புது ரெண்டு கலரும் சூப்பர்... இந்த டாடா எலெக்ட்ரிக் காரை இதுக்காகவே இன்னும் எத்தனை பேர் வாங்க போறாங்களோ!!

டாடா மோட்டார்ஸ் (Tata Motors) நிறுவனம், அதன் பன்ச் இவி ஃபேஸ்லிஃப்ட் (Punch EV Facelift) காரில் இரண்டு புதிய வண்ணங்களை அறிமுகப்படுத்த உள்ளதாக உறுதி செய்துள்ளது. பிப்ரவரி 20ஆம் தேதி மார்க்கெட்டில் அறிமுகம் செய்யப்படவுள்ள புதுப்பிக்கப்பட்ட பன்ச் இவி ஃபேஸ்லிஃப்ட் கார் குறித்த எதிர்பார்ப்பு அதிகரித்துள்ள நிலையில், இந்த காரில் பிரகாசமான புதிய மஞ்சள் நிறம் மற்றும் காப்பர் வெண்கல நிறம் ஆகியவை இடம்பெறவுள்ளன.

டாடா ஹாரியர் (Harrier) மற்றும் சமீபத்தில் அறிமுகமான சஃபாரி (Safari) போன்ற கார் மாடல்களில் ஏற்கனவே மஞ்சள் வண்ணங்களை டாடா மோட்டார்ஸ் வழங்குகிறது. இதனால், பன்ச் இவி ஃபேஸ்லிஃப்ட் காருக்கு தனித்துவமான மஞ்சள் வண்ணம் அளிக்கப்படலாம் எனத் தெரிகிறது. பன்ச் இவி ஃபேஸ்லிஃப்ட் காரின் வெளிப்புற வடிவமைப்பிலும் மாற்றங்கள் செய்யப்பட்டுள்ளன.

குறிப்பாக, காரின் முன்புறத்தில் மறுவடிவமைப்பு செய்யப்பட்ட இரண்டாக பிரிக்கப்பட்ட எல்இடி ஹெட்லேம்ப் அமைப்பு உள்ளது. தற்போதைய பன்ச் இவி மாடலில் ஹெட்லேம்ப்கள் கருப்பு பிளாஸ்டிக் மூலம் இணைக்கப்பட்டிருக்கும், ஆனால் புதிய ஃபேஸ்லிஃப்ட் மாடலில் இந்த இணைப்பு நீக்கப்படுகிறது. புதுப்பிக்கப்பட்ட மாடலில், எல்இடி டிஆர்எல்களும் மாற்றியமைக்கப்பட்டு, தனித்துவமான தோற்றத்தைத் தருகின்றன.

புதிய பம்பர் மற்றும் கிரில் வடிவமைப்பு ஆகியவை காரின் முன்பக்கத்தை மேலும் கவர்ச்சியாகவும், வலிமையாகவும் காட்டுகின்றன. காரின் பின்பக்க தோற்றம் இன்னும் முழுமையாக வெளியிடப்படவில்லை. ஆனால், இணைக்கப்பட்ட டெயில்லேம்ப்கள் மற்றும் மறுவடிவமைப்பு செய்யப்பட்ட பம்பர்கள் இடம்பெறலாம் என எதிர்பார்க்கப்படுகிறது. பக்கவாட்டில், புதிய பன்ச் இவி பெரும்பாலும் மாறாமல் உள்ளது.

இருப்பினும், நெக்ஸான் இவி எலெக்ட்ரிக் காரை ஒத்த புதிய ஏரோ-ஆப்டிமைஸ்டு அலாய் சக்கர டிசைன்கள் வழங்கப்படும் எனத் தெரிகிறது. அதே பாக்ஸி வடிவமைப்பு, உயரமான தோற்றம், கதவுகளில் தடிமனான கருப்பு கிளாடிங், காரின் பின்பக்கத்தை காட்டும் பக்கவாட்டு கண்ணாடிகளில் பொருத்தப்பட்ட சிக்னல் இண்டிகேட்டர்கள் போன்றவை அப்படியே தொடர்கின்றன. உட்புறத்திலும் கூடுதல் அம்சங்கள் மற்றும் சிறிய மேம்பாடுகள் எதிர்பார்க்கப்படுகின்றன.

இயந்திர ரீதியாக, பன்ச் இவி ஃபேஸ்லிஃப்ட் கார், அதன் தற்போதைய பேட்டரி ஆப்ஷன்களையே தக்க வைத்துக் கொள்ளும். பன்ச் இவி காரின் விலை குறைவான எண்ட்ரி-லெவல் வேரியண்ட்களுக்கு 25 kWh பேட்டரி பேக் வழங்கப்படுகிறது. இது ஒருமுறை சார்ஜ் செய்தால் 315 கி.மீ தூரம் வரை செல்லும். டாப்-ஸ்பெக் வேரியண்ட்கள் 35 kWh பேட்டரி பேக்கைப் பெறுகின்றன.

இது ஒருமுறை முழுமையாக சார்ஜ் செய்தால் 421 கி.மீ ரேஞ்சை வழங்குகிறது. சார்ஜிங் ஆப்ஷன்களில், 7.2 kW AC ஹோம் சார்ஜர் மற்றும் 50 kW DC ஃபாஸ்ட் சார்ஜர் ஆகியவை அடங்கும். DC ஃபாஸ்ட் சார்ஜர் மூலம் 10 முதல் 80 சதவீதம் வரை சார்ஜ் செய்ய ஒரு மணிநேரத்திற்கும் குறைவாகவே ஆகும்.

சிறிய பேட்டரி கொண்ட வேரியண்ட்கள் 80 bhp மற்றும் 114 Nm டார்க் திறனை வழங்குகின்றன. அதேசமயம், லாங்-ரேஞ்ச் வேரியண்ட்கள் 120 bhp மற்றும் 190 Nm டார்க்கை வெளிப்படுத்துகின்றன. இந்த எலெக்ட்ரிக் கார் 0-100 கி.மீ வேகத்தை 9.5 வினாடிகளில் எட்டிவிடும். இதன் அதிகபட்ச வேகம் மணிக்கு 140 கி.மீ ஆகும்.

டிரைவ்ஸ்பார்க் கருத்து: புதிய பன்ச் இவி ஃபேஸ்லிஃப்ட் காரில் காப்பர் வெண்கல நிறம், மஞ்சள் நிறத்தைப் போல பிரகாசமாக இல்லாவிட்டாலும், காருக்கு தனித்துவமான மற்றும் கண்ணியமான தோற்றத்தை வழங்குகிறது. டாடா சஃபாரி கார் மாடலில் உள்ள 'சூப்பர்நோவா காப்பர்' நிறத்தைப் போலவே இது இருக்கலாம். எதிர்காலத்தில் பன்ச் இவி காரில் மேலும் பல கலர் ஆப்ஷன்கள் சேர்க்கப்படலாம் என எதிர்பார்க்கப்படுகிறது.