2021ஆம் ஆண்டிற்கான மஹிந்திரா ஸ்கார்பியோ இவ்வாறுதான் இருக்கும்!! ஸ்பை படங்கள் வெளியீடு

இந்த 2021ஆம் வருட இரண்டாம் பாதியில் அறிமுகமாகலாம் என எதிர்பார்க்கப்படும் புதிய தலைமுறை மஹிந்திரா ஸ்கார்பியோ தற்சமயம் விற்பனையில் உள்ள ஸ்கார்பியோவை காட்டிலும் அளவில் பெரியதாக உள்ளது. அதுமட்டுமின்றி தோற்றத்திலும் புதியதாக உள்ளது.

இந்த நிலையில் தற்போது டீம் பிஎச்பி செய்திதளத்தின் மூலமாக கிடைத்துள்ள ஸ்பை படங்களில் 2021 ஸ்கார்பியோவின் முன்பக்கம் மறைக்கப்பட்டிருப்பினும், செங்குத்தான ஸ்லாட்களுடன் மஹிந்திராவின் அடையாள க்ரில் அமைப்பை பெற்றுள்ளதை பார்க்க முடிகிறது.

முன்பக்கத்தில் இந்த காரில் இரட்டை-பேட் ஹெட்லேம்ப்கள் வழங்கப்பட்டுள்ளன. இது ஒருங்கிணைக்கப்பட்ட எல்இடி டிஆர்எல் விளக்குகளை கொண்டிருக்கலாம். இந்த எஸ்யூவி காரின் பின்பக்கத்தில் டெயில்கேட்டும் வழக்கம்போல் வழங்கப்பட்டுள்ளது.

இவை மட்டுமின்றி பின்பக்கம் பார்க்க உதவும் பக்கவாட்டு கண்ணாடிகள் உடன் ஒருங்கிணைக்கப்பட்ட டர்ன் இண்டிகேட்டர்கள், மேற்கூரை தண்டவாளங்கள், பக்கவாட்டு படிக்கட்டுகள் மற்றும் பல-ஸ்போக் அலாய் சக்கரங்களும் வழங்கப்பட்டுள்ளன.

விரைவில் அறிமுகமாகவுள்ள புதிய தலைமுறை மஹிந்திரா எக்ஸ்யூவி500 எஸ்யூவி காரை போல் அல்லாமல், 2021 ஸ்கார்பியோ தள்ளு வகையிலான கதவு கைப்பிடிகளை கொண்டுள்ளது. தற்சமயம் இசட்101 என்ற பெயரால் குறிப்பிடப்பட்டு வரும் புதிய ஸ்கார்பியோ ஏணி வடிவிலான சேசிஸை சார்ந்ததாக இருக்கலாம்.

அதேபோல் இந்த 2021ஆம் ஆண்டிற்கான மஹிந்திரா தயாரிப்பு மாடலில் அதிகப்பட்சமாக 158 பிஎச்பி பவரை வெளிப்படுத்தக்கூடிய 2.0 லிட்டர் டீசல் என்ஜின் 6-ஸ்பீடு மேனுவல் மற்றும் ஆட்டோமேட்டிக் ட்ரான்ஸ்மிஷன் தேர்வுகளுடன் வழங்கப்படவுள்ளன.

2021 மஹிந்திரா ஸ்கார்பியோவின் அறிமுகம் இந்த 2021ஆம் ஆண்டின் மத்தியில் இருக்கலாம்.