சாலையில் இந்த கார் மட்டும் தனியா தெரியுது... அறிமுகத்துக்கு முன் சோதனையில் ஃபோக்ஸ்வேகன்

இந்திய ஆட்டோமொபைல் சந்தையில் ஃபோக்ஸ்வேகன் நிறுவனத்தின் பிரபலமான மற்றும் விலை குறைவான கார், டைகுன் (Taigun) ஆகும். ஃபோக்ஸ்வேகனின் எஸ்யூவி (SUV) கார் மாடலான இது மேம்படுத்தப்பட்ட ஃபேஸ்லிஃப்ட் (Facelift) பதிப்பில் விரைவில் அறிமுகப்படுத்தப்பட உள்ளது. சமீபத்தில், புதிய டைரான் ஆர்-லைன் (Tayron R-line) கார் அறிமுகப்படுத்தப்பட்ட நிலையில், இப்போது டைகுன் மீதான எதிர்பார்ப்பு அதிகரித்துள்ளது.

புதுப்பிக்கப்பட்ட டைகுனின் சோதனை ஓட்டங்களின்போது எடுக்கப்பட்ட புகைப்படங்கள் வெளியாகி, காரில் வரவிருக்கும் மாற்றங்களை வெளிப்படுத்தியுள்ளன. புதிய டைகுன் ஃபேஸ்லிஃப்ட் கார் வடிவமைப்பு மாற்றங்களுடன் வருவதை ஸ்பை படங்கள் உறுதிப்படுத்துகின்றன. முழுவதும் மறைக்கப்பட்ட நிலையில் சோதனை செய்யப்பட்டுள்ள புதிய டைகுன் காரின் முன் மற்றும் பின் பகுதிகளில் குறிப்பிடத்தக்க வடிவமைப்பு மாற்றங்கள் இருக்கும் என்பதை இந்த ஸ்பை படங்கள் தெளிவுபடுத்துகின்றன.

இருப்பினும், டைகுனின் நீளம், அகலம், உயரம் உள்ளிட்ட ஒட்டுமொத்த பரிமாண அளவுகளில் பெரிய மாற்றங்கள் இருக்காது. முன்புறத்தில் புதுப்பிக்கப்பட்ட கிரில் வடிவமைப்பு, நவீன எல்இடி ஹெட்லேம்ப்கள், மற்றும் புதிய பம்பர் அமைப்பு ஆகியவை எதிர்பார்க்கப்படுகின்றன. மேலும், புதிய குஷாக் காரைப் போலவே, டைகுனிலும் கனெக்டட் விளக்கு செட்-அப் மற்றும் கூர்மையான எல்இடி சிக்னேச்சர் இடம்பெற வாய்ப்புள்ளது.

காரின் பின்புறத்தில், மேம்படுத்தப்பட்ட எல்இடி டெயில்-லேம்ப்கள், கனெக்டட் லைட் பார் மற்றும் புதிய பம்பர் இருக்கலாம். டைகுன் மற்றும் குஷாக் ஆகிய இரண்டும் ஒரே MQB-A0-IN பிளாட்ஃபார்ம் மற்றும் கட்டமைப்புடன் உருவாக்கப்படுவதால், புதிய குஷாக்கில் அறிமுகப்படுத்தப்பட்ட பல அம்சங்கள் டைகுன் ஃபேஸ்லிஃப்ட்டிலும் இடம்பெறும் என எதிர்பார்க்கப்படுகிறது.

உட்புறத்தில், பெரிய டிஜிட்டல் இன்ஸ்ட்ரூமென்ட் கிளஸ்டர், வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்பிளேவை ஆதரிக்கும் மேம்படுத்தப்பட்ட இன்ஃபோடெயின்மென்ட் சிஸ்டம், மேம்படுத்தப்பட்ட வாய்ஸ் கண்ட்ரோல் உதவி மற்றும் கனெக்டட் கார் தொழில்நுட்பம் ஆகியவை புதிய டைகுனில் எதிர்பார்க்கப்படுகின்றன. இருக்கை அமைப்புகளிலும், புதிய டிரிம் பினிஷ்களிலும் மாற்றங்கள் இருக்கலாம்.

டைகுனின் அனைத்து வேரியன்ட்களிலும் பாதுகாப்பு அம்சங்களின் பட்டியலை ஃபோக்ஸ்வேகன் விரிவுபடுத்த வாய்ப்புள்ளது. டாப்-எண்ட் வேரியன்ட்களில், மற்ற போட்டி கார்களுக்கு இணையாக காற்றோட்டமான முன் இருக்கைகள் (ventilated front seats) மற்றும் ஒரு பனோரமிக் சன்ரூஃப் போன்ற அம்சங்களும் சேர்க்கப்படலாம். என்ஜின் மற்றும் கியர்பாக்ஸ் ஆப்ஷன்களைப் பொறுத்தவரை, டைகுன் ஃபேஸ்லிஃப்ட் தற்போதைய என்ஜின் ஆப்ஷன்களையே தக்க வைத்துக் கொள்ளும் என்று எதிர்பார்க்கப்படுகிறது.

இதில் 115 பிஎஸ் பவரையும் 178 என்.எம் டார்க் திறனையும் வெளியிடும் 1.0 லிட்டர் TSI பெட்ரோல் என்ஜின் மற்றும் 150 பிஎஸ் பவரையும் 250 என்.எம் டார்க் திறனையும் வழங்கும் 1.5 லிட்டர் TSI பெட்ரோல் என்ஜின் ஆகியவை அடங்கும். 1.0 லிட்டர் TSI என்ஜின், மேம்படுத்தப்பட்ட குஷாக்கில் அறிமுகப்படுத்தப்பட்ட புதிய 8-ஸ்பீடு டார்க் கன்வெர்ட்டர் ஆட்டோமேட்டிக் கியர்பாக்ஸைப் பெறக்கூடும்.

அதேசமயம், 1.5 லிட்டர் TSI என்ஜின் 7-ஸ்பீடு DSG ஆட்டோமேட்டிக் கியர்பாக்ஸ் உடன் தொடர்ந்து வழங்கப்படும். குறிப்பிட்ட சில வேரியன்ட்களில் மேனுவல் கியர்பாக்ஸ் ஆப்ஷன்களும் தொடர்ந்து கிடைக்கும். ஸ்கோடா குஷாக் ஏற்கனவே புதுப்பிக்கப்பட்டு வெளியீடு செய்யப்பட்டுவிட்ட நிலையில், ஃபோக்ஸ்வேகன் டைகுனின் ஃபேஸ்லிஃப்ட் வெளியீட்டில் அதிக தாமதம் இருக்காது எனத் தெரிகிறது.

டிரைவ்ஸ்பார்க் கருத்து: ஸ்கோடா நிறுவனம் கடந்த ஜனவரி மாதம் தனது குஷாக் ஃபேஸ்லிஃப்ட் காரை வெளியிட்ட நிலையில், ஃபோக்ஸ்வேகன் தனது டைகுனின் புதுப்பிக்கப்பட்ட பதிப்பை வெளியிடுவது காலத்தின் கட்டாயமாகப் பார்க்கப்படுகிறது. இதனால், மிட்-சைஸ் எஸ்யூவி கார்கள் பிரிவில் உள்ள போட்டியை சமாளிக்கும் வகையில் இந்த ஃபேஸ்லிஃப்ட் கார் இருக்கும் என எதிர்பார்க்கிறோம்.