சில மணிநேரங்களில் பழசான புதிய ஃபோர்டு ஈக்கோஸ்போர்ட் கார்!! காரணத்தை யூகிக்கவே முடியாது...

புதிய வ்ராப்-ஐ ஏற்கும் கார்கள் சில மணிநேரங்களிலேயே புதிய தோற்றத்தை பெற்று விடுகின்றன. இத்தகைய வ்ராப்களை சிங்கிள் நிறத்தில் அல்லது மேட் ஃபினிஷில் சில வாடிக்கையாளர்கள் தங்களது கார்களில் கொண்டுவருகின்றனர்.

சிலரோ அனைவரையும் கவரும் விதத்தில் மிகவும் பிரத்யேகமான பெயிண்ட் வ்ராப்பின் பக்கம் செல்கின்றனர். இந்த வகையில் ஜூராசிக் பார்க்கின் தீம்-ஐ பெற்ற ஃபோர்டு ஈக்கோஸ்போர்ட் காரை பற்றி தான் இந்த செய்தியில் பார்ப்போம்.

Image Courtesy: arwrap786

தெலுங்கானா, ஹைதராபாத்தை சேர்ந்த ஏஆர் வ்ராப்ஸ் என்ற நிறுவனத்தின் மூலமாக இந்த வ்ராப் வேலைப்பாடுகள் நடைபெற்றுள்ளன. ஃபோர்டு ஈக்கோஸ்போர்ட் காரின் எந்த வேரியண்ட் இது என்பதை சரியாக அறிய முடியவில்லை.

ஏனெனில் அனைத்து க்ரோம் பாகங்களும் கருப்பு நிறத்திற்கு மாற்றப்பட்டுள்ளன. இந்த பெயிண்ட் வ்ராப்-ஐ பற்றி நான் கூற வேண்டும் என்றில்லை, ஏனெனில் பார்க்கும் அனைவராலுமே இது எந்த மாதிரியான வ்ராப் என்பதை அறிய முடியும்.

ஹாலிவுட் படமான ஜூராசிக் பார்க்கில் டைனாசரிடம் சிக்கிய கார் இறுதியில் அடையும் நிலையிலும், நீண்ட வருடங்களாக ஒரே இடத்தில் நிறுத்தி வைக்கப்பட்ட காருக்கு ஏற்படும் நிலையிலும் இந்த வ்ராப் காட்சி தருகிறது.

காரின் அடிப்படை நிறம் நீலம் என்பது போலவும், அதற்கு மேல் துருப்பிடித்தாற் போலவும் இந்த வ்ராப் வடிவமைக்கப்பட்டுள்ளது. ஜூராசிக் பார்க் தீம் என்பதால், டைனாசரின் நக கீறல்கள் காரை சுற்றிலும் ஆங்காங்கே தென்படுகின்றன.

ஜூராசிக் பார்க் லோகோக்கள் காரின் இரு பக்கங்களிலும் வழங்கப்பட்டுள்ளன. இத்தகைய வ்ராப் வேலைப்பாடுகளுக்கு அதிகளவில் கற்பனை திறன் தேவை. இல்லையென்றால், இவ்வளவு நேர்த்தியாக அச்சு அசல் பழையதான கார் போன்றதான தோற்றத்தை கொண்டு வர முடியாது.

இப்படிப்பட்ட வ்ராப்கள் இந்தியாவில் வழங்கப்படுவது இதுவே முதல்முறை என்று நினைக்கிறேன். ஆனால் வெளிநாடுகளில், விபத்தில் சிக்கிய கார்களை போன்றதான வ்ராப்கள் கார்களில் அவ்வப்போது வழங்கப்படும் ஒன்றாகும்.

கார்களை மாடிஃபை செய்வதில் அரசாங்கம் கடுமையான விதிமுறைகளை கொண்டுவந்துள்ளது. இருப்பினும் காரின் பெயிண்ட்டை மாற்றுவதில் எந்த பிரச்சனையும் இல்லை. இதனால் தான் சமீப காலமாக புதிய வ்ராப்-ஐ பெற்ற கார்களை அதிகளவில் பார்த்து வருகிறோம்.

ஆனால் காரின் உண்மையான நிறத்தின் மீது தான் புதிய வ்ராப் ஒட்டப்பட்டதாக இருக்க வேண்டும். இந்தியாவில் வ்ராப்கள் ரூ.30,000-ல் இருந்து அதன் தரத்தை பொறுத்து லட்சங்கள் வரையில் விற்பனைக்கு கிடைக்கின்றன.