500 கிமீ ரேஞ்ச்... சந்தையை அதகளப்படுத்த தயாராகும் எம்ஜி இசட்எஸ் எலெக்ட்ரிக் கார்!

கடந்த ஆண்டு துவக்கத்தில் விற்பனைக்கு கொண்டு வரப்பட்ட எம்ஜி இசட்எஸ் எலெக்ட்ரிக் கார் இந்திய வாடிக்கையாளர்களின் முக்கிய தேர்வாக இருந்து வருகிறது. இந்த நிலையில், நேற்றுமுன்தினம் மேம்படுத்தப்பட்ட அம்சங்களுடன் புதிய எம்ஜி இசட்எஸ் எலெக்ட்ரிக் கார் விற்பனைக்கு அறிமுகம் செய்யப்பட்டது.

முந்தைய மாடலின் பேட்டரியானது ஒருமுறை சார்ஜ் செய்தால் 340 கிமீ தூரம் பயணிக்கும் வாய்ப்பை வழங்கிய நிலையில், தற்போது மேம்படுத்தப்பட்ட மாடலின் பேட்டரியானது 419 கிமீ தூரம் வரை பயணிக்கும் வாய்ப்பை வழங்கும் என்று எம்ஜி தரப்பில் தெரிவிக்கப்பட்டது.

மேலும், க்ரவுண்ட் க்ளியரன்ஸ் அதிகரிக்கப்பட்டிருப்பதுடன், புதிய வாய்ஸ் கமாண்ட் தொழில்நுட்ப வசதியும் கொடுக்கப்பட்டு இருக்கிறது. இதனால், விலை சற்றே அதிகரிக்கப்பட்டுள்ளது. இந்த நிலையில், புதிய எம்ஜி இசட்எஸ் எலெக்ட்ரிக் கார் அறிமுகத்திற்கு பின்னர் சில முக்கியத் தகவல்களை எம்ஜி மோட்டார் இந்தியா நிர்வாக இயக்குனர் ராஜீவ் சாபா பகிர்ந்து கொண்டார்.

அதில், மிக முக்கியமாக 500 கிமீ தூரத்திற்கு மேல் பயணிக்கும் வாய்ப்பை வழங்கும் புதிய பேட்டரியை உருவாக்கி வருவதாக தெரிவித்துள்ளார். தற்போது எம்ஜி இசட்எஸ் எலெக்ட்ரிக் காரில் 44.5kWh பேட்டரி பயன்படுத்தப்படும் நிலையில், புதிய பேட்டரி 73kWh திறன் கொண்டதாக இருக்கிறது.

இந்த புதிய பேட்டரியை முழுமையாக சார்ஜ் செய்தால் 500 கிமீ தூரத்திற்கும் மேல் பயணிக்கும் வாய்ப்பை வழங்கும். இந்த புதிய பேட்டரி கொண்ட இசட்எஸ் எலெக்ட்ரிக் கார் மாடலானது அடுத்த ஆண்டு இந்தியாவில் அறிமுகம் செய்யப்பட இருப்பதும் தெரிய வந்துள்ளது.

சோதனை நிலைகளின் அடிப்படையில் 500 கிமீ தூரத்திற்கு மேல் பயணிக்கும் என்று சொல்லப்பட்டாலும், நடைமுறையில் 400 கிமீ முதல் 430 கிமீ தூரம் வரை பயணிக்கும் வாய்ப்பை வழங்கும். எனவே, நீண்ட தூர பயணங்களுக்கும் ஏற்றதாக இது அமையும்.

இதுதவிர்த்து, ரூ.20 லட்சத்திற்கும் குறைவான விலையில் புதிய எலெக்ட்ரிக் கார் மாடலை இந்திய சந்தையில் விற்பனைக்கு கொண்டு வருவதற்கும் திட்டமிட்டுள்ளதாக ராஜீவ் சாபா தெரிவித்துள்ளார். எனவே, இந்திய எலெக்ட்ரிக் கார் சந்தையை அதகளப்படுத்தும் திட்டங்களில் எம்ஜி மோட்டார் இறங்கி இருப்பது தெரிய வந்துள்ளது.