எம்ஜி நிறுவனத்தின் டிசம்பர் ஆஃபர்... ரூ.40,000 வரை சேமிக்கும் வாய்ப்பு!

ஆண்டு இறுதியை நெருங்கி வரும் நிலையில், இருப்பில் உள்ள இந்த ஆண்டு தயாரிக்கப்பட்ட கார்களை விற்று தீர்க்கும் நோக்கில் கார் நிறுவனங்கள் ஆஃபர்களை அள்ளி வீசி வருகின்றன. ஆஃபர்களை அதிகம் விரும்பாத நிறுவனங்களும் இப்போது ஆஃபர்களை அறிவித்து வருகின்றன.

அந்த வகையில், எம்ஜி மோட்டார் நிறுவனம் தனது கார் மாடல்களுக்கு சிறப்பு சேமிப்புச் சலுகைகளை அறிவித்துள்ளது. கிறிஸ்துமஸ் சர்ப்ரைஸ் என்ற பெயரில் இந்த ஆஃபரை எம்ஜி நிறுவனம் அறிவித்துள்ளது.

புதிய எம்ஜி ஹெக்டர் மற்றும் இசட்எஸ் எலெக்ட்ரிக் கார் மாடல்களை வாங்கும் வாடிக்கையாளர்கள் ரூ.40,000 வரை சேமிப்பை பெறும் வாய்ப்பு உள்ளது. பழைய காரை கொடுத்து புதிய ஹெக்டர் அல்லது இசட்எஸ் எலெக்ட்ரிக் கார் வாங்குவோருக்கு ரூ.40,000 வரை எக்ஸ்சேஞ்ச் போனஸ் பெறும் வாய்ப்புள்ளது.

பழைய காரை எக்ஸ்சேஞ்ச் செய்யாதவர்களுக்கு பிரத்யேகமான காரை குறிப்பிட்ட ஆண்டுகளில் திரும்ப வழங்கினால் அதற்கு உரிய ரீசேல் மதிப்பை வழங்குவதாகவும் எம்ஜி நிறுவனம் தெரிவித்துள்ளது.

எம்ஜி ஹெக்டர் மற்றும் ஹெக்டர் ப்ளஸ் கார்களுக்கு 3 ஆண்டுகளில் 60 சதவீத ரீசேல் மதிப்பையும், இசட்எஸ் எலெக்ட்ரிக் காருக்கு 3 ஆண்டுகளில் 50 சதவீத ரீசேல் மதிப்பையும் பெறும் வாய்ப்புள்ளது.

அதேபோன்று, ரூ.25,000 மதிப்புடைய ஆக்சஸெரீகள் அல்லது 3 ஆண்டு காலத்திற்கான இலவச பராமரிப்புச் சலுகைகளையும் பெறும் வாய்ப்பு உள்ளது.

இந்த சேமிப்பு மற்றும் தள்ளுபடி சலுகைகள் ஹெக்டர், ஹெக்டர் ப்ளஸ் மற்றும் இசட்எஸ் எலெக்ட்ரிக் கார் மாடல்களுக்கு பெற முடியும். இருப்பில் உள்ள கார்களுக்கு மட்டுமே இந்த சலுகைகள் பொருந்தும் என்பதால், விரைவாக முன்பதிவு செய்வது நல்லது.

எம்ஜி கிறிஸ்துமஸ் சர்ப்ரைஸ் தவிர்த்து, எம்ஜி ரெஃபர் என்ற திட்டமும் உள்ளது. இந்த திட்டத்தின்படி, புதிய எம்ஜி கார் மாடலை வாங்க பரிந்துரை செய்யும் வாடிக்கையாளர்களுக்கு 10,000 புள்ளிகளை பெறுவதற்கான வாய்ப்பு இருக்கிறது. இதனை எம்ஜி டீலர்களில் காண்பித்து, ஆக்சஸெரீகள் மற்றும் இதர கட்டணங்களுக்கு பயன்படுத்தி கழிவு பெற முடியும்.

அதேநேரத்தில், வாடிக்கையாளரின் பரிந்துரையின் பேரில் மற்றொரு வாடிக்கையாளர் எம்ஜி காரை வாங்கிய பின்னரே இந்த சலுகையை பெற முடியும். இந்த 10,000 புள்ளிகளை 6 மாத காலத்திற்குள் பயன்படுத்த வேண்டும் என்பதுடன், ஒருவேளை காரை விற்கும்போது மற்றொரு வாடிக்கையாளருக்கு மாற்றிக் கொடுக்க இயலாது என்பதும் நிபந்தனையாக தெரிவிக்கப்பட்டுள்ளது.