ.16.89 லட்சமாகவும் எக்ஸ்ஷோரூம் விலை நிர்ணயிக்கப்பட்டு இருக்கிறது. இந்த வேரியண்ட்டில் 1.5 டிஎஸ்ஐ எஞ்சினுடன் 7 ஸ்பீடு டிஎஸ்ஜி ஆட்டோமேட்டிக் மாடலின் விலை ரூ.18.59 லட்சமாக உள்ளது.

இந்த வேரியண்ட்டில் 26.03 செமீ டிஜிட்டல் இன்ஸ்ட்ரூமென்ட் கிளஸ்ட்டர், 360 டிகிரி கேமரா, இரட்டை நிற அலாய் வீல்கள், மின்சார முறையில் மாற்றக்கூடிய முன்புற இருக்கைகள், வென்டிலேட்டட் வசதியுடன் முன்புற இருக்கைகள் மற்றும் பின்புற இருக்கைகளுக்கான மசாஜ் வசதி ஆகியவை இடம்பெற்றுள்ளன.

மான்ட்டி கார்லோ வேரியண்ட்

ஸ்லாவியா வரிசையின் அதிகபட்ச வசதிகளுடன் டாப் வேரியண்ட்டான மான்ட்டி கார்லோ ரூ.17.29 லட்சம் முதல் தொடங்குகிறது. இதன் 1.0 டிஎஸ்ஐ 8 ஸ்பீடு ஆட்டோமேட்டிக் மாடல் ரூ.17.29 லட்சத்திலும், 1.5 டிஎஸ்ஐ எஞ்சினுடன் 7 ஸ்பீடு டிஎஸ்ஜி மாடல் ரூ.18.84 லட்சத்திலும் கிடைக்கும்.

மான்ட்டி கார்லோ டாப் வேரியண்ட்டானது சாதாரண வேரியண்ட்டிலிருந்து வேறுபடுத்தும் வகையில் கவர்ச்சிகரமான அம்சங்கள் இடம்பெற்றுள்ளன. பிரத்யேக அடையாளப் பேட்ஜ், சிவப்பு நிற அலங்காரங்கள், கருப்பு நிற வெளிப்புற பாகங்கள் மற்றும் கருப்பு நிற 16 அங்குல அலாய் வீல்கள் வழங்கப்பட்டுள்ளன. பிரஸ்டீஜ் வேரியண்ட்டில் கிடைக்கும் முக்கிய வசதிகளையும் இந்த மாடல் பெற்றுள்ளது.

எஞ்சின் மற்றும் பவர்

புதிய ஸ்லாவியாவில் 1.0 லிட்டர் டிஎஸ்ஐ மற்றும் 1.5 லிட்டர் டிஎஸ்ஐ என இரண்டு பெட்ரோல் எஞ்சின்கள் உள்ளன. இதில், 1.0 டிஎஸ்ஐ எஞ்சின் 115 எச்பி பவரையும் 178 என்எம் டார்க்கையும் வழங்குகிறது. அடுத்து 1.5 டிஎஸ்ஐ எஞ்சின் 150 எச்பி பவருடன் 250 என்எம் டார்க்கையும் வழங்க வல்லது.

மேலும், 1.0 டிஎஸ்ஐ எஞ்சினுடன் 6 ஸ்பீடு மேனுவல் மற்றும் புதிய 8 ஸ்பீடு ஆட்டோமேட்டிக் கியர்பாக்ஸ் தேர்வுகள் கிடைக்கின்றன. அதிக செயல்திறனை விரும்புபவர்களுக்கான 1.5 டிஎஸ்ஐ எஞ்சின் 7 ஸ்பீடு டிஎஸ்ஜி ஆட்டோமேட்டிக் கியர்பாக்ஸுடன் வழங்கப்படுகிறது. இந்த மாடல்களில் பின்புற டிஸ்க் பிரேக்குகளும் இடம்பெற்றுள்ளன.

எந்த வேரியண்ட் சிறந்தது?

குறைந்த விலையில் ஸ்லாவியாவை வாங்க விரும்புபவர்களுக்கு கிளாசிக் வேரியண்ட் போதுமானதாக இருக்கும். சன்ரூஃப் மற்றும் ஆட்டோமேட்டிக் கியர்பாக்ஸ் போன்ற கூடுதல் வசதிகள் தேவைப்படுபவர்களுக்கு கிளாசிக் பிளஸ் சிறந்த தொடக்கத் தேர்வாக இருக்கிறது. அதிக தொழில்நுட்ப வசதிகள் விரும்புபவர்கள் சிக்னேச்சரை பரிசீலிக்கலாம்.

360 டிகிரி கேமரா மற்றும் ஸ்போர்ட்டியான தோற்றம் முக்கியம் என்றால் ஸ்போர்ட்லைன் கவனிக்கத்தக்கது. குடும்பப் பயன்பாட்டில் அதிக வசதி, காற்றோட்டமான இருக்கைகள் மற்றும் பின்புற இருக்கை மசாஜ் போன்ற அம்சங்கள் தேவைப்படுபவர்களுக்கு பிரஸ்டீஜ் வேரியண்ட் மிகவும் முழுமையான தேர்வாக தெரிகிறது.

புதிய ஸ்லாவியாவில் செய்யப்பட்ட மாற்றங்கள், காரின் அடிப்படை தன்மையை மாற்றாமல் அதன் வசதிகளையும் தினசரி பயன்பாட்டு அனுபவத்தையும் மேம்படுத்தும் வகையில் வந்துள்ளது. குறிப்பாக, புதிய 8 ஸ்பீடு ஆட்டோமேட்டிக் கியர்பாக்ஸ், 360 டிகிரி கேமரா மற்றும் பின்புற இருக்கை மசாஜ் வசதி ஆகியவை கொண்ட விலை உயர்ந்த வேரியண்ட்டை வாங்கும்போது அதிக மதிப்பையும், சிறப்பான அனுபவத்தையும் பெறும் வாய்ப்பை கொடுக்கும்.