எங்கேயோ போகும் காத்திருப்பு காலம்! சஃபாரி காரை பெற எத்தனை நாள் காத்திருக்கணும் தெரியுமா?.. உற்சாகத்தில் டாடா!

டாடா நிறுவனத்தின் புதுமுக வாகனங்களில் சஃபாரி காரும் ஒன்று. இதனை மிக சமீபத்திலேயே நிறுவனம் இந்தியாவில் அறிமுகப்படுத்தியது. அரசியல்வாதிகளின் மிகவும் பிரியமான கார் மாடல்களில் சஃபாரியும் ஒன்று. கடந்த சில ஆண்டுகளுக்கு முன்னர் சில குறிப்பிட்ட காரணங்களுக்காக இக்காரை விற்பனையில் இருந்து வெளியேற்றியது. இந்த நிலையிலேயே மீண்டும் புதிய உருவம் மற்றும் தொழில்நுட்ப வசதிகளுடன் டாடா விற்பனைக்கு அறிமுகப்படுத்தியிருக்கின்றது.

இதனால், மக்கள் மத்தியில் அமோகமான வரவேற்பை டாடா சஃபாரி பெற்று வருகின்றது. இதன் விளைவாக இக்காருக்கான காத்திருப்பு காலம் உயர்ந்திருப்பதாக தகவல்கள் வெளியாகியுள்ளன. அதாவது, தற்போது டாடா சஃபாரி காரை புக் செய்தால் 1 முதல் 2 மாதங்கள் வரை காத்திருக்க வேண்டும் என தற்போது வெளியாகியிருக்கும் தகவல்கள் தெரிவிக்கின்றன.

குறிப்பாக, நமது சென்னையில் இக்காருக்கு 1 முதல் 1.5 மாதங்கள் காத்திருப்பு காலம் நிலவுவதாக கார் தேக்கோ செய்தி தளம் தகவல் வெளியிட்டிருக்கின்றது. இதேபோன்று இந்தியாவின் பெருவாரியான நகரங்களில் காத்திருப்பு காலம் அதிகரித்த வண்ணமே இருப்பதாக அந்த செய்தியில் தகவல் வெளியிடப்பட்டுள்ளது.

அதிகபட்சமாக காசியாபாத் நகரத்தில் டாடா சஃபாரி காரை பெற 2 முதல் 2.5 மாதங்கள் காத்திருக்கும் நிலை உருவாகியிருப்பதாகக் கூறப்படுகின்றது. இதற்கடுத்தபடியாக தலைநகர் டெல்லி, ஹைதராபாத், லக்னோ, இந்தூர் மற்றும் நொய்டா ஆகிய நகரங்களில் காத்திருப்பு காலம் 2 மாதங்களாக நீடிக்கின்றன.

அமோகளவில் கிடைக்கப்பெற்று வரும் புக்கிங்கின் காரணத்தினால் இத்தகைய அதிகபட்ச நாட்கள் காத்திருப்பு காலம் ஏற்பட்டிருப்பதாக டாடா மோட்டார்ஸ் நிறுவனம் தெரிவித்திருக்கின்றது. டாடா சஃபாரி கார் ரூ. 14.69 லட்சம் தொடங்கி ரூ. 21.45 லட்சம் வரையிலான விலையில் விற்கப்பட்டு வருகின்றது.

இக்காரை டாடா நிறுவனம் அதன் ஹாரியர் காரை தயாரிக்கும் அதே ஒமெகா-ஆர்க் பிளாட்பாரத்தில் வைத்தே தயாரித்து வருகின்றது. எனவே தொழில்நுட்பம், கவர்ச்சியான தோற்றம், ஆடம்பரம் என அனைத்திலும் கெத்து காட்டும் வாகனமாக இக்கார் இருக்கின்றது. குறிப்பாக, பாதுகாப்பை இரு மடங்கில் வழங்கக் கூடிய கருவிகளும் இக்காரில் அதிகளவில் இடம்பெற்றிருக்கின்றன.

டாடா சஃபாரி கார்கள் 9 விதமான வேரியண்டுகளில் விற்பனைக்குக் கிடைத்து வகுகின்றது. இதுதவிர கூடுதலாக அட்வென்சர் பதிப்பு சஃபாரி காரையும் டாடா விற்பனைக்கு அறிமுகப்படுத்தியிருக்கின்றது. இதனைத் தனித்துவமான நிறம் மற்றும் கூடுதல் அலங்கரிப்பு அணிகலன்களுடன் விற்பனைக்கு வழங்குகின்றது டாடா. தொடர்ந்து, காரின் உட்பகுதியான கேபினிலும் சில கூடுதல் சிறப்பு சொகுசு அம்சங்கள் மற்றும் பிரீமியம் அம்சங்களை டாடா வழங்குகின்றது.

டாடா சஃபாரி கார் 2.0 லிட்டர் க்ரியோடெக் டீசல் எஞ்ஜின் தேர்வில் மட்டுமே விற்பனைக்குக் கிடைக்கின்றது. இது அதிகபட்சமாக 170 பிஎஸ் மற்றும் 350 என்எம் டார்க்கை வெளியேற்றக் கூடியது. தொடர்ந்து, 6 ஸ்பீடு மேனுவல் அல்லது 6 ஸ்பீடு ஆட்டோமேட்டிக் டிரான்ஸ்மிஷன் ஆகிய இரு விதமான எஞ்ஜின் தேர்வுகளிலும் இக்கார் விற்பனைக்குக் கிடைக்கின்றது.

நகரவாரியான காத்திருப்பு காலம் பற்றிய தகவலை பட்டியலாகக் கீழே காணலாம்.