நகர்புற சாலையா இருந்தாலும் சரி, ஆஃப்-ரோடு சாலையா இருந்தாலும் சரி, இது கெத்தானது! லம்போர்கினியின் உருஸ் எஸ்யூவி

அப்போதுதான் உலகளவில் எஸ்யூவி கார்கள் வேகமாக பிரபலமாகி வந்ததால் லம்போர்கினி நிறுவனமும் அந்த வழியில் சென்றது. லம்போர்கினி நிறுவனம் உருஸ் காரை 2018ஆம் ஆண்டிற்காக டிசம்பர் 2017ல் அறிமுகப்படுத்தியது.

லம்போர்கினி பிராண்டில் இருந்து எஸ்யூவி கார் என்ற உடனே உலக வாடிக்கையாளர்கள் மத்தியில் வேகமாக பிரபலமான உருஸ் அறிமுகமாகி கிட்டத்தட்ட 3 வருடங்களாகிவிட்டதால் தற்போது இது பழைய காராகிவிட்டது என்பதை ஒத்து கொண்டுதான் ஆக வேண்டும்.

இருப்பினும் இந்த எஸ்யூவி காரை விளம்பரப்படுத்தும் நோக்கில் புதிய ப்ரோமோ வீடியோ வெளியிடப்பட்டுள்ளது. உருஸின் தயாரிப்பு பணிகளில் 10,000 யூனிட்களை கடந்துவிட்டதாக லம்போர்கினி நிறுவனம் கடந்த 2020 ஜூலை மாதத்தில் அறிவித்திருந்தது.

இந்த புதிய ப்ரோமோ வீடியோ இந்த எஸ்யூவி காரின் விற்பனையை மேலும் அதிகரிக்கும் நோக்கில் வெளியிடப்பட்டுள்ளது. இந்த வீடியோவில் கார் முழுக்க முழுக்க ரஷ்யாவில் காட்சிப்படுத்தப்பட்டுள்ளது. முதலில் ரேஸ் ட்ராக்கில் கார் இயங்குவதுபோல் காட்டப்படுகிறது.

அதன்பின் ஆளே இல்லாத கரடுமுரடான சாலைகளை கொண்ட ஆஃப்-ரோடில் இயங்குவதுபோல் காட்டப்பட்டு கடைசியாக நகர்புற சாலைகளுக்கு உருஸ் கார் கொண்டுவரப்பட்டுள்ளது. 1:39 நிமிடம் ஓடக்கூடியதாக உள்ள இந்த வீடியோவில் கார் எப்போதும் ஆக்ரோஷமாக இயங்குவது போன்றே காட்டப்பட்டுள்ளது.

‘லம்போர்கினி உருஸ்- அனைத்து சாலையும் இதன் சாலையே' என்ற பெயரில் வெளியிடப்பட்டுள்ள இந்த வீடியோவிற்கு கீழே, "நீங்கள் எந்த சாலைக்கும் செல்லும்போது, உலகிற்கு வரம்பு இல்லை. இது தனித்துவமான ஒன்றாக மாறும், உருஸ் மட்டுமே உங்களை அவ்வாறு உணர வைக்கும்.

நகரத்தில், இயற்கையின் மத்தியில் அல்லது பந்தயத்தில் நீங்கள் எங்கிருந்தாலும் அது ஒரு பொருட்டல்ல: நீங்கள் பெறும் அனுபவம் நம்பமுடியாதது " என்ற கருத்துகள் பதிவிடப்பட்டுள்ளன. உருஸ் எஸ்யூவி காரில் 4.0 லிட்டர் இரட்டை-டர்போ வி8 என்ஜினை லம்போர்கினி நிறுவனம் பொருத்துகிறது.

அதிகப்பட்சமாக 6,000 ஆர்பிஎம்-ல் 650 பிஎஸ் மற்றும் 2,250- 4,500 ஆர்பிஎம்-ல் 850 என்எம் டார்க் திறனை வெளிப்படுத்தக்கூடிய இந்த என்ஜினின் உதவியுடன் உருஸ் காரை அதிகப்பட்சமாக 305kmph வேகத்தில் இயக்க முடியும்.

0-வில் இருந்து 100kmph வேகத்தை இந்த கார் வெறும் 3.6 வினாடிகளில் எட்டிவிடக்கூடியது. லம்போர்கினி நிறுவனம் உருஸ் எஸ்யூவி காரை ரூ.3.10 கோடி என்ற ஆரம்ப விலையில் இந்திய சந்தையில் விற்பனை செய்து வருகிறது.