அச்சு அசல் மெர்சிடிஸ் ஜி-கிளாஸை போல் இருக்குல!! பார்ப்போரை எளிதில் ஏமாற்றிவிடும் வாகனம் இது!

மெர்சிடிஸ் பென்ஸ் நிறுவனத்தின் ஆஃப்-ரோடு எஸ்யூவி மாடலான ஜி-க்ளாஸ், பொதுவாக ஜி-வேகன் என அழைக்கப்படுகிறது. இந்தியாவில் கிட்டத்தட்ட ரூ.2.4 கோடி வரையிலான விலைகளில் விற்பனை செய்யப்படும் இந்த பென்ஸ் வாகனம் உலகளவில் வாடிக்கையாளர்களின் நம்பமான ஆஃப்-ரோடு வாகனங்களுள் ஒன்றாக விளங்குகிறது.

இத்தகைய காஸ்ட்லீயான மெர்சிடிஸ் தயாரிப்பை மனதில் வைத்து இந்தியாவின் டாடா மோட்டார்ஸின் சிறந்த தயாரிப்புகளுள் ஒன்றான சுமோ மாடிஃபை செய்யப்பட்டுள்ளது. இந்த மாடிஃபை வாகனம் தொடர்பான படங்கள் காடிவாடி செய்திதளம் மூலமாக நமக்கு மூலம் கிடைத்துள்ளன.

இந்த மாடிஃபை முடிவை எடுத்த டாடா சுமோ உரிமையாளருக்கு மெர்சிடிஸ் ஜி-கிளாஸ் கார் மிகவும் பிடிக்கும்போல. ஆனால் உண்மையை சொல்ல வேண்டுமென்றால் இந்த மாடிஃபை சுமோ வாகனம் ஜி-வேகன் போல் காட்சியளிக்கவில்லை.

ஜி-கிளாஸை பலர் நேரில் பார்த்திருக்க மாட்டீர்கள் என்றாலும், படங்களிலாவது பார்த்திருப்பீர்கள். சுமார் 2 கோடி ரூபாயில் ஒரு வாகனம் விற்கப்படுகிறது என்றால் அதன் கம்பீரமான தோற்றம் எவ்வாறு இருக்கும் என்பதை உங்களால் யூகிக்க முடியும்.

டாடா சுமோவும் கம்பீரமான தோற்றத்தை கொண்ட வாகனம் தான் என்றாலும், ஜி-கிளாஸ் அளவிற்கு இல்லை என்பதுதான் இதில் கசப்பான உண்மை. இந்த மாடிஃபை சுமோவில் வழங்கப்பட்டுள்ள மெர்சிடிஸ் லோகோ, பக்கவாட்டில் உள்ள ஏஎம்ஜி ஸ்டிக்கர் மற்றும் ஜி-கிளாஸில் வழங்கப்படும் அலாய் சக்கரங்களின் டிசைனில் இருக்கும் அலாய் சக்கரங்களை நீக்கி பார்த்தோமேயானால் இது வெறுமனே சுமோ கார் தான்.

ஆனால் இவ்வளவு கற்பனைகளுடன் சுமோவை ஜி-கிளாஸிற்கு இணையாக மாற்ற நினைத்த உரிமையாளரை பாராட்டியே ஆக வேண்டும். மேற்கூறப்பட்டவை மட்டுமில்லாமல் வாகனத்தின் முன்பக்கத்தில் வழங்கப்பட்டுள்ள வட்ட வடிவிலான ஹெட்லேம்ப்கள், பொனெட், முன்பக்க பம்பர், சக்கர வளைவுகள் உள்ளிட்டவையும் நமக்கு ஜி-கிளாஸை ஞாபகப்படுத்துகின்றன.

இவற்றுடன் பொனெட்டில் பொருத்தப்பட்ட டர்ன் இண்டிகேட்டர்கள், கருப்பு நிற பின்பக்கம் பார்க்க உதவும் பக்கவாட்டு கண்ணாடிகள் மற்றும் முன்பக்கத்தில் இருந்து பின்பக்கம் வரையில் செல்லும் கருப்பு நிற ஸ்ட்ரிப்பையும் இந்த மாடிஃபை வாகனம் பெற்றுள்ளது.

பின்பக்கத்தில் ஸ்பேர் சக்கரத்தை தாங்கியுள்ள பின் கதவு இது டாடா சுமோ கார் என்பதை எல்லாருக்கும் தெரியப்படுத்தும் விதத்தில் உள்ளது. இருப்பினும் இந்த வாகனத்தை உள்ளே செல்லாமல் வெளியில் இருந்து பார்க்கும் ஆட்டோமொபைல் துறை சாராத எவர் ஒருவரும் இது மெர்சிடிஸ்-பென்ஸ் வாகனம் தான் என ஏமாருவார்கள் என்பது உறுதி.