டாடா ஹெக்ஸா காரை ஆன்லைனில் புக்கிங் செய்யும் வசதி அறிமுகம்!

டாடாவின் பிரத்யேக இம்பேக்ட் டிசைனில் கடந்த ஜனவரியில் அறிமுகப்படுத்தப்பட்டது ஹெக்ஸா எஸ்யுவி கார். இக்காரை வாங்க விரும்பும் வாடிக்கையாளர்களின் இனி ஆன்லைனிலேயே புக் செய்து கொள்ளும் வகையில் புதிய வசதியை டாடா ஏற்படுத்தியுள்ளது.

டாடாவின் துணை நிறுவனம் ‘க்ளிக்', இது ஒரு மின் வணிக இணையதளமாகும். கடந்த ஆண்டு அறிமுகப்படுத்தப்பட்ட க்ளிக்கில் மின்சாதன பொருட்கள், ஆடல் அனிகலன்கள், காலணிகள் என பல்வேறு பொருட்களும் விற்பனைக்கு கிடைக்கின்றன.

இந்த க்ளிக் இணையதளத்தில் தனது ஹெக்ஸா எஸ்யுவி காரை, முன்பணமாக 11,000 ஆயிரம் ரூபாய் செலுத்தி ஆன்லைனில் புக்கிங் செய்யும் வசதியை ஏற்படுத்தியுள்ளது டாடா நிறுவனம். வாடிக்கையாளர்களுக்கு ஹெக்ஸா கார்கள் எளிமையாக சென்றடையும் வகையில் இந்த வசதியை ஏற்படுத்தியுள்ளது டாடா நிறுவனம்.

இது குறித்து கருத்து தெரிவித்த டாடா க்ளிக் நிறுவனத்தின் தலைமை செயல் அதிகாரி, அஷுதோஷ் பாண்டே, "ஸ்டைல், சிறப்பம்சங்கள் மற்றும் செயல்திறன் ஆகிய கலவையால் உருவாக்கப்பட்டதே டாடா ஹெக்ஸா கார். இப்புதிய காரை ஆன்லைனில் புக் செய்யும் வசதி ஏற்படுத்தப்பட்டுள்ளது வாடிக்கையாளர்களை பெரிதும் கவரும்" என்றார்.

இதே போல, டாடா மோட்டார்ஸ் நிறுவனத்தின் வர்த்தகப் பிரிவு தலைவர், விவேக் ஸ்ரீவஸ்தா இது குறித்து கூறுகையில், "இளம் தலைமுறை வாடிக்கையாளர்களை இலக்காக கொண்டு நாங்கள் செயல்படுவதால், இப்புதிய வசதி ஹெக்ஸா காரை இளைஞர்களிடம் எளிமையாக சென்று சேர்க்கும்" என்றார்.

டாடா ஹெக்ஸா எஸ்யுவி காரில், அடுத்த தலைமுறை 2.2 லிட்டர் வேரிகோர் 400 இஞ்சின் பொருத்தப்பட்டுள்ளது, இவை அதிகபட்சமாக 153.6 பிஹச்பி ஆற்றலை வெளிப்படுத்தும் திறன் மிக்கவை ஆகும். இதில் 6 ஸ்பீடு கியர் பாக்ஸ் உள்ளது. ஆட்டோமேடிக் கியர் பாக்ஸ் ஆப்ஷனலாகவும் கிடைக்கிறது.

டாடா ஹெக்ஸா எக்ஸ்இ, எக்ஸ் எம், எக்ஸ்டி, எக்ஸ்எம்ஏ, எக்ஸ்டிஏ மற்றும் எக்ஸ்டி 4*4 ஆகிய 6 வேரியண்டுகளில் கிடைக்கிறது. இதன் விலை ரூ.11.99 லட்சம் (டெல்லி எக்ஸ் ஷோரூம்) என்ற விலையில் இருந்து தொடங்குகிறது.