டெல்லி ஆட்டோ எக்ஸ்போவில் பங்கேற்காத நிறுவனங்கள் எவை எவை?

ராயல் என்ஃபீல்டு

ராயல் என்ஃபீல்டு நிறுவனம் ஆட்டோ எக்ஸ்போவை தவிர்த்துள்ளது. கடந்த 2014ம் ஆண்டு ஆட்டோ எக்ஸ்போவையும் ராயல் என்ஃபீல்டு தவிர்த்தது நினைவிருக்கலாம். அதேநேரத்தில், இன்று டெல்லியில் நடைபெறும் விழாவில் புதிய ஹிிமாலயன் அட்வென்ச்சர் டூரர் பைக்கை அறிமுகப்படுத்த இருக்கிறது. இந்த நிகழ்ச்சியில் எமது நிருபர் நேரடியாக வழங்கும் தகவல்களை உங்களுக்கு வழங்குகிறோம்.

பஜாஜ் ஆட்டோ

பஜாஜ் ஆட்டோ நிறுவனமும் டெல்லி ஆட்டோ எக்ஸ்போவில் இம்முறை பங்கேற்கவில்லை. ஆனால், டெல்லி ஆட்டோ எக்ஸ்போவிற்கு முன்னதாக நேற்று நடந்த விழாவில் புதிய 150 பைக் மாடலை நேற்று அறிமுகம் செய்தது. மேலும், ஆட்டோ எக்ஸ்போவிற்கு தயாராவதற்கு அதிக சிரத்தை எடுக்க வேண்டியிருப்பதாகவும் குறிப்பிட்டிருக்கிறது.

ஸ்கோடா ஆட்டோ

ஸ்கோடா ஆட்டோ நிறுவனமும் இந்த முறை டெல்லி ஆட்டோ எக்ஸ்போவில் பங்கேற்கவில்லை. எனவே, ஸ்கோடா தயாரிப்புகளை காண இயலாது. சிக்கன நடவடிக்கையாக இதனை அந்த நிறுவனம் மேற்கொண்டிருப்பதாக கருதப்படுகிறது.

ஐசிஎம்எல்

இன்டர்நேஷனல் கார்ஸ் அண்ட் மோட்டார்ஸ் லிமிடேட் நிறுவனமும் ஆட்டோ எக்ஸ்போவை தவிர்த்திருக்கிறது.

பாரத் பென்ஸ்

ஆட்டோ எக்ஸ்போவில் கார் மற்றும் இருசக்கர வாகனங்களுக்கே அதிக முக்கியத்துவம் இருக்கும் என்பதால், ஆட்டோ எக்ஸ்போவில் பங்கேற்கவில்லை என்று பாரத் பென்ஸ் நிறுவனம் தெரிவித்துள்ளது.

வால்வோ

வால்வோ பஸ் மற்றும் டிரக் தயாரிப்பு நிறுவனமும் ஆட்டோ எக்ஸ்போவில் பங்கேற்கவில்லை.

ஹார்லி டேவிட்சன்

இந்தமுறை ஆட்டோ எக்ஸ்போவில் ஹார்லி டேவிட்சன் நிறுவனமும் பங்கேற்கவில்லை. இது ஹார்லி பிரியர்களுக்கு ஏமாற்றத்தை தரும் விஷயமாகவே அமைந்துள்ளது.

புதிய யுக்தி

டெல்லி ஆட்டோ எக்ஸ்போவிற்கு தயாராவதற்கும், அரங்கை நிர்வகிப்பதற்கும் அதிக அளவில் மனித ஆற்றலும், பொருட் செலவும் தேவைப்படுகிறது. எனவே, பல முன்னணி நிறுவனங்கள் கூட டெல்லி ஆட்டோ எக்ஸ்போவை தவிர்க்கத் துவங்கியிருக்கின்றன. அதேநேரத்தில், டெல்லி ஆட்டோ எக்ஸ்போவிற்கு முன்னதாகவே, தமது புதிய தயாரிப்புகளை அவை வெளியிட்டு வருவது கவனித்தக்கது.