புதிய லோகோ, பனோரமிக் சன்ரூஃப்... அசத்தலாக வரும் புதிய கியா செல்டோஸ் எஸ்யூவி!

இந்தியாவின் காம்பேக்ட் எஸ்யூவி மார்க்கெட்டில் கியா செல்டோஸ் மிகச் சிறந்த தேர்வாக வாடிக்கையாளர்களை கவர்ந்து வருகிறது. டிசைன், வசதிகள், எஞ்சின், விலை அனைத்திலும் நிறைவை தருவதால், தொடர்ந்து விற்பனையில் கலக்கி வருகிறது.

இந்த நிலையில், சந்தைப்போட்டியை மனதில் வைத்து சில கூடுதல் சிறப்பம்சங்களுடன் செல்டோஸ் காரை களமிறக்க உள்ளது கியா மோட்டார் நிறுவனம்.

அதாவது, கியா செல்டோஸ் எஸ்யூவியில் தற்போது சாதாரண சிறிய வகை சன்ரூஃப் கொடுக்கப்படுகிறது. இந்த நிலையில், பெரிய அளவிலான பனோரமிக் சன்ரூஃப் கொடுப்பதற்கு கியா மோட்டார் திட்டமிட்டுள்ளதாக டீம் பிஎச்பிமூலமாக வெளியாகி இருக்கும் தகவல் கூறுகிறது.

அதேபோன்று, புதிய செல்டோஸ் மாடலில் கியா மோட்டார் நிறுவனம் அண்மையில் அறிமுகப்படுத்திய புதிய லோகோவுடன் வர இருப்பதாகவும் கூறப்படுகிறது. இந்த இரண்டு புதிய அம்சங்களுடன் 2021 மாடலாக கியா செல்டோஸ் வாடிக்கையாளர்களை கவர வருகிறது.

ஸ்கோடா குஷாக் மற்றும் ஃபோக்ஸ்வேகன் டைகுன் ஆகிய இரண்டு புத்தம் புதிய எஸ்யூவி மாடல்களின் வருகையும் கியா செல்டோஸ் காருக்கு நெருக்கடியை தரும் வாய்ப்பு இருக்கிறது. எனவே, மதிப்பை கூட்டும் வகையில் இந்த மாற்றங்கள் செய்யப்பட்டு கொண்டு வரப்பட உள்ளது.

கியா செல்டோஸ் எஸ்யூவியில் வேறு பெரிய அளவிலான மாற்றங்கள் எதுவும் இருக்காது என்று தெரிகிறது. கியா செல்டோஸ் எஸ்யூவியில் 115 பிஎஸ் பவரையும், 144 என்எம் டார்க்கையும் வழங்கும் 1.5 லிட்டர் பெட்ரோல் எஞ்சின், 140 பிஎஸ் பவரையும், 242 என்எம் டார்க்கையும் வழங்கும். 1.4 லிட்டர் டர்போ பெட்ரோல் எஞ்சின் தேர்வுகளில் தொடர்ந்து வழங்கப்படும்.

டீசல் மாடலில் 115 பிஎஸ் பவரையும், 250 என்எம் டார்க் திறனையும் வெளிப்படுத்தும் 1.5 லிட்டர் எஞ்சின் பொருத்தப்படும். மேனுவல் மற்றும் ஆட்டோமேட்டிக் கியர்பாக்ஸ் தேர்வுகள் கொடுக்கப்படுகின்றன. பல்வேறு எஞ்சின், கியர்பாக்ஸ் தேர்வுகள் இருப்பது இந்த காரின் மிக முக்கிய மதிப்பாக கருதப்படுகிறது.

கியா செல்டோஸ் எஸ்யூவி ரூ.9.89 லட்சம் முதல் ரூ.17.45 லட்சம் வரையிலான எக்ஸ்ஷோரூம் விலையில் விற்பனை செய்யப்படுகிறது. அடுத்த மாதம் 27ந் தேதி புதிய கியா செல்டோஸ் அறிமுகம் செய்யப்படும் என்று தகவல்கள் கூறுகின்றன. புதிய மாடலின் விலை சற்றே கூடுதலாக நிர்ணயிக்கப்படும் வாய்ப்பு இருக்கிறது.