4 கதவுகளுடன் புதிய மஹிந்திரா எலக்ட்ரிக் கார் விற்பனைக்கு வந்தது- விபரம்!

ஏற்கனவே விற்பனையில் இருக்கும் மஹிந்திரா இ2ஓ காரின் அடிப்படையில் சில டிசைன் மாறுதல்களுடன் இந்த புதிய மாடல் வந்துள்ளது. மஹிந்திரா நிறுவனத்தின் நவீன பாரம்பரியத்திலான க்ரில் அமைப்பு, ஹெட்லைட், புதிய பம்பர் அமைப்புடன் வந்திருக்கிறது. 4 கதவுகளுடன் வெகு நேர்த்தியாக மாற்றங்கள் செய்யப்பட்டுள்ளன. அலாய் வீல்கள் கவர்ச்சியளிக்கிறது.

பி4 மற்றும் பி6 ஆகிய வேரியண்ட்டுகளில் 48V திறன் கொண்ட பேட்டரி உள்ளது. இந்த பேட்டரியுடன் 3 ஃபேஸ் இன்டக்ஷன் மோட்டார் இணைக்கப்பட்டுள்ளது. இந்த மின் மோட்டார் அதிகபட்சமாக 25.4 பிஎச்பி பவரையும், 70 என்எம் டார்க்கையும் வழங்கும். இந்த மாடல் 0 100 கிமீ வேகத்தை 14.1 வினாடிகளில் எட்டும்.

இந்த மாடலில் இருக்கும் 48V பேட்டரியை முழுமையாக சார்ஜ் செய்தால் 110 கிமீ தூரம் பயணத்தை வழங்கும். முழுமையாக சார்ஜ் செய்ய 6 மணிநேரம் பிடிக்கும். விரைவு சார்ஜ் வசதி மூலமாக 75 நிமிடங்களில் சார்ஜ் செய்யும் வசதியும் உள்ளது.

பி8 வேரியண்ட்டில் 72V பேட்டரி உள்ளது. இது 2 ஃபேஸ் மின் மோட்டாருடன் இணைக்கப்பட்டிருக்கிறது. இந்த மின் மோட்டார் அதிகபட்சமாக 40 பிஎச்பி பவரையும், 91 என்எம் டார்க்கையும் வழங்கும். இந்த மாடல் 0 - 100 கிமீ வேகத்தை 9.5 வினாடிகளில் எட்டும்.

இந்த 72V பேட்டரியை முழுமையாக சார்ஜ் செய்தால் 140 கிமீ தூரம் வரை பயணிக்க முடியும். முழுமையாக சார்ஜ் செய்ய 9 மணிநேரம் பிடிக்கும். 90 நிமிடத்தில் சார்ஜ் செய்யும் வசதியும் உள்ளது.

சார்ஜ் தீர்ந்து போகும்பட்சத்தில், 5 முதல் 10 கிமீ தூரம் வரை செல்லக்கூடிய விசேஷ வசதியும் உண்டு. மலைச் சாலைகளில் செல்லும்போது உதவும் ஹில் ஸ்டார்ட் அசிஸ்ட் தொழில்நுட்பம் மிகவும் சிறப்பானது. அடுத்து பிளாபுங்கட் இன்ஃபோடெயின்மென்ட் சிஸ்டம் டாப் வேரியண்ட்டில் வழங்கப்படுகிறது.

விலை விபரம்

• மஹிந்திரா இ2ஓ ப்ளஸ் பி4: ரூ.5.46 லட்சம்
• மஹிந்திரா இ2ஓ ப்ளஸ் பி6: ரூ.5.95 லட்சம்
• மஹிந்திரா இ2ஓ ப்ளஸ் பி8: ரூ.8.46 லட்சம்

அனைத்தும் டெல்லி எக்ஸ்ஷோரூம் விலை

பி2 என்ற வேரியண்ட்டும் விற்பனைக்கு உள்ளது. ஆனால், இவை டாக்சி ஆபரேட்டர்களுக்கு மட்டுமே விற்பனை செய்யப்படும்.