கூடுதல் சிறப்பம்சங்களுடன் வருகிறது ரெனோ ட்ரைபர்... விபரங்கள் கசிந்தது!

இந்தியாவின் எம்பிவி கார் மார்க்கெட்டில் ரெனோ ட்ரைபர் கார் குறைவான பட்ஜெட்டில் மிகச் சிறந்த தேர்வாக இருந்து வருகிறது. டிசைன், வசதிகள், விலை என அனைத்திலும் நிறைவை தருவதால், விற்பனையிலும் கலக்கி வருகிறது.

இந்த நிலையில், 2021 மாடலாக புதிய ரெனோ ட்ரைபர் விரைவில் விற்பனைக்கு கொண்டு வரப்பட உள்ளது. வாடிக்கையாளர்களின் எதிர்பார்ப்புகளை பூர்த்தி செய்யும் விதமாக, வெளிப்புறத்திலும், உட்புறத்திலும் பல சிறப்பம்சங்கள் சேர்க்கப்பட்டுள்ளன. புதிய வண்ணத் தேர்விலும் வர இருக்கிறது. இந்த தகவல்கள் கார்வாலே தளம் மூலமாக வெளியாகி இருக்கிறது.

புதிய ரெனோ ட்ரைபர் காரில் புதிய செடர் பிரவுன் என்ற பழுப்பு வண்ணத் தேர்வு அறிமுகம் செய்யப்பட இருக்கிறது. இந்த வண்ணத் தேர்வில் கருப்பு வண்ண கூரையுடன் டியூவல் டோன் எனப்படும் இரட்டை வண்ணத் தேர்வாக வர இருக்கிறது.

மேலும், ரியர் வியூ மிரரில் எல்இடி பல்புகள் கொண்ட இண்டிகேட்டர்கள், டியூவல் ஹாரன் ஆகியவையும் கூடுதல் சிறப்பம்சங்களாக கொடுக்கப்பட உள்ளன.

உட்புறத்திலும் சில கூடுதல் வசதிகள் இடம்பெற்றுள்ளன. ஓட்டுனர் இருக்கையின் உயரத்தை அட்ஜெஸ்ட் செய்யும் வசதி அறிமுகம் செய்யப்பட உள்ளது. அதேபோன்று, ஸ்டீயரிங் வீலில் ஆடியோ மற்றும் போன் அழைப்புகளை கட்டுப்படுத்துவதற்கான சுவிட்சுகள் கொடுக்கப்பட உள்ளன.

ரெனோ ட்ரைபர் கார் வெள்ளை, சில்வர், நீலம், ஆரஞ்ச் மற்றும் பழுப்பு வண்ணத் தேர்வுகளில் வர இருக்கிறது. ஆர்எக்ஸ்இசட் என்ற டாப் வேரியண்ட்டில் இந்த வண்ணத் தேர்வுகள் கருப்பு வண்ணக் கூரை அமைப்புடன் இரட்டை வண்ணத் தேர்வில் கிடைக்கும். இதுவரை வழங்கப்பட்டு வந்த சிவப்பு வண்ணத் தேர்வு நீக்கப்பட உள்ளதாகவும் தெரிய வந்துள்ளது.

ரெனோ ட்ரைபர் எம்பிவி காரில் 1.0 லிட்டர் பெட்ரோல் எஞ்சின் பொருத்தப்பட்டு இருக்கிறது. இந்த எஞ்சின் அதிகபட்சமாக 71 பிஎச்பி பவரையும், 96 என்எம் டார்க் திறனையும் வழங்கும். 5 ஸ்பீடு மேனுவல் கியர்பாக்ஸ் மற்றும் ஏஎம்டி ஆட்டோமேட்டிக் கியர்பாக்ஸ் தேர்வுகளில் கிடைக்கும்.

மேனுவல் கியர்பாக்ஸ் மாடலானது லிட்டருக்கு 19 கிமீ மைலேஜையும், ஏஎம்டி கியர்பாக்ஸ் லிட்டருக்கு 18.29 கிமீ மைலேஜையும் வழங்கும் என்று தெரிவிக்கப்படுகிறது. தற்போதைய மாடலைவிட சற்றே கூடுதல் விலையல் 2021 ரெனோ ட்ரைபர் கார் விற்பனைக்கு எதிர்பார்க்கப்படுகிறது.