Click it and Unblock the Notifications
ரூ.6 லட்சத்தில் வரும் புதிய டாடா ஏரிஸ் செடான் காரின் முதல் தரிசனம்... டீலரில் எடுக்கப்பட்ட வீடியோ வெளியானது!
இந்தியாவின் சிறிய வகை செடான் கார் சந்தையில் புதிய போட்டியை உருவாக்க டாடா மோட்டார்ஸ் தயாராகி வருகிறது. டிகோர் காருக்கு மாற்றாக புதிய ஏரிஸ் என்ற பெயரில் புதிய காம்பேக்ட் செடான் காரை நாளை விற்பனைக்கு கொண்டு வர இருக்கிறது. அதிகாரப்பூர்வ அறிமுகத்திற்கு இன்னும் ஒரு நாள் மட்டுமே உள்ள நிலையில், ஏரிஸ் காரின் தயாரிப்பு நிலை மாடல்கள் டீலர்களை வந்தடைந்துள்ளன.
டிரக்கில் டீலருக்கு வந்த டாடா ஏரிஸ் காரின் வீடியோ சமூக வலைதளங்களில் வெளியாகியுள்ளது. இதுவரை டீசர் மற்றும் காப்புரிமை வரைபடங்கள் மூலமாக மட்டுமே காரின் வடிவமைப்பை பார்த்து வந்த நிலையில், தற்போது தயாரிப்பு நிலையில் உள்ள காரை நேரில் பார்க்கும் வாய்ப்பு கிடைத்துள்ளது. குறிப்பாக முன்பக்கம் மற்றும் பின்பக்க வடிவமைப்பில் டிகோருடன் ஒப்பிடும்போது கணிசமான மாற்றங்கள் இருப்பது தெளிவாக தெரிகிறது.
ஏரிஸ் காரின் முன்பகுதியில் அகலமான கருப்பு நிற பட்டையுடன் கொடுக்கப்பட்டுள்ளது. அதன் மையத்தில் டாடா நிறுவனத்தின் சின்னம் இடம்பெற்றுள்ளது. இதனுடன் மெலிதான தோற்றம் கொண்ட முகப்பு விளக்குகள் மற்றும் புதிதாக வடிவமைக்கப்பட்ட பம்பர் ஆகியவை காருக்கு நவீன தோற்றத்தை வழங்குகின்றன. பம்பரின் கீழ்பகுதியில் இடம்பெற்றுள்ள வடிவமைப்பு அம்சங்களும் தற்போதைய டிகோர் காரிலிருந்து மாறுபட்டதாக உள்ளன.
பக்கவாட்டு தோற்றத்திலும் ஏரிஸ் காரில் சில முக்கியமான மாற்றங்கள் செய்யப்பட்டுள்ளன. குறிப்பாக புதிய வடிவமைப்பிலான இரட்டை நிற அலாய் சக்கரங்கள் கவனத்தை ஈர்க்கின்றன. கூரை பின்பகுதியை நோக்கி மெதுவாக சரியும் வகையில் அமைக்கப்பட்டுள்ளதால், காருக்கு சற்று ஸ்போர்ட்டியான தோற்றம் கிடைக்கிறது. பெரிய பின்பக்க கண்ணாடி பகுதி மற்றும் வலுவான தோள்பட்டை கோடு ஆகியவையும் காரின் தோற்றத்தை மேம்படுத்துகின்றன.
பின்புறத்தில் தான் ஏரிஸ் காரின் மிகப்பெரிய வடிவமைப்பு மாற்றம் தெரிகிறது. இருபுற பின்பக்க விளக்குகளையும் இணைக்கும் வகையில் அகலமான ஒளிப்பட்டை அமைப்பு இடம்பெற்றுள்ளது. அதன் மையத்தில் டாடா சின்னம் கொடுக்கப்பட்டுள்ளது. அதற்கு கீழே AERIS என்ற பெயர் தனித்தனி எழுத்துகளுடன் இடம்பெற்றுள்ளது. கீழ்பகுதியில் செங்குத்தான பிரதிபலிப்பான்கள் மற்றும் பதிவு எண் பலகை பகுதியும் காணப்படுகிறது.
இந்த வீடியோவில் காணப்படும் காரின் பின்புறத்தில் i-CNG என்ற பேட்ஜும் கவனிக்கப்படுகிறது. இதன் மூலம் டாடா ஏரிஸ் பெட்ரோல் மட்டுமின்றி தொழிற்சாலையிலேயே பொருத்தப்படும் சிஎன்ஜி தொழில்நுட்பத்துடனும் விற்பனைக்கு வருவது உறுதியாகிறது. டிகோர் காரில் பயன்படுத்தப்பட்ட இரட்டை சிலிண்டர் அமைப்பை அடிப்படையாகக் கொண்ட சிஎன்ஜி தொழில்நுட்பம் புதிய காரிலும் இடம்பெற வாய்ப்புள்ளது.
உட்புறத்தைப் பொறுத்தவரை, புதிய ஏரிஸ் காரில் டாடாவின் சமீபத்திய டியாகோ மாடலை நினைவுபடுத்தும் வகையிலான டேஷ்போர்டு வடிவமைப்பு எதிர்பார்க்கப்படுகிறது. பெரிய தொடுதிரை கொண்ட தகவல் பொழுதுபோக்கு அமைப்பு, வயர்லெஸ் ஆன்ட்ராய்டு ஆட்டோ மற்றும் ஆப்பிள் கார்ப்ளே உள்ளிட்ட வசதிகள் இடம்பெறலாம் என தகவல்கள் தெரிவிக்கின்றன. உயர்தர வேரியண்ட்டுகளில் கூடுதல் வசதிகளும் கிடைக்கும்.
பாதுகாப்பு மற்றும் வசதிகளிலும் ஏரிஸ் காரின் டாப் வேரியண்ட்டில் ஆறு காற்றுப்பைகள், டயர் காற்றழுத்த கண்காணிப்பு அமைப்பு, 360 டிகிரி கேமரா போன்ற அம்சங்கள் கிடைக்க வாய்ப்புள்ளதாக தகவல்கள் தெரிவிக்கின்றன. இருப்பினும், எந்தெந்த வசதிகள் எந்த வேரியண்ட்டில் இடம்பெறும் என்பது நாளை நடைபெறும் அதிகாரப்பூர்வ அறிமுகத்திற்குப் பிறகே முழுமையாக தெரியவரும்.
எஞ்சின் விஷயத்தில் தற்போதைய டிகோர் காரில் பயன்படுத்தப்படும் 1.2 லிட்டர் பெட்ரோல் இன்ஜின் தொடரும் என எதிர்பார்க்கப்படுகிறது. பெட்ரோல் மற்றும் பெட்ரோல்-சிஎன்ஜி ஆகிய இரண்டு தேர்வுகளும் கிடைக்கலாம். மேனுவல் மற்றும் ஏஎம்டி கியர்பாக்ஸ் வாய்ப்புகளும் எதிர்பார்க்கப்படுகின்றன. அதிகாரப்பூர்வ தொழில்நுட்ப விவரங்கள் மற்றும் மைலேஜ் உள்ளிட்ட தகவல்கள் அறிமுக நிகழ்வில் வெளியாகும்.
டாடா ஏரிஸ் நான்கு மீட்டருக்குக் குறைவான செடான் பிரிவில் நிலைநிறுத்தப்பட உள்ளது. இந்த பிரிவில் ஏற்கனவே மாருதி சுஸுகி டிசையர், ஹூண்டாய் ஆரா மற்றும் ஹோண்டா அமேஸ் போன்ற பிரபலமான மாடல்கள் உள்ளன. குறிப்பாக சிஎன்ஜி தேர்வு கிடைப்பது டிசையர் உள்ளிட்ட போட்டியாளர்களுடன் நேரடியாக போட்டியிட உதவும் என எதிர்பார்க்கப்படுகிறது. ரூ.6 லட்சத்ததையொட்டிய ஆரம்ப விலையில் எதிர்பார்க்கப்படுகிறது.
Video Source: Pintu Garagewallah@YouTube
Continue with Google
