டொயோட்டா இன்னோவா க்ரிஸ்ட்டாவிற்கு மாற்று தேடி கொண்டுள்ளீர்களா? குறைவான விலையில் வருகிறது புதிய எம்பிவி கார்!

இந்தியாவின் நம்பர்-1 கார் உற்பத்தி நிறுவனமான மாருதி சுஸுகி, மீண்டும் ஒரு முறை சிறப்பான விற்பனை எண்ணிக்கையை பதிவு செய்துள்ளது. கடந்த நவம்பர் மாதம் மாருதி சுஸுகி நிறுவனம் 1.35 லட்சத்திற்கும் மேற்பட்ட வாகனங்களை விற்பனை செய்துள்ளது. ஆனால் இங்கே ஆச்சரியம் என்னவென்றால், கடந்த 2019ம் ஆண்டு நவம்பர் மாதத்துடன் ஒப்பிடுகையில் இது சுமார் 2 சதவீத வீழ்ச்சியாகும்.

ஒட்டுமொத்த விற்பனையில் சிறிய வீழ்ச்சியை சந்தித்திருந்தாலும் கூட, மாருதி சுஸுகி நிறுவனத்தின் எம்பிவி கார்களான எர்டிகா மற்றும் எக்ஸ்எல்6 ஆகிய இரண்டு கார்களும் சிறப்பான விற்பனை எண்ணிக்கையை பதிவு செய்துள்ளன. கடந்த நவம்பர் மாதம் மாருதி சுஸுகி நிறுவனம் 9,557 எர்டிகா கார்களை விற்பனை செய்துள்ளது.

இதன் மூலம் இந்தியாவில் அதிகம் விற்பனை செய்யப்படும் எம்பிவி கார் என்ற பெருமையை மீண்டும் ஒரு முறை எர்டிகா பெற்றுள்ளது. அதே நேரத்தில் கடந்த 2019ம் ஆண்டு நவம்பர் மாதம் மாருதி சுஸுகி நிறுவனம் 7,537 எர்டிகா கார்களை மட்டுமே விற்பனை செய்திருந்தது. இது 26.8 சதவீத வளர்ச்சியாகும். அக்டோபர் மாதத்துடன் ஒப்பிட்டாலும் மாருதி சுஸுகி எர்டிகா விற்பனையில் வளர்ச்சியை பதிவு செய்துள்ளது.

நடப்பாண்டு அக்டோபர் மாதம் மாருதி சுஸுகி நிறுவனம் 7,748 எர்டிகா கார்களை மட்டுமே விற்பனை செய்திருந்தது. ஆனால் அதன்பின் வந்த நவம்பரில் இந்த எண்ணிக்கை 9,557 ஆக உயர்ந்துள்ளது. இது 23.34 சதவீத வளர்ச்சியாகும். இதுவே மாருதி சுஸுகி எக்ஸ்எல்6 காரை எடுத்து கொண்டால், கடந்த நவம்பர் மாதம் 3,388 யூனிட்கள் விற்பனை செய்யப்பட்டுள்ளன.

ஆனால் 2019ம் ஆண்டு நவம்பரில் இந்த எண்ணிக்கை 2,295 ஆக இருந்தது. இது 54.35 சதவீத வளர்ச்சியாகும். இதுவே அக்டோபர் மாதத்துடன் ஒப்பிட்டால், மாருதி சுஸுகி எக்ஸ்எல்6 கார் 39.9 சதவீத வளர்ச்சியை பதிவு செய்துள்ளது. நடப்பாண்டு அக்டோபர் மாதம் மாருதி சுஸுகி நிறுவனம் 2,439 எக்ஸ்எல்6 கார்களை மட்டுமே விற்பனை செய்திருந்தது. அதன்பின் வந்த நவம்பரில் இந்த எண்ணிக்கை 3,388 ஆக உயர்ந்துள்ளது.

எர்டிகா, எக்ஸ்6 ஆகிய கார்களுடன் விட்டாரா பிரெஸ்ஸா மற்றும் எஸ்-க்ராஸ் ஆகிய கார்களின் விற்பனையும் சிறப்பாக இருப்பதால், யுடிலிட்டி வாகனங்கள் பிரிவில் மாருதி சுஸுகி நிறுவனம் சிறப்பான வெற்றியை ருசித்து வருகிறது. எனவே அடுத்த மூன்று ஆண்டுகளில், புதிதாக மேலும் 5 யுடிலிட்டி வாகனங்களை விற்பனைக்கு அறிமுகம் செய்ய மாருதி சுஸுகி நிறுவனம் திட்டமிட்டுள்ளது.

இதில், முதல் கார் புத்தம் புதிய எம்பிவி ரகத்தை சேர்ந்த மாடலாக இருக்கும். இந்த புதிய எம்பிவி வரும் 2021ம் ஆண்டு விற்பனைக்கு அறிமுகம் செய்யப்படும் என எதிர்பார்க்கப்படுகிறது. மாருதி சுஸுகி நிறுவனத்தின் இந்த புதிய எம்பிவி கார், எக்ஸ்எல்6 காருக்கு மேலாக நிலைநிறுத்தப்படும். மஹிந்திரா மராஸ்ஸோ உள்ளிட்ட மாடல்களுடன் இது போட்டியிடும்.

இந்த புதிய எம்பிவி கார் இந்திய சந்தையில் டொயோட்டா பிராண்டின் கீழும் விற்பனை செய்யப்படும் என எதிர்பார்க்கப்படுகிறது. அப்படி நடந்தால், டொயோட்டா இன்னோவா க்ரிஸ்ட்டா எம்பிவி காருக்கான விலை குறைந்த மாற்றாக இந்த புதிய கார் இருக்கலாம். சுஸுகி நிறுவனத்துடனான கூட்டணியின் அடிப்படையில் இந்தியாவில் மாருதி சுஸுகி கார்களை டொயோட்டா நிறுவனம் ரீபேட்ஜ் செய்து விற்பனை செய்து வருகிறது என்பது குறிப்பிடத்தக்கது.