மீண்டும் பழைய தோற்றத்திற்கு திரும்பும் டாடா நெக்ஸான்!! ஆனா உண்மையில் இதுதான் நல்லாருக்கு!

காம்பெக்ட் எஸ்யூவி பிரிவில் அதிகரித்துவரும் போட்டியினால் நெக்ஸான் பிஎஸ்6 காரில் இந்த 2021ஆம் ஆண்டின் துவக்கத்தில் சில காஸ்மெட்டிக் அப்கிரேட்களுடன் ஃபேஸ்லிஃப்ட் வெர்சனை டாடா மோட்டார்ஸ் நிறுவனம் கொண்டுவந்திருந்தது.

இந்த காஸ்மெட்டிக் அப்கிரேட்கள் முக்கியமாக காரின் முன்பக்கத்திற்கு தான் வழங்கப்பட்டு இருந்தன. அதேநேரம் நெக்ஸானின் மேற்கூரை தோற்றத்தையும் டாடா மோட்டார்ஸ் நிறுவனம் சிறிது திருத்தியமைத்திருந்தது.

ஆனால் தற்போது மீண்டும் நெக்ஸானின் பழைய மேற்கூரைக்கே டாடா நிறுவனம் திரும்பியுள்ளதுபோல் தெரிகிறது. ஏனெனில் டீம் பிஎச்பி செய்திதளம் மூலம் கிடைத்துள்ள மேலே உள்ள இதுதொடர்பான படத்தில், விற்பனையில் உள்ள நெக்ஸானின் மேற்கூரையில் இருந்து வேறுப்பட்ட தோற்றத்திலான மேற்கூரையை கொண்ட நெக்ஸான் காரை பார்க்க முடிகிறது.

நெக்ஸானின் பழைய மேற்கூரை பின்பக்க B-பில்லர்களில் இருந்து முன்பக்க A-பில்லர்களை வரையில் முழுமையாக வந்தடையாது. அவ்வாறான மேற்கூரை உடன்தான் இந்த நெக்ஸானும் காட்சியளிக்கிறது. இருப்பினும் மேற்கூரை தண்டவாளங்களிலும், பின்புறத்தில் மேற்கூரை சரிவிலும் புதிய நுட்பத்தை டாடா நிறுவனம் கண்டறிந்துள்ளது.

இவை தவிர்த்து இந்த நெக்ஸான் காரில் வேறெந்த மாற்றத்தை பார்க்க முடியவில்லை. நெக்ஸான் ஃபேஸ்லிஃப்ட் காரில் 1.2 லிட்டர் டர்போசார்ஜ்டு பெட்ரோல் மற்றும் 1.5 லிட்டர் டீசல் என்ற இரு விதமான என்ஜின் தேர்வுகள் வழங்கப்படுகின்றன.

இதில் பெட்ரோல் என்ஜின் அதிகப்பட்சமாக 118 பிஎச்பி மற்றும் 170 என்எம் டார்க் திறனையும், டீசல் என்ஜின் அதிகப்பட்சமாக 108 பிஎச்பி மற்றும் 260 என்எம் டார்க் திறனையும் வெளிப்படுத்தக்கூடியவைகளாக உள்ளன. இவற்றுடன் ட்ரான்ஸ்மிஷனுக்கு 6-ஸ்பீடு மேனுவல் மற்றும் 6-ஸ்பீடு ஏஎம்டி கியர்பாக்ஸ் தேர்வுகள் கொடுக்கப்படுகின்றன.

டாடா நெக்ஸான் ஃபேஸ்லிஃப்ட் காரின் எக்ஸ்ஷோரூம் விலைகள் தற்சமயம் ரூ.6.95 லட்சத்தில் இருந்து ரூ.12.70 லட்சம் வரையில் உள்ளன. நெக்ஸானில் இவ்வாறு மேற்கூரை மீண்டும் மாற்றப்பட்டிருப்பது விற்பனை வாகனங்களின் தோற்றத்தை தொடர்ச்சியாக புத்துணர்ச்சியாக்க வேண்டும் என்ற டாடாவின் எண்ணத்தை காட்டுகிறது.