சியாஸ் -RS மாடல்களின் விற்பனையை நிறுத்துகிறது மாருதி சுசுகி?

பார்வைக்கு அட்டகாசமான Muscular Sporty look தோற்றத்துடனும், காற்றை கிழித்துச் செல்ல உதவும் ரியர் ஸ்பாய்லர்களை கொண்டதோடு, ஏபிஎஸ் பிரேக்கிங் சிஸ்டம், மாற்றியமைக்கப்பட்ட ஃபிரண்ட் மற்றும் ரியர் பம்பர்கள், உட்புறத்தில் மிகவும் சவுகரியம் வாய்ந்ததாகவும், நவீன பாதுகாப்பு அம்சங்களை உள்ளடக்கியதாகவும் சியாஸ்- RS மாடல் உள்ளது.

இந்நிலையில், மாருதி சுசுகி நிறுவனம் சியாஸ் -RS மாடல் கார்களின் விற்பனையை நிறுத்தியிருப்பதாக தெரிகிறது. இது குறித்த அதிகாரப்பூர்வ செய்தி வெளியாகாத நிலையில் அந்நிறுவனத்தின் வெப்சைட்டிலிருந்து சியாஸ் -RS மாடல் நீக்கப்பட்டுள்ளது.

நடப்பாண்டில் புதிதாக 9 மாடல்களை மாருதி சுசுகி நிறுவனம் அறிமுகப்படுத்த உள்ளதால், சியாஸ் -RS மாடல் நீக்கப்பட உள்ளதாக தெரிய வருகிறது. மேலும், வாடிக்கையாளர்களிடம் போதிய வரவேற்பின்மையும் ஒரு காரணமாக இருக்கலாம் எனவும் கூறப்படுகிறது.

இதன் விலை, பெட்ரோல் மாடல் ரூ. 9.20 லட்சத்திலிருந்தும், டீசல் மாடல் ரூ. 10.28 லட்சத்திலிருந்தும் தொடங்குகிறது, 5 ஸ்பீடு மேனுவல் கியர் பாக்ஸ் கொண்ட சியாஸ் - RS, 7 வண்ணங்களில் விற்பனைக்கு கிடைக்கிறது. மாருதியின் பிரத்யேக நெக்ஸா ஷோரூம்களில் தற்போது கையிருப்பில் உள்ள சியாஸ் -RS மாடல் கார்கள் மட்டும் விற்பனையாகிறது என்பது குறிப்பிடத்தக்கது.

சியாஸ் - RS விற்பனை நிறுத்தப்பட்டாலும், ரெகுலர் மாடலான சியாஸ் விற்பனையில் எந்த பாதிப்பும் இல்லை.