ஜீப் காம்பஸ் ஃபேஸ்லிஃப்ட் இந்திய அறிமுக தேதி விபரம் வெளியானது!

மிட்சைஸ் எஸ்யூவி மார்க்கெட்டில் பிரிமீயம் ரக மாடலாக ஜீப் காம்பஸ் விற்பனையில் நிலைநிறுத்தப்பட்டுள்ளது. பாரம்பரியம் மிக்க ஜீப் நிறுவனத்தின் கெத்தான டிசைன் அம்சங்கள் காம்பஸ் எஸ்யூவிக்கு சிறப்பான வர்த்தகத்தை பெற்று தந்து வருகிறது. ஆனால், பெரிய மாற்றங்கள் இல்லாமல் தொடர்ந்து விற்பனை செய்யப்படுவதால், வாடிக்கையாளர்களிடம் மவுசு குறைந்து வருகிறது.

இந்த நிலையில், மிட்சைஸ் எஸ்யூவி மார்க்கெட்டில் அதிகரித்துள்ள போட்டியை மனதில் வைத்து, வடிவமைப்பிலும், வசதிகளிலும் ஜீப் காம்பஸ் எஸ்யூவி மேம்படுத்தப்பட்டு இருக்கிறது.

அண்மையில் சீனாவில் நடந்த குவாங்ஸோ ஆட்டோ எக்ஸ்போவில் வைத்து ஜீப் காம்பஸ் ஃபேஸ்லிஃப்ட் மாடல் பொது பார்வைக்கு கொண்டு வரப்பட்டது. இந்த நிலையில், அடுத்த மாதம் 23ந் தேதி இந்தியாவில் புதிய ஜீப் காம்பஸ் எஸ்யூவி இந்தியாவில் அறிமுகம் செய்யப்பட உள்ளதாக டீம் பிஎச்பி தள செய்தி தெரிவிக்கிறது.

புதிய ஜீப் காம்ப்ஸ எஸ்யூவியில் புதிய க்ரில் அமைப்பு, பம்பர் இடம்பெற்றுள்ளது. எல்இடி ஹெட்லைட்டுகள் கொடுக்கப்பட்டுள்ளன. அதேபோன்று, உட்புறத்தில் டேஷ்போர்டு டிசைனில் மாற்றங்கள் செய்யப்பட்டு இருக்கிறது.

புதிய ஜீப் காம்பஸ் எஸ்யூவியில் 10.1 அங்குல தொடுதிரையுடன் கூடிய இன்ஃபோடெயின்மென்ட் சிஸ்டம் உள்ளது. ஆப்பிள் கார் ப்ளே மற்றும் ஆன்ட்ராய்டு ஆட்டோ செயலிகளை சப்போர்ட் செய்யும் வசதி, அமேஸான் அலெக்ஸா செயலியை சப்போர்ட் செய்யும் வாய்ப்புகள் இடம்பெற்றிருக்கின்றன.

இந்த புதிய மாடலில் டிஜிட்டல் இன்ஸ்ட்ரூமென்ட் க்ளஸ்ட்டர், 3 ஸ்போக் ஸ்டீயரிங் வீல் ஆகியவை கொடுக்கப்பட்டு இருக்கும். இதன்மூலமாக, வாடிக்கையாளர்களை வெகுவாக கவர்வதற்கான வாய்ப்பு உள்ளது.

புதிய ஜீப் காம்பஸ் எஸ்யூவியில் 2.0 லிட்டர் டீசல் எஞ்சின் மற்றும் 1.4 லிட்டர் டர்போ பெட்ரோல் எஞ்சின் தேர்வுகள் தக்க வைக்கப்படும். டீசல் எஞ்சின் அதிகபட்சமாக 170 பிஎச்பி பவரையும், 350 என்எம் டார்க் திறனையும் வழங்கும். பெட்ரோல் எஞ்சின் 161 பிஎச்பி பவரையும், 250 என்எம் டார்க் திறனையும் வெளிப்படுத்தும் திறன் பெற்றிருக்கும்.

பெட்ரோல், டீசல் எஞ்சின் தே்வுகளில் 6 ஸ்பீடு மேனுவல் கியர்பாக்ஸ் தேர்வு வழங்கப்படும். அதேபோன்று, பெட்ரோல் மாடலில் 7 ஸ்பீடு டியூவல் க்ளட்ச் ஆட்டோமேட்டிக் கியர்பாக்ஸ் தேர்வும், டீசல் மாடலில் 9 ஸ்பீடு ஆட்டோமேட்டிக் கியர்பாக்ஸ் தேர்வும் ஆப்ஷனலாக கிடைக்கும்.