டைகட்சூ பிராண்டை களமிறக்க டொயோட்டா திட்டம்?

பட்ஜெட் மாடல்கள்

லிவா காரைவிட குறைவான விலை கார் மாடல்களை இந்தியாவில் அறிமுகம் செய்யும் திட்டம் இல்லை என டொயோட்டா கூறி வருகிறது. அதேநேரத்தில், நிசான் நிறுவனம் டட்சன் பிராண்டில் கார்களை அறிமுகம் செய்தது போன்று, டைகட்சூ பிராண்டில் குறைவான விலை மாடல்களை அறிமுகம் செய்வதற்கான வர்த்தக வாய்ப்புகள் குறித்து டொயோட்டா ஆய்வு செய்து வருகிறது.

டைகட்சூ கார் இறக்குமதி

இந்த ஆண்டு துவக்கத்தில் ஆராய்ச்சி மற்றும் மேம்பாட்டு பணிகளுக்காக டைகட்சூ டெரியோஸ் மினி எஸ்யூவி ஒன்று இத்தாலியிலிருந்து நம் நாட்டுக்கு இறக்குமதி செய்யப்பட்டது. இந்த டைகட்சூ டெரியோஸ் கார் மாடல் ஏற்கனவே நம் நாட்டில் பிரிமியர் ரியோ என்ற பெயரில் விற்பனை செய்யப்படுகிறது. இது டொயோட்டா ரஷ் அடிப்படையிலான மாடல்தான். அதேநேரத்தில், புதிய தலைமுறை டைகட்சூ டெரியோஸ் மாடலையே டொயோட்டா பரிசீலிதத்து வருவதாகவும் கூறப்படுகிறது.

வாய்ப்பு

பொதுவாக, ஜப்பானிய கார் நிறுவனங்கள் இந்தோனேஷியாவில் விற்பனையாகும் அல்லது அறிமுகமாகும் கார் மாடல்களை இந்தியாவில் அறிமுகம் செய்வது வாடிக்கை. எனவே, தற்போது டைகட்சூ பிராண்டிலான மாடல்கள் இந்தோனேஷியாவில் விற்பனை செய்யப்படுவதால், முக்கிய உதிரிபாகங்களை இந்தியாவில் இறக்குமதி செய்து அசெம்பிள் செய்ய வாய்ப்புள்ளது.

அறிமுகம் எப்போது?

டைகட்சூ பிராண்டை அறிமுகம் செய்வதில் டொயோட்டா அவசரப்படவில்லை என்பது தெரிகிறது. எனவே, வரும் 2017ம் ஆண்டில் அல்லது 2018ம் ஆண்டில் டைகட்சூ பிராண்டை இந்தியாவில் அறிமுகம் செய்வதற்கான திட்டத்துடன், காய்களை நகர்த்தி வருகிறது.

சாத்தியக்கூறுகள்...

தற்போது டொயோட்டா கிர்லோஸ்கர் இந்தியா நிறுவனத்தின் கார் விற்பனை லாபகரமான பாதையில் செல்கிறது. மேலும், இந்திய வர்த்தகம் வலுவானதாகவும், லாபகரமானதாகவும் இருப்பதால், ஜப்பானிய தலைமையகம் இந்திய அதிகாரிகள் சொல்லும் திட்டங்களுக்கு முக்கியத்துவம் கொடுத்து வருகின்றனர். எனவே, டைகட்சூ கார் பிராண்டு வருவதற்கான சாத்திக்கூறுகள் அதிகம் தென்படுகின்றன.