எதிர்கால பென்ஸ் கார்களின் டேஸ்போர்டு இப்படிதான் இருக்குமாம்!! இந்தியாவிற்கு வர பல வருஷமாகும்..

புதிய எஸ்-க்ளாஸின் எலக்ட்ரிக் வெர்சனில் கேபினின் அகலம் முழுவதையும் ஆக்கிரமிக்கும் விதத்தில் அதிக வளைவுகளை கொண்ட புதிய டேஸ்போர்டு அமைப்பை மெர்சிடிஸ் நிறுவனம் கொண்டுவரவுள்ளது.

எம்பக்ஸ் ஹைப்பர்திரை என்ற பெயரில் கொண்டுவரப்படும் இந்த தொடுத்திரை அமைப்பில் மூன்று திரைகள் புதிய தொழிற்நுட்பம் மூலம் ஒருங்கிணைக்கப்பட்டுள்ளன. எதிர்கால பென்ஸ் கார்களில் இந்த திரைதான் பெரும்பானமையாக வழங்கப்படும்.

இந்த 3 திரைகளில் இன்ஸ்ட்ரூமெண்ட் பேனல், இன்ஃபோடெயின்மெண்ட் சிஸ்டம் மற்றும் முன்பக்க பயணிகளுக்கு பொழுதுபோக்கு திரை உள்ளிட்டவை அடங்குகின்றன. இதில் பொழுதுபோக்கிற்கான திரையில் நல்ல தரத்தில் படங்களை காட்டுவதற்கு ஒஎல்இடி தொழிற்நுட்பம் வழங்கப்பட்டுள்ளது.

இந்த புதிய டேஸ்போர்டு பிளாஸ்டிக்கால் உருவாக்கப்பட்டிருப்பினும், சில வெவ்வேறான பாகங்களையும் கொண்டுள்ளது. குறிப்பாக டேஸ்போர்டு அமைப்பை சுற்றிலும் 3டி பரிமாணத்தில் ஸ்பெஷல் 3-லேயர் கோட்டிங் கொடுக்கப்பட்டுள்ளது. மெர்சிடிஸ் நிறுவனம் இதனை ‘சில்வர் நிழல்' என அழைக்கிறது.

திரைகளின் மீது மேற்பரப்பு ஒளி எதிரொலிக்காத மற்றும் சுத்தம் செய்வதற்கு எளிமையான கண்ணாடி மேற்பரப்பு வழங்கப்பட்டுள்ளது. காரின் கேபினை சுற்றிலும் வழங்கப்பட்டுள்ள விளக்குகளை பயன்படுத்தினால் டேஸ்போர்டில் ஒளி மிதப்பது போன்று தோன்றும் என மெர்சிடிஸ் தெரிவித்துள்ளது.

டேஸ்போர்டின் இரு முனைகளிலும் ஸ்பீக்கர் போன்றதான தோற்றத்தில் ஏசி துளைகள் வழங்கப்பட்டுள்ளன. தற்போதைய மெர்சிடிஸ் எஸ்-க்ளாஸின் தொடுத்திரைகளை காட்டிலும் இந்த திரைகளை கண்ட்ரோல் செய்வது நிச்சயம் எளிமையானதாக இருக்கும்.

பூஜ்ஜிய-அடுக்கு மெனு அமைப்பானது பயனர் விருப்பங்களின் அடிப்படையில் தேவையான நேரத்தில் தேவையான தகவல்களைக் காண்பிக்கும், இதன் மூலம் தொடுத்திரையை உருட்ட வேண்டிய அவசியம் ஏற்படாது, அதற்கு பதிலாக குரல் கட்டளையைப் பயன்படுத்தும்.

எம்பக்ஸ் சிஸ்டத்தின் முந்தைய தலைமுறை நாவிகேஷன், மீடியா மற்றும் தொலைப்பேசியை ஒரே மைய திரையில் வழங்கி வருகிறது. ஆனால் புதிய தலைமுறை எம்பக்ஸ், இருக்கையை மடக்குதல், குறுஞ்செய்தி மற்றும் இயங்கும் சாலைக்கு ஏற்ப சஸ்பென்ஷன் உயரத்தை அட்ஜெஸ்ட் செய்து கொள்ளும் வசதி உள்ளிட்டவற்றுடன் 20 கூடுதல் வசதிகளை வழங்கும்.

ஓட்டுனர் அல்லாத முன்பக்க பயணிக்கு வழங்கப்பட்டுள்ள திரை ஒவ்வொரு நாட்டின் பாதுகாப்பு விதிமுறைகளுக்கு உட்பட்டு வழங்கப்படும். பொழுதுபோக்கிற்காக பயன்படுத்தப்படவில்லை எனில் இந்த திரை நட்சத்திரங்களை காட்டும் அனிமேட்டட் திரையாக மாறிவிடும்.

இவ்வாறான தொழிற்நுட்ப வசதிகளை தயாரிப்பு மாடல்களில் குறிப்பிட்ட கால இடைவெளியில் வழங்குவதில் மெர்சிடிஸ் எப்போதுமே முன் உதாரணமாக விளங்கக்கூடிய நிறுவனம் ஆகும். இதனால் இத்தகைய மேம்படுத்தப்பட்ட எதிர்கால டேஸ்போர்டுகளை மற்ற நிறுவனங்களும் வரும் ஆண்டுகளில் வெளியிட்டால் ஆச்சிரியப்படுவதற்கு எதுவுமில்லை.