தீபாவளிக்கு ரிலீசாகிறது புதிய சிட்ரோன் சப்-காம்பேக்ட் எஸ்யூவி... கியா சொனெட் போட்டியாளர்

பிரான்ஸ் நாட்டை சேர்ந்த பிஎஸ்ஏ குழுமத்தின் கீழ் செயல்பட்டு வரும் சிட்ரோன் நிறுவனம் விரைவில் இந்தியாவில் கார் வர்த்தகத்தை துவங்க இருக்கிறது. இந்த மாத துவக்கத்தில் தனது முதல் மாடலான சி5 ஏர்க்ராஸ் எஸ்யூவியை அதிகாரப்பூர்வமாக இந்தியாவில் வெளியிட்டது. அடுத்த மாதம் இந்த புதிய மாடல் விற்பனைக்கு வர இருக்கிறது.

இந்த புதிய மாடல் ரூ.25 லட்சம் முதல் ரூ.30 லட்சம் இடையிலான விலையில் பிரிமீயம் மிட்சைஸ் எஸ்யூவி மாடலாக வர இருக்கிறது. இந்த நிலையில், சிட்ரோன் நிறுவனத்தின் இரண்டாவது கார் மாடல் குறித்த விபரம் வெளியாகி இருக்கிறது.

அதாவது, இந்திய கார் சந்தையில் அதிக வர்த்தக வளம் மிக்க சப்-காம்பேக்ட் ரக எஸ்யூவி மார்க்கெட்டில் தனது புதிய காரை களமிறக்க சிட்ரோன் திட்டமிட்டுள்ளதாக எக்கனாமிக் டைம்ஸ் ஆட்டோ தள செய்தி தெரிவிக்கிறது.

வரும் ஆகஸ்ட் அல்லது செப்டம்பர் மாதத்தில் இந்த புதிய சிட்ரோன் சப்-காம்பேக்ட் எஸ்யூவியின் உற்பத்தி இந்தியாவில் துவங்கப்படும். இதைத்தொடர்ந்து, வரும் பண்டிகை காலத்தில் இந்த புதிய மாடலை களமிறக்க சிட்ரோன் திட்டமிட்டுள்ளது.

வெளிநாடுகளில் சி3 ஏர்க்ராஸ் என்ற பெயரில் இந்த புதிய கார் விற்பனையில் இருக்கிறது. இந்தியாவில் சி21 என்ற குறியீட்டுப் பெயரில் தற்போது சாலை சோதனைகளுக்கு உட்படுத்தி ஆய்வுகள் நடத்தப்பட்டு வருகின்றன.

பிஎஸ்ஏ குழுமத்தின் சிஎம்பி என்ற கட்டமைப்புக் கொள்கையின் கீழ் இந்த புதிய மாடல் உருவாக்கப்பட்டது. பெட்ரோல் எஞ்சின் தேர்வில் மட்டுமே இந்த கார் விற்பனைக்கு எதிர்பார்க்கப்படுகிறது. அதேநேரத்தில், இரண்டு பெட்ரோல் எஞ்சின் தேர்வுகள் வழங்கப்படும்.

இந்த காரில் வழங்கப்பட உள்ள பெட்ரோல் எஞ்சின்களுடன் மேனுவல் கியர்பாக்ஸ் தேர்வும், 1.2 லிட்டர் டர்போ பெட்ரோல் எஞ்சினில் ஆட்டோமேட்டிக் கியர்பாக்ஸ் தேர்வும் எதிர்பார்க்கப்படுகிறது.

இதைத்தொடர்ந்து மூன்றாவது மாடலாக ஹூண்டாய் க்ரெட்டா, கியா செல்டோஸ் கார்களுக்கு போட்டியான ரகத்தில் புதிய மாடலை களமிறக்க சிட்ரோன் திட்டமிட்டுள்ளது. இந்த புதிய மாடலானது சிசி24 என்ற குறியீட்டுப் பெயரில் அழைக்கப்படுகிறது. அடுத்த ஆண்டு ஜூன் மாதத்தில் விற்பனைக்கு எதிர்பார்க்கப்படுகிறது.