பிஎம்டபிள்யூ 7 சீரிஸ் சொகுசு காரின் ஹைபிரிட் மாடல் வெளியீடு

புதிய பிராண்டு

தனது புதிய ஹைபிரிட் மாடல்களை ஐ-பெர்ஃபார்மென்ஸ் என்ற புதிய பிராண்டில் பிஎம்டபிள்யூ நிறுவனம் அறிமுகம் செய்ய இருக்கிறது. இந்த மாடல்கள் 2017 பிஎம்டபிள்யூ 704e என்ற குடும்ப வரிசையில் வெளியிடப்பட உள்ளன. இந்த வரிசையில் 740e ஐ- பெர்பார்மென்ஸ், 740Le ஐ- பெர்ஃபார்மென்ஸ் மற்றும் 740Le xDrive ஆகிய மூன்று வேரியண்ட்டுகளில் அறிமுகம் செய்யப்பட உள்ளது.

ஹைபிரிட் சிஸ்டம்

புதிய பிஎம்டபிள்யூ 7 சீரிஸ் ஹைபிரிட் காரில் 4 சிலிண்டர்கள் கொண்ட பெட்ரோல் எஞ்சின் மற்றும் எலக்ட்ரிக் மோட்டார் கொடுக்கப்பட்டிருக்கும். இரண்டும் சேர்ந்து அதிகபட்சமாக 326 எச்பி பவரை அளிக்கும். இந்த காரில் இருக்கும் இ-ட்ரைவ் என்ற பட்டனை தட்டினால், கார் முழுவதுமாக மின் மோட்டாரில் இயங்கும். பெட்ரோல் எஞ்சின் அணைந்துவிடும்.

செயல்திறன்

இந்த கார் 0 - 100 கிமீ வேகத்தை 5.5 வினாடிகளில் எட்டிவிடும். அதிகபட்சமாக மணிக்கு 250 கிமீ வேகம் வரை செல்லும் வகையில் கட்டுப்படுத்தப்பட்டுள்ளது.

ரேஞ்ச்

பேட்டரியில் இயங்கும்போது 740e வேரியண்ட் 40 கிமீ தூரமும், 740Le வேரியண்ட்டும், ஆல் வீல் டிரைவ் மாடலும் அதிகபட்சமாக 37 கிமீ தூரமும் செல்லும். நகர்ப்புறத்தில் தினசரி பயன்பாட்டிற்கு இது மிகச்சிறந்ததாக இருக்கும்.

மைலேஜ்

ஹைபிரிட் கார்களுக்கான கணக்கீடுகளின்படி, 100 கிமீ தூரம் செல்வதற்கு இந்த கார் 2.1 லிட்டர் முதல் 2.3 லிட்டர் வரை எரிபொருளை செலவிடும். அதாவது, லிட்டருக்கு 47.61 கிமீ மைலேஜ் தரும் என்று பிஎம்டபிள்யூ தெரிவிக்கிறது.

கார்பன் புகை

மைலேஜில் மட்டுமல்ல, மிக குறைவான கரியமில வாயுவை வெளியிடும் காராகவும் இருக்கும். ஒரு கிலோமீட்டருக்கு 49 கிராம் மட்டுமே கார்பனை வெளியிடுமாம்.

பேட்டரி சார்ஜ்

இந்த காரில் கொடுக்கப்பட்டிருக்கும் 9.2 kWh பேட்டரியை சார்ஜ் செய்வதற்கு 4 மணி நேரம் பிடிக்கும். பிஎம்டபிள்யூ ஐ வால்பாக்ஸ் மூலமாக வெறும் 3 மணி நேரத்தில் பேட்டரியை முழுமையாக சார்ஜ் செய்துவிடலாம்.

டிரைவிங் ஆப்ஷன்

2017 பிஎம்டபிள்யூ 7 சீரிஸ் காரில் Eco, Pro, Comfort மற்றும் Sport ஆகிய நான்குவிதமான டிரைவிங் மோடுகளில் இயங்கும் வசதி கொடுக்கப்பட்டிருக்கிறது.

அறிமுகம்

தற்போது இந்த காரின் சில முக்கிய விபரங்களையும், படங்களையும் ஆன்லைனில் பிஎம்டபிள்யூ வெளியிட்டு இருக்கிறது. இந்தநிலையில், அடுத்த மாதம் ஜெனீவா மோட்டார் ஷோவில் இந்த கார் முறைப்படி, பார்வைக்கு அறிமுகம் செய்யப்பட இருக்கிறது. அப்போது, இந்த காரின் முழுமையான விபரங்கள் வெளியிடப்பட உள்ளன.