5-கதவு தார் வாகனத்தை பற்றிய அறிவிப்பை வெளியிட்டது மஹிந்திரா!! 2026க்குள் 9 தயாரிப்புகள் வெளிவரவுள்ளதாம்...!!

2021ஆம் நிதியாண்டின் நான்காம் கால்பகுதியில் நடைபெற்ற விற்பனை குறித்த அறிக்கையை இணையத்தில் வெளியிடும்போது மஹிந்திரா நிறுவனம் நீண்ட தோற்றம் கொண்ட தார் வாகனத்தின் இந்த அறிமுகம் தொடர்பான விபரங்களை வெளியிட்டுள்ளது.

மேலும் இந்த அறிவிப்புகளுடன், 2026ஆம் ஆண்டிற்குள் ஒன்பது தயாரிப்புகளை இந்திய சந்தையில் அறிமுகப்படுத்த திட்டமிட்டுள்ளதாகவும் மஹிந்திரா தெரிவித்துள்ளது. இந்த 9 தயாரிப்பு வாகனங்களில் 5-கதவு தார் வாகனமும் ஒன்றாகும்.

இதுமட்டுமின்றி புதிய தலைமுறை பொலிரோவும் இந்த 9 அறிமுகங்களில் அடங்குகிறது. ஆனால் இவற்றின் அறிமுக தேதி மேற்கூறப்பட்ட வருடங்களில் எந்த மாதத்தில் இருக்கும் என்ற விபரங்களை மஹிந்திரா தற்போதைக்கு வெளியிடவில்லை.

மஹிந்திராவின் புதிய அறிமுகங்களில் புதிய இவி ப்ளாட்ஃபாரத்தின் அடிப்படையில் உருவாக்கப்படும் எலக்ட்ரிக் வாகனங்களும் இருக்கலாம். எக்ஸ்யூவி300 காம்பெக்ட் எஸ்யூவி காரின் புதிய தலைமுறையை உருவாக்கும் பணியிலும் மஹிந்திரா ஈடுப்பட உள்ளது.

தற்போதைய எக்ஸ்யூவி500 மாடலின் அடுத்த தலைமுறை கார் எக்ஸ்யூவி700 என்கிற பெயரில் கொண்டுவரப்படுகிறது. இதுதான் மஹிந்திராவின் அடுத்த அறிமுகமாக இருக்கும். ஏனெனில் இதன் அறிமுகம் நடப்பு 2021ஆம் ஆண்டிற்காக ஒதுக்கி வைக்கப்பட்டுள்ளது.

புதிய தலைமுறை ஸ்கார்பியோ அடுத்த 2022ஆம் ஆண்டில் அறிமுகப்படுத்தப்பட உள்ளது. இவற்றுடன் டபிள்யூ 620 மற்றும் வி201 என்கிற குறியீட்டு பெயரால் தற்போதைக்கு அழைக்கப்பட்டு வருகின்ற கார்களும் மஹிந்திரா பிராண்டில் இருந்து வெளிவரவுள்ளன.

இந்தியாவில் 3-கதவு தாரின் புதிய தலைமுறை மாடல் கடந்த ஆண்டு அக்டோபரில் அறிமுகப்படுத்தப்பட்டது. அதுவே 5-கதவு தார் நீளத்தில் அதிகமாக கொண்டுவரப்படுவதால் உட்புற கேபினும் நன்கு விசாலமானதாக இருக்கும் என்பது உறுதி.

கேபினில் கூடுதலாக மூன்றாவது இருக்கை வரிசை சேர்க்கப்படும். ஆனால் வாகனத்தின் உயரத்தில் மற்றும் வீல்பேஸ் நீளத்தில் மாற்றம் இருக்காது. மூன்றாவது இருக்கை வரிசையினால் வாகனத்தின் பின்பகுதியின் வடிவம் சற்று மாற்றப்படலாம்.

மேலும் தற்போதைய 3-கதவு தாரை காட்டிலும் 5-கதவு தாரில் தொழிற்நுட்ப வசதிகள் ஏராளமானவை வழங்கப்படலாம். ஆனால் இயந்திர பாகங்களில் இரண்டிற்கும் இடையே எந்த வித்தியாசமும் இருக்காது. இதனால் அறிமுகமாகும் சமயத்தில் 3-கதவு தார் கொண்டிருக்கும் என்ஜின் தேர்வுகள் தான் 5-கதவு தாருக்கும் வழங்கப்படும்.