பாதுகாப்பிற்கு உத்தரவாதம் இல்ல... இந்த காரை வச்சிருக்கவங்க கொஞ்சம் பத்திரமா இருந்துக்கோங்க... வீடியோ!

இந்தியாவில் வைத்து தயாரிக்கப்பட்ட வாகனங்களை ஃபிரெஞ்சு நிறுவனமான ரெனால்ட் உலக நாடுகள் சிலவற்றிற்கு ஏற்றுமதி செய்து வருகின்றது. அந்தவகையில், ஆப்பிரிக்கா நாட்டின் சந்தைக்கான க்விட் கார்களை இந்தியாவில் இருந்தே ரெனால்ட் ஏற்றுமதி செய்கின்றது.

இந்தியாவில் வைத்து ஆப்பிரிக்காவிற்காக தயாரிக்கப்பட்ட இந்த க்விட் காரே மோதல் பரிசோதனையில் தற்போது மண்ணைக் கவ்வியிருக்கின்றது. குளோபல் என்சிஏபி வெளியிட்டிருக்கும் அறிக்கையின் அடிப்படையிலேயே இந்த தகவல் வெளியுலகிற்கு தெரியவந்துள்ளது.

சந்தைக்கு விற்பனைக்கு வரும் புதுமுக கார்களை மோதல் பரிசோதனைக்கு உட்படுத்தி அதுகுறித்த தகவல்களை குளோபல் என்சிஏபி வெளியிட்டு வருகின்றது. அந்தவகையில், ரெனால்ட் க்விட் காரின் க்ராஷ் டெஸ்ட் பற்றிய தகவலை இது வெளியிட்டிருக்கின்றது.

தற்போது வெளியாகியிருக்கும் தகவலின்படி, பெரியவர்களின் பாதுகாப்பில் இரு நட்சத்திரங்களையும், குழந்தைகளின் பாதுகாப்பில் இரு நட்சத்திரங்களையும் ரெனால்ட் க்விட் கார் பெற்றிருப்பது தெரியவந்துள்ளது. அதாவது, பெரியவர்களின் பாதுகாப்பில் 17க்கு 7.78 புள்ளிகளையும், குழந்தைகளின் பாதுகாப்பில் 49க்கு 19.68 புள்ளிகளை மட்டுமே இக்கார் பெற்றிருக்கின்றது.

இந்த குறைந்த புள்ளிகளின் காரணத்தினாலயே குளோபல் என்சிஏபி இக்காருக்கு இரண்டு நட்சத்திரங்களை மட்டுமே வழங்கியிருக்கின்றது. இதே கார் கடந்த 2016ம் ஆண்டில் நிகழ்த்தப்பட்ட மோதல் பரிசோதனையில் பூஜ்ஜியம் ஸ்டார்களை மட்டுமே பெற்றிருந்தது குறிப்பிடத்தகுந்தது.

இந்த நிலையில் தற்போதைய இரண்டு நட்சத்திரங்கள் வரவேற்பளிக்கும் வகையில் இருக்கின்றது. இருப்பினும், இது பயணிகளின் பாதுகாப்பை கேள்விக் குறியாக்கக் கூடிய ரேட்டிங் என்பதை நாம் மனதில் வைத்துக் கொள்ள வேண்டும். மேலும், இது ஆப்பிரிக்க சந்தைக்கான மாடல் என்பதையும் கவனிக்க வேண்டும்.

ஆப்பிரிக்கா நாட்டிற்காக தயாராகும் க்விட் கார்களில் பாதுகாப்பு வசதிக்காக இரு ஏர் பேக் வழங்கப்பட்டுள்ளது. இதுபோன்ற குறிப்பிட்ட மேலும் சில அம்சங்கள் வழங்கப்பட்டிருக்கின்றன. ஆனால், அனைத்து இருக்கைகளுக்கும் மும்முனை சீட் பெல்ட் வழங்கப்படாதது, குழந்தைகளுக்கான ஐசோஃபிக்ஸ் இருக்கை கொடுக்கப்படாதது உள்ளிட்ட காரணங்களினாலயே க்விட் கார் இரு நட்சத்திரங்களைப் பெற்றிருக்கின்றது.

மேலும், விபத்து போன்ற கசப்பான நேரங்களில் முன் பக்க பயணிகளுக்கு போதுமான பாதுகாப்பு வசதி இல்லாததும் கண்டறியப்பட்டுள்ளது. அதிலும், டிரைவரின் மார்பகம், தொடை மற்றும் கனுக்கால் ஆகிய பகுதிகளுக்கு மிகவும் ஆபத்தான சூழல் நிலவுவதாக தற்போதைய பரிசோதனையின் முடிவுகள் தெரிவிக்கின்றன.

இதேபோன்று, ஓட்டுநரின் சக பயணியின் வல தொடைப் பகுதி மற்றும் மார்பக பகுதிக்கு லேசான காயங்கள் ஏற்படக்கூடிய சூழல் நிலவுகின்றது. இதேபோன்ற காரணங்களினாலயே இக்காரின் பாதுகாப்பு தரம் தற்போது கேள்விக் குறியாக மாறியுள்ளது. ரெனால்ட் நிறுவனத்தின் அதிகம் விற்பனையாகும் கார்களில் இதுவும் ஒன்று குறிப்பிடத்தகுந்தது. இந்த கார் ஆப்பிரிக்காவிற்கான காராக இருந்தாலும் மிகக் குறைவான மதிப்பெண்களைப் பெற்றிருப்பது அனைவருக்குமே அதிர்ச்சியை ஏற்படுத்தியுள்ளது.