பழமை மாறாத தோற்றத்துடன் தயாராகும் 2021 ஜீப் வாகோனீர்... புதிய டீசர் படம் வெளியீடு...

ஜீப் வாகோனீரின் செப்டம்பர் 3ஆம் தேதி உலகளாவிய அறிமுகத்திற்கு முன்னதாக வெளியாகியுள்ள இந்த டீசர் படங்கள் காரின் வெளிப்புற அவுட்லைன் மற்றும் வடிவம் எவ்வாறு இருக்கும் என்பதை வெளிக்காட்டுகின்றன.

மேலும் இதன் மூலம் பார்க்கும்போது இந்த புதிய மாடல் ஜீப் க்ராண்ட் செரோக்கியுடன் பெரிய அளவில் ஒத்திருக்கும் என்பதையும் அறிய முடிகிறது. மற்றப்படி அறிமுகம் குறித்த வேறெந்த தகவலும் இந்த டீசர் படத்தில் குறிப்பிடப்படவில்லை. ஆனால் நமக்கு புதிய ஜீப் வாகோனீர் செப்டம்பர் 3ஆம் தேதி உலகளவில் அறிமுகமாகவுள்ள விஷயம் ஏற்கனவே தெரியும்.

செரோக்கியுடன் தோற்றத்தில் பெரிய அளவில் ஒத்துபோனாலும், வாகோனீர் மாடலும் தனது அடையாளத்திற்காக சில டிசைன் பாகங்களை கொண்டுள்ளது. குறிப்பாக சொல்ல வேண்மென்றால், வாகனத்தின் முன்பக்க க்ரில்.

1965 வாகோனீர் உடன் ஒத்த டிசைனில் தற்போது வடிவமைக்கப்பட்டு இந்த 2021 மாடலில் பொருத்தப்பட்டுள்ள இந்த க்ரில் தான் 2018 காட்சிப்படுத்தப்பட்ட வாகோனீர் ரோடுட்ரிப் கான்செப்ட் மாடலில் வழங்கப்பட்டு இருந்தது. இந்த க்ரில் அமைப்பில் பழமையான வாகோனீர் மாடல்களில் உள்ளதை போன்று க்ரோம் கொடுக்கப்பட்டுள்ளது.

மற்றப்படி 2021 வாகோனீரின் உட்புற கேபினில் வழங்கப்பட்டுள்ள அம்சங்கள் பற்றி பெரிய அளவில் எதையும் அறிய முடியவில்லை. இருப்பினும், ஜீப் நிறுவனம் கடைசியாக வெளியிட்டு இருந்த இந்த காரின் உட்புற படங்கள் மூலம் ரோட்டரி க்னாப், 12 இன்ச்சில் சட்டகம் இல்லாத இன்போடெயின்மெண்ட் சிஸ்டம் உள்ளிட்ட சில வசதிகள் இந்த காரின் கேபினில் இருக்கும் என்பதை அறிந்திருந்தோம்.

இந்த 2021 மாடலில் பொருத்தப்பட்டுள்ள என்ஜின் அமைப்புகள் குறித்த விபரங்கள் தற்போதைக்கு கிடைக்கவில்லை. ஜீப் வாகோனீர் அறிமுகமாகும் அதே சமயத்தில் வெளிவரவுள்ள ராம் 1500 ஹைப்ரீட் என்ஜின் அமைப்பை பெற்றுவரும் என எதிர்பார்க்கப்படுகிறது.

ஜீப் நிறுவனம் வாகோனீர் மாடலை வாகோனீர் மற்றும் நீண்ட வீல்பேஸ் கொண்ட க்ராண்ட் வாகோனீர் என்ற இரு விதமான வேரியண்ட்களில் சந்தைப்படுத்தவுள்ளது. வாகோனீரின் தயாரிப்பு பணிகள் 2021ஆம் ஆண்டின் இரண்டாம் கால்பகுதியில் துவங்கவுள்ளதாக தகவல்கள் கூறுகின்றன.