இந்தியாவுக்கு ஸ்பின் எம்பிவி, ட்ரெயில்பிளேசர் எஸ்யூவி: ஜிஎம் உறுதி செய்தது

சோதனை ஓட்டம்

இந்த இரு கார்களையும் ஜெனரல் மோட்டார்ஸ் நிறுவனம் ஏற்கனவே ஆராய்ச்சி மற்றும் சோதனை ஓட்டப் பணிகளுக்காக இந்தியாவில் இற்ககுமதி செய்துவிட்டது. சோதனை ஓட்டங்களும் துவங்கியுள்ளதாக தகவல்கள் தெரிவிக்கின்றன.

என்ஜாய்க்கு மாற்று

தற்போது விற்பனையில் இருக்கும் என்ஜாய் எம்பிவி காருக்கு மாற்றாக இந்த புதிய எம்பிவி காரை அறிமுகம் செய்ய ஜெனரல் மோட்டார்ஸ் திட்டமிட்டிருக்கிறது. மிக சிறப்பான வடிவமைப்பு மற்றும் தரம் கொண்ட மாடலாக போட்டியாளர்களை எதிர்கொள்ளும் விதத்தில் இந்த புதிய ஸ்பின் எம்பிவியை களமிறக்க ஜெனரல் மோட்டார்ஸ் திட்டமிட்டுள்ளது.

7 சீட்டர்

4,360மிமீ நீளம் கொண்டதாக இருக்கும் இந்த புதிய எம்பிவி கார் எர்டிகா, மொபிலியோ போன்ற போட்டியாளர்களைவிட சிறப்பான இடவசதி கொண்ட காராக இருக்கும் என்று தெரிகிறது. அதாவது, மூன்றாவது வரிசையில் சராசரி உயரம் கொண்ட பெரியவர்களும் வசதியாக அமர்ந்து செல்வதற்கு ஏற்றதாக இருக்கும்.

எஞ்சின் ஆப்ஷன்கள்

வெளிநாட்டு சந்தைகளில் 1.2 லிட்டர் பெட்ரோல் எஞ்சின் மற்றும் 1.5 லிட்டர் பெட்ரோல் எஞ்சின் மாடல்களிலும், 1.3 லிட்டர் டீசல் எஞ்சின் கொண்ட மாடலிலும் விற்பனை செய்யப்படுகிறது. 5 ஸ்பீடு மற்றும் 6 ஸ்பீடு ஆட்டோமேட்டிக் கியர்பாக்ஸ் கொண்டதாக அங்கு கிடைக்கிறது.

விலை

மாருதி எர்டிகா மார்க்கெட்டை உடைக்கும் விதத்தில், மிக சவாலான விலையில் இந்த புதிய செவர்லே ஸ்பின் எம்பிவிக்கு விலையை நிர்ணயித்து களமிறக்க ஜெனரல் மோட்டார்ஸ் திட்டமிட்டிருப்பதாக கூறப்படுகிறது. மேலும், சிறப்பான வாடிக்கையாளர் சேவையை வழங்குவதையும் முதல் நோக்காக கொண்டு, பல புதிய மாடல்களை களமிறக்க இந்தியாவில் தனக்கு ஓர் நிரந்தர இடத்தை பெற வேண்டும் என்று தீவிரமாக செயல்பட்டு வருகிறது.

ட்ரெயில் பிளேசர் எஸ்யூவி

டொயோட்டா ஃபார்ச்சூனர், ஃபோர்டு எண்டெவர் மற்றும் மிட்சுபிஷி பஜெரோ ஸ்போர்ட் எஸ்யூவி மாடல்களுக்கு போட்டியாக புதிய செவர்லே ட்ரெயில்பிளேசர் நிலைநிறுத்தப்படும். இந்த புதிய எஸ்யூவி மாடலில் 180 பிஎச்பி பவரையும், 470 என்எம் டார்க்கையும் வழங்கும் 2.8 லிட்டர் டீசல் எஞ்சின் கொண்டதாக வெளிநாடுகளில் விற்பனை செய்யப்படுகிறது. மேலும், 6 ஆட்டோமேட்டிக் கியர்பாக்ஸ் கொண்டதாக அங்கு விற்பனை செய்யப்படும் நிலையில், இந்தியாவில் 5 ஸ்பீடு மேனுவல் கியர்பாக்ஸ் கொண்ட மாடலிலும் ட்ரெயில் பிளேசர் வரும் என்பது கணிப்பு.