புதிய ஃபோக்ஸ்வேகன் விர்ட்டஸ் ஃபேஸ்லிஃப்ட் டிசம்பர் 11ல் அறிமுகம் உறுதியானது
இந்தியாவில் செடான் கார்களுக்கான வரவேற்பு எஸ்யூவி மாடல்களின் வளர்ச்சியால் சற்று குறைந்திருந்தாலும், பிரீமியம் செடான் கார்களை விரும்பும் வாடிக்கையாளர்கள் தொடர்ந்து இந்தப் பிரிவில் ஆர்வம் காட்டி வருகின்றனர். ஸ்போர்ட்டியான தோற்றம், சிறந்த ஓட்டுதல் அனுபவம், பாதுகாப்பு மற்றும் செயல்திறன் ஆகியவற்றை எதிர்பார்ப்பவர்களுக்கு ஃபோக்ஸ்வேகன் விர்ட்டஸ் முக்கியமான தேர்வாக உள்ளது.
இந்த நிலையில், விர்ட்டஸ் காரை மேலும் புதுப்பித்து வாடிக்கையாளர்களை கவர்வதற்கு ஃபோக்ஸ்வேகன் தயாராகியுள்ளது. 2026 மாடலாக மேம்படுத்தப்பட்டு இருக்கும் புதிய விர்ட்டஸ் ஃபேஸ்லிஃப்ட் மாடல் வரும் டிசம்பர் 11ம் தேதி அறிமுகம் செய்யப்பட உள்ளது. புதிய மாடலில் வெளிப்புற வடிவமைப்பு, தொழில்நுட்ப வசதிகள் மற்றும் கேபின் அனுபவத்தில் சில முக்கிய மாற்றங்கள் இடம்பெறலாம் என எதிர்பார்க்கப்படுகிறது.

புதிய தோற்றம்
புதிய விர்ட்டஸ் ஃபேஸ்லிஃப்ட் காரில் முற்றிலும் புதிய வடிவமைப்பு இடம்பெறவில்லை. ஏற்கனவே இருக்கும் காரின் அடையாளத்தைத் தக்கவைத்துக்கொண்டு, முகப்புப் பகுதியில் சில மாற்றங்கள் செய்யப்பட்டுள்ளன. புதிய பம்பர் வடிவமைப்பு, பியானோ பிளாக் அலங்காரம் மற்றும் ஏர்டேம் பகுதியில் டைமண்ட் வடிவ அமைப்பு ஆகியவை காருக்கு கூடுதல் கம்பீரத்தை வழங்குகின்றன.
ஹெட்லைட்டுகளின் அடிப்படை வடிவமைப்பு தொடர்ந்து பயன்படுத்தப்படுகிறது. இருப்பினும், முன்பு இடம்பெற்ற பனி விளக்குகளுக்கு மாற்றாக எல்இடி புரொஜெக்டர் விளக்குகள் வழங்கப்பட்டுள்ளன. இதனால் காரின் முகப்புத் தோற்றம் நவீனமாக இருப்பதுடன், இரவு நேரப் பயணங்களிலும் சிறந்த வெளிச்சத்தை வழங்கும் வகையில் மாற்றங்கள் இருக்கிறது.
காரின் பக்கவாட்டில் பெரிய மாற்றங்கள் எதுவும் செய்யப்படவில்லை. அதன் நீளமான வடிவமைப்பு, ஸ்போர்ட்டியான தோற்றம் மற்றும் செடான் காருக்கான தனித்துவமான உடல் அமைப்பு ஆகியவை தொடர்ந்து இடம்பெறுகின்றன. இருப்பினும், புதிய 10 ஸ்போக் வடிவமைப்புடன் கூடிய 16 இன்ச் அலாய் வீல்கள் இதில் அறிமுகப்படுத்தப்படுகிறது.
வேரியண்ட்டுகள்
ஜிடி மற்றும் ஜிடி லைன் வேரியண்ட்டுகளில் முழுமையான கருப்பு நிற அலாய் வீல்கள் வழங்கப்படும். மற்ற உயர்நிலை வேரியண்ட்டுகளில் இரட்டை நிற அலங்காரத்துடன் கூடிய அலாய் வீல்கள் இடம்பெறலாம். பின்புறத்திலும் புதிய பம்பர் அமைப்பு, டைமண்ட் வடிவ அலங்காரம் போன்ற மாற்றங்கள் செய்யப்பட்டுள்ளன. டெயில் லைட்டுகள் மற்றும் பூட் பகுதியின் வடிவமைப்பு பெரும்பாலும் பழைய மாடலைப் போலவே தொடர்கிறது.
புதிய விர்ட்டஸ் காரின் உட்புறப் படங்கள் இன்னும் முழுமையாக வெளியாகவில்லை. இருப்பினும், கேபின் அமைப்பில் பெரிய மாற்றங்கள் இல்லாமல் தற்போதைய வடிவமைப்பைத் தொடர்ந்து சில புதிய அலங்காரங்கள் மற்றும் வசதிகள் சேர்க்கப்படலாம் என எதிர்பார்க்கப்படுகிறது. புதிய வண்ணங்கள், மேம்படுத்தப்பட்ட இருக்கை வடிவமைப்பு மற்றும் கூடுதல் தொழில்நுட்ப வசதிகள் இடம்பெற வாய்ப்புள்ளது.
புதிய மாடலில் இன்ஃபோடெயின்மென்ட் திரை, டிஜிட்டல் இன்ஸ்ட்ரூமென்ட் கிளஸ்ட்டர், மொபைல்போன் இணைப்பு வசதிகள் மற்றும் பயணிகளுக்கான கூடுதல் வசதிகள் அதிகம் இருக்கும்.
எஞ்சின்
தற்போதைய விர்ட்டஸ் காரில் 1.0 லிட்டர் டர்போ பெட்ரோல் மற்றும் 1.5 லிட்டர் டர்போ பெட்ரோல் எஞ்சின் தேர்வுகள் உள்ளன. ஃபேஸ்லிஃப்ட் மாடலிலும் இந்த எஞ்சின் தேர்வுகள் தொடர வாய்ப்புள்ளது. ஸ்கோடா ஸ்லாவியா கார் போலவே 8 ஸ்பீடு ஆட்டோமேட்டிக் கியர்பாக்ஸ் தேர்வும் வழங்கப்படும் வாய்ப்பு இருக்கிறது.
தற்போதைய விர்ட்டஸ் காரின் விலையை விட ஃபேஸ்லிஃப்ட் மாடல் சற்று அதிக விலையில் அறிமுகம் செய்யப்படும். புதிய வசதிகள் மற்றும் வடிவமைப்பு மாற்றங்கள் காரணமாக விலை உயர்வு இருக்க வாய்ப்புள்ளது. டிசம்பர் 11ம் தேதி அறிமுகமாகும் புதிய விர்ட்டஸ், ஹோண்டா சிட்டி மற்றும் ஸ்கோடா ஸ்லாவியா போன்ற கார்களுக்கு போட்டியாக இந்திய சந்தையில் விற்பனைக்கு வர உள்ளது.


Click it and Unblock the Notifications


