7-இருக்கை க்ரெட்டா கார் மீண்டும் பொது சாலையில் சோதனை!! இரகசியமாக ஈடுப்பட்டுவரும் ஹூண்டாய்!

இந்தியாவில் தற்சமயம் அதிகளவில் விற்பனையாகும் எஸ்யூவி கார் மாடலாக விளங்கும் ஹூண்டாய் க்ரெட்டாவின் புதிய தலைமுறை கொரோனா வைரஸ் பரவல் வேகமெடுத்த கடந்த ஆண்டு மார்ச் மாதத்தில் விற்பனைக்கு அறிமுகப்படுத்தப்பட்டது.

இவ்வாறு கடினமான சூழலின்போது அறிமுகம் செய்யப்பட்டிருந்தாலும், விற்பனையில் ஜொலித்துவரும் க்ரெட்டாவின் 7-இருக்கை வெர்சனை அல்கஸார் என்ற பெயரில் விற்பனைக்கு கொண்டுவர ஹூண்டாய் நிறுவனம் திட்டமிட்டுள்ளது.

இந்த பிரிவில் தற்சமயம் எம்ஜி ஹெக்டர் ப்ளஸ், மஹிந்திரா எக்ஸ்யூவி500 மற்றும் சமீபத்தில் அறிமுகமான டாடா சஃபாரி கார்கள் மட்டும் தான் உள்ளன. இதில் ஹெக்டர் ப்ளஸும் கடந்த ஆண்டில்தான் அறிமுகப்படுத்தப்பட்டது. மஹிந்திரா எக்ஸ்யூவி500-இன் புதிய தலைமுறை தயாரிப்பு பணிகளில் உள்ளது.

ஆனால் அல்கஸாரின் அறிமுகம் குறித்த எந்தவொரு அறிவிப்பையும் ஹூண்டாய் மோட்டார்ஸ் இந்தியா நிறுவனம் இதுவரையில் வெளியிடவில்லை. சோதனை ஓட்ட ஸ்பை படங்கள் மட்டும்தான் சமீப காலமாக நமக்கு கிடைத்து வருகின்றன.

இந்த வகையில் இந்த சோதனை ஓட்ட வீடியோ தற்போது வெளியாகியுள்ளது. தோற்றத்தை பொறுத்தவரையில் டாடா ஹெரியரில் இருந்து சஃபாரி பெற்றப்பட்ட அதே பாணியில்தான் க்ரெட்டாவில் இருந்து புதிய அல்கஸார் பெறப்பட்டுள்ளது.

கூடுதலாக மூன்றாவது இருக்கை வரிசை வழங்கப்படுவதால் காரின் நீளம் அதிகரிப்பட்டுள்ளது மட்டுமில்லாமல் மேற்கூரை காரின் பின்பக்க இறுதி வரை கொண்டுவரப்பட்டுள்ளது. இதன் காரணமாக காரின் C-பில்லரின் வடிவம் திருத்தியமைக்கப்பட்டுள்ளது.

மோட்டார்பீம் செய்திதளம் மூலம் கிடைத்துள்ள இந்த வீடியோ மட்டுமில்லாமல் சமீபத்தில் வெளியாகி இருந்த ஸ்பை படங்கள் பெரும்பான்மையானவற்றில் டைமண்ட்-கட் அலாய் சக்கரங்கள் மற்றும் இரு-முனை எக்ஸாஸ்ட் குழாய்கள் உடன் அல்கஸார் சோதனை காரை பார்க்க முடிகிறது.

காரின் முன்பக்கத்தில் பிளவுப்பட்ட வடிவிலான எல்இடி ஹெட்லேம்ப் அமைப்பு க்ரெட்டா உடன் ஒத்து காணப்பட்டாலும், அந்த ஐந்து-இருக்கை எஸ்யூவி காரில் இருந்து வேறுப்பட்ட க்ரில் அமைப்பை அல்கஸார் பெற்றுவரலாம். பிரிவில் உள்ள மற்ற கார்களை போல் 6 மற்றும் 7 இருக்கை தேர்வுகளில் விற்பனை செய்யப்பட உள்ள அல்கஸாரில் இரண்டாவது இருக்கை வரிசையில் கேப்டன் இருக்கைகள் இரு-நிறங்களில் வழங்கப்பட உள்ளதை கடந்த வாரத்தில் வெளியாகி இருந்த ஸ்பை படங்கள் வெளிக்காட்டி இருந்தன.

என்ஜின் தேர்வை பொறுத்தவரையில் க்ரெட்டாவின் வழக்கமான 3 என்ஜின் தேர்வுகள் தான் அல்கஸாரிலும் தொடரப்படும் என எதிர்பார்க்கப்படுகிறது. இந்த மூன்று என்ஜின் தேர்வுகளில் 1.5 லிட்டர் நேச்சுரலி அஸ்பிரெட்டட் பெட்ரோல் & டீசல் மற்றும் 1.4 லிட்டர் டர்போ பெட்ரோல் என்பவை அடங்குகின்றன.