சாலையில் சறுக்கிச் செல்லும் சாகசத்தில் கின்னஸ் சாதனை படைத்த போர்ஷே டைகன் கார்!

எலெக்ட்ரிக் கார்களுக்கான முக்கியத்துவம் உலக அளவில் குறிப்பிடத்தக்க அளவு அதிகரித்து வருகிறது. இதனால், எலெக்ட்ரிக் கார் தயாரிப்பில் அனைத்து முன்னணி நிறுவனங்களும் களமிறங்கி உள்ளன. மேலும், தங்களது எலெக்ட்ரிக் காரின் திறனை வாடிக்கையாளர்களுக்கும், கார் பிரியர்களுக்கும் உணர்த்தும் வகையில் பல்வேறு யுக்திகளையும் கையாண்டு வருகின்றனர்.

அந்த வகையில், போர்ஷே நிறுவனம் தனது டைகன் எலெக்ட்ரிக் கார் குறித்து உலக அளவில் கவனத்தை ஈர்க்கும் வகையில் புதிய முயற்சியை மேற்கொண்டு வெற்றி கண்டுள்ளது.

அதாவது, டைகன் காரில் அதிக தூரம் சாலையில் சறுக்கிச் செல்லும் சாகசத்தை நிகழ்த்தி கின்னஸ் சாதனைப் புத்தகத்தில் இடம்பிடித்துள்ளது. அதாவது, மின்சார கார் மாடல்களில் அதிக தூரம் இந்த சாதனையை படைத்த கார் மாடல் என்ற பெருமையை போர்ஷே டைகன் கார் பெற்றிருக்கிறது.

ஜெர்மனியின் ஹாக்கென்ஹெய்ம்ரிங் என்ற இடத்தில் உள்ள போர்ஷே நிறுவனத்தின் பிரத்யேக சோதனை களத்தில் இந்த முயற்சி நடந்தது. போர்ஷே நிறுவனத்தின் பயிற்றுனராக இருந்து வரும் டென்னிஸ் ரெட்டேரா டைகன் காரில் இந்த சாதனை முயற்சியில் ஈடுபட்டார்.

அந்த களத்தில் மொத்தம் 210 சுற்றுகள் டிரிஃப்ட் எனப்படும் சாகசத்தை செய்து அசத்தினார். வளைவுகளில் முன்சக்கரங்கள் எதிர் திசையில் இருக்குமாறு அவர் டிரிஃப்ட் சாகசத்தை நிகழ்த்தினார்.

மொத்தம் 42.171 கிமீ தூரத்திற்கு 55 நிமிடங்கள் வரை அவர் டைகன் காரில் டிரிஃப்ட் செய்து அசத்தினார். எலெக்ட்ரிக் காரில் நிகழ்த்தப்பட்ட அதிக தூர டிரிஃப்ட் சாதனை என்ற பெருமையை இந்த நிகழ்வு மூலமாக பதிவு செய்யப்பட்டது. மேலும், கின்னஸ் சாதனைப் புத்தகத்திலும் இந்த சாதனை பதிவு செய்யப்பட்டது.

போர்ஷே டைகன் எலெக்ட்ரிக் சூப்பர் காரின் ரியர் வீல் டிரைவ் மாடல் இந்த சாதனைக்கு பயன்படுத்தப்பட்டது. இந்த மாடலானது சீனாவில் விற்பனையில் உள்ளது. மொத்தம் 210 சுற்றுகளை சராசரியாக மணிக்கு 46 கிமீ வேகத்தில் இந்த டிரிஃப்ட் சாதனையை நிகழ்த்தி இருக்கிறார் ரெட்டேரா.

இதுகுறித்து டென்னிஸ் ரெட்டேரா கூறுகையில்,"டிரிஃப்ட் சாகசத்திற்காக அதிக நிலைத்தன்மை மற்றும் பாதுகாப்புக்காக காரில் வழங்கப்பட்டு இருக்கும் தொழில்நுட்பங்களை அணைத்துவிட்டு காரை இயக்கினேன். அப்போது மிக எளிதாக இருந்ததுடன், போதுமான அளவு பவர் தொடர்ந்து கிடைத்ததால், சாதனையை தொடுவது சாத்தியமானது.

அதிக வீல்பேஸ் நீளம் மூலமாக சிறப்பான பேலன்ஸ் கிடைத்தது. சேஸீயும், ஸ்டீயரிங் சிஸ்டமும் அனைத்து நேரங்களிலும் சிறப்பான கட்டுப்பாட்டை காருக்கு வழங்கியது. களத்தின் அனைத்து இடங்களிலும் தரைப்பிடிப்பு ஒரே மாதிரியாக இல்லை. எனினும், ஸ்டீயரிங் சிஸ்டம் மற்றும் சரியான அளவு ஆக்சிலரேட்டரை கொடுப்பதில் கவனம் செலுத்தி இந்த சாகசத்தை நிறைவு செய்தேன்," என்று தெரிவித்துள்ளார்.