இந்தியாவில் தொடரும் பென்ஸ் & பிஎம்டபிள்யூ கார்களின் ராஜ்ஜியம்!! ஒரே மாதத்தில் 7 கார்களை விற்றுள்ள ரோல்ஸ்ராய்ஸ்

சொகுசு கார்களின் விற்பனை கடந்த மாதத்தில் 2020 ஜனவரியை காட்டிலும் கிட்டத்தட்ட 40 சதவீதம் குறைந்துள்ளது. இந்தியாவில் உள்ள 1,480 ஆர்டிஒ அலுவலங்களில் 1,273-ல் கடந்த மாதத்தில் 2,194 லக்சரி கார்கள் பதிவு செய்யப்பட்டுள்ளன.

ஆனால் கடந்த ஆண்டு இதே ஜனவரி மாதத்தில் 3,629 லக்சரி கார்கள் இந்தியாவில் விற்பனை செய்யப்பட்டு இருந்தன. மொத்த சொகுசு கார்களின் விற்பனையில் வழக்கம்போல் மெர்சிடிஸ்-பென்ஸ் நிறுவனம்தான் முன்னிலையில் உள்ளது.

கடந்த மாதத்தில் மட்டும் 859 பென்ஸ் கார்கள் இந்தியாவில் ஆர்டிஒ அலுவலங்களில் பதிவு செய்யப்பட்டுள்ளன. இந்த லிஸ்ட்டில் முதலிடத்தில் இருந்தாலும், 2020 ஜனவரி மாதத்துடன் ஒப்பிடுகையில் இந்த எண்ணிக்கை 28.54 சதவீதம் குறைவாகும்.

ஏனெனில் அந்த மாதத்தில் மொத்தம் 1,202 பென்ஸ் கார்கள் விற்பனை செய்யப்பட்டு இருந்தன. கடந்த ஜனவரியில் மொத்தம் விற்பனையான லக்சரி கார்களில் மெர்சிடிஸ் கார்களின் எண்ணிக்கை மட்டுமே 39.15 சதவீதமாகும்.

பென்ஸ் கார்களுக்கு அடுத்து அதிகளவில் விற்பனை செய்யப்பட்ட சொகுசு கார்கள் என்று பார்த்தால், அவை பிஎம்டபிள்யூ கார்கள் தான். கடந்த மாதத்தில் 703 கார்களை இந்தியாவில் பிஎம்டபிள்யூ நிறுவனம் விற்பனை செய்துள்ளது.

இந்த நிறுவனத்தின் விற்பனை 2020 ஜனவரி உடன் ஒப்பிடுகையில் சுமார் 47.73 சதவீதம் குறைந்துள்ளது. இருப்பினும் மெர்சிடிஸ் மற்றும் பிஎம்டபிள்யூ என்ற இரு நிறுவனங்கள் மட்டுமே மொத்த லக்சரி கார் விற்பனையில் 70 சதவீதத்தை ஆக்கிரமித்துள்ளன.

இவை இரண்டிற்கும் அடுத்து பெரிய இடைவெளியுடன், கிட்டத்தட்ட 450 கார்கள் வித்தியாசத்துடன் ஃபோக்ஸ்வேகன் ஆடி நிறுவனம் உள்ளது. கடந்த மாதத்தில் விற்பனை செய்யப்பட்ட ஆடி கார்களின் எண்ணிக்கை 254 ஆகும்.

2020 ஜனவரி உடன் ஒப்பிடுகையில் ஆடி கார்களின் விற்பனையும் கிட்டத்தட்ட 40 சதவீதம் குறைந்துள்ளது. நான்காவது மற்றும் ஐந்தாவது இடங்களில் ஜாகுவார் லேண்ட் ரோவர் மற்றும் வால்வோ நிறுவனங்கள் உள்ளன. இந்த நிறுவனங்களின் கடந்த மாத விற்பனை எண்ணிக்கை முறையே 211 மற்றும் 109 ஆகும்.

மேற்கூறிய சொகுசு கார் நிறுவனங்களை போன்று இவற்றின் விற்பனையும் 2020 ஜனவரியை காட்டிலும் முறையே 48.41 மற்றும் 43.81 சதவீதம் குறைந்துள்ளது. போர்ஷே கார்களின் விற்பனை பெரிய அளவில் மாற்றமில்லை.

ஊரடங்கு உத்தரவுகளுக்கு மத்தியிலும் கடந்த மாதத்தில் விற்பனையில் ஓரளவுக்கு முன்னேறியுள்ள நிறுவனம் என்று பார்த்தால், அது ரோல்ஸ் ராய்ஸ் தான். 2020 ஜனவரியில் வெறும் 2 கார்களை மட்டுமே விற்பனை செய்திருந்த ரோல்ஸ் ராய்ஸ் நிறுவனம் கடந்த மாதத்தில் 7 கார்களை விற்றுள்ளது.

இவற்றுடன் 2021 ஜனவரியில் 3 ஃபெராரி கார்கள், 1 லம்போர்கினி மற்றும் 1 பெண்ட்லீ கார்களை இந்திய வாடிக்கையாளர்கள் வாங்கியுள்ளனர். 2020 ஜனவரியில் ஒரு பெண்ட்லீ கார் கூட விற்பனையாகவில்லை. 2020 ஜனவரியை காட்டிலும் கடந்த மாதத்தில் சொகுசு கார்களின் விற்பனை 40 சதவீதம் குறைந்திருந்தாலும், 2020 டிசம்பர் மாதத்தை காட்டிலும் 13.68 சதவீதம் அதிகரித்துள்ளது குறிப்பிடத்தக்கது.